ISAIAS 54
54
Ang Walay Katapusan nga Paghigugma sang Ginoo sa Israel
1“Mag-amba, O baw-as, ikaw nga wala mag-anak;
mag-amba kag magsinggit sing mabaskug,
ikaw nga wala pagsakiti sa pag-anak!
Kay madamu pa ang mga anak sang binayaan
sang sa mga anak sang nakasal nga asawa,#Gal. 4:27. nagasiling ang Ginoo.
2Palapara ang duug sang imo layanglayang,
kag ipahitad sa ila ang mga kumbung sang imo mga puluy-an;
dili pagpunggi, palabaa ang imo mga banting
kag palig-ona ang imo mga palpal.
3Kay magasangkad ka sa too kag sa wala,
kag ang imo mga kaliwatan magatag-iya sang mga pungsud
kag magpapuyo sang mga banwa nga mamingaw.
4“Dili magkahadluk, kay indi ka mahuy-an;
dili ka magpalibog, kay indi ka pagpakahuy-an;
kay malipatan mo ang kahuluy-an sang imo pagkapamatan-on,
kag indi mo na madumduman ang kahuluy-an sang imo pagkabalo.
5Kay ang imo Magbubuhat amo ang imo bana,
ang Ginoo sang mga kasoldadosan amo ang iya ngalan;
kag ang Balaan sang Israel amo ang imo Manunubus,
tawgon sia nga Dios sang bug-os nga duta.
6Kay ang Ginoo nagtawag sa imo
subong sang asawa nga binayaan kag pinakalisud sa espiritu,
subong sang asawa sang pamatan-on sang binayaan sia,
nagasiling ang imo Dios.
7Sa isa ka diotay nga tion ginbayaan ko ikaw,
apang sa may dalagku nga mga kalooy tiponon ko ikaw.
8Sa nagaawas nga kasingkal sa malip-ot nga tion
gintago ko ang akon nawung gikan sa imo,
apang sa dayon nga paghigugma magakalooy ako sa imo,
nagasiling ang Ginoo nga imo Manunubus.
9“Kay ini subong sang mga tubig ni Noe sa akon:
subong nga nagsumpa ako nga ang mga tubig ni Noe
indi na maglambas sa ibabaw sang duta,#Gen. 9:8-17.
sa amo nagsumpa ako nga indi na ako magkasingkal sa imo
ukon magsabdong sa imo.
10Kay ang kabukiran mataliwan
kag ang kabakoloran makuha,
apang ang akon malig-on nga paghigugma indi magtaliwan sa imo,
ukon ang akon katipan sang paghidait makuha,
nagasiling ang Ginoo, nga may kalooy sa imo.
11“O ikaw nga ginpapiotan, nga ginbatibati sang unus, kag wala paglipaya,
yari karon, ako magapahamtang sang imo mga bato sa antimonio,
kag ipahamtang ko ang imo mga sadsaran nga may mga zafiro.
12Himoon ko nga mga rubi ang imo mga alibungan,
ang imo mga gawang nga mga carbunclo,
kag ang bug-os mo nga kuta nga mga bato nga bilidhon.#Bug. 21:18-21.
13Ang tanan mo nga anak tudloan sang Ginoo,#Juan 6:45.
kag mangindaku ang paghidait sang imo mga anak.
14Sa pagkamatarung lig-onon ka;
magalayo ka sa pagpigus, kay indi ka mahadluk;
kag sa kakugmat, kay indi ini magpalapit sa imo.
15Kon maghimbon sila,
indi tungud sa akon;
ang bisan sin-o nga magahimbon batok sa imo
mapukan bangud sa imo.
16Yari karon, ako nagtuga sang manugsalsal
nga nagahungkoy sang mga baga,
kag nagapagowa sing hinganiban sa iya buluhaton.
Ako nagtuga man sang manug-usik sa paglaglag;
17wala sing hinganiban nga ginhimo batok sa imo nga magauswag,
kag ang tagsa ka dila nga magtindug batok sa imo sa paghukom tagudilian mo.
Ini amo ang panublion sang mga alagad sang Ginoo
kag ang ila pagkamatarung nga gikan sa akon, nagasiling ang Ginoo.”
Currently Selected:
ISAIAS 54: ABHIL82
Highlight
Share
Compare
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
