JOB 11
11
Si Zofar Nagasumbong sang Kalautan ni Job
1Niyan si Zofar nga Naamanhon nagsabat:
2“Dili bala pagsabton ang kadam-an sang mga polong,
kag pakamatarungon bala ang tawo nga palahambal?
3Magapahipus bala sang mga tawo ang imo mga pagpabugal,
kag kon mag-uligyat ka, wala bala sing tawo nga magapakahuya sa imo?
4Kay nagasiling ka, ‘Ang akon pagtolon-an putli,
kag matinlo ako sa imo mga mata.’
5Apang kabay nga ang Dios magpamolong,
kag magtikab sang iya mga bibig batok sa imo,
6kag nga sia magpakita sa imo sang mga tinago sang kaalam!
Kay sia nanarisari sa paghangup.
Busa kilalaha nga ang Dios nagasukut sa imo sing kubus sa nagakaigo sang imo kalautan.
7“Makasapu ka bala sang Dios paagi sa pag-usisa?
Makasapu ka bala sang Makaako tubtub sa kahimpitan?
8Mataas ini subong sang langit—ano bala ang mahimo mo?
Madalum pa sa Sheol—ano bala ang mahibaloan mo?
9Ang iya takus malaba pa sa duta,
kag masangkad pa sa dagat.
10Kon sia mag-agi, kag magpamilanggo,
kag magtawag sa hukmanan, niyan sin-o bala ang makapugung sa iya?
11Kay nakilala niya ang mga tawo nga malimbongon;
makita niya ang kalautan man, bisan nga wala niya ginasapaka ini.
12Apang ang tawo nga walay pulus wala sing paghangup,
hoo, ang tawo natawo subong sang tinday sang asna nga talonon.
13“Kon ituhoy mo sing matarung ang imo tagiposoon,
iuntay ang imo mga kamut nayon sa iya.
14Kon ang kalautan yara sa imo kamut, isikway ini,
kag dili pagpapuy-a sa imo mga layanglayang ang pagkadi-matarung.
15Niyan sa pagkamatuud mahangad mo ang imo nawung nga walay dagta;
hoo, manginmalig-on ka, kag dili mahadluk.
16Kay malipatan mo ang imo pagkamakalolooy;
madumduman mo ini subong sang mga tubig nga nagligad.
17Kag ang imo kabuhi manginmasanag pa sang kaodtohon;
bisan may kadudulman manginsubong ini sang kaagahon.
18Kag manginmapag-on ka, bangud nga may paglaum;
hoo, magapanghulonghulong ka sa palibut mo kag magapahuway ka sa kalig-on.
19Magahigda ka man,
kag walay magapahadluk sa imo;
madamu ang magapahamuut sa imo.
20Apang ang mga mata sang malaut magadulum;
wala na sila sing palagyohan,
kag ang ila paglaum amo ang pagkabugto sang ginhawa.”
Currently Selected:
JOB 11: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
