ISAIAS 55
55
Ang Walay Bayad nga Tanyag sang Kalooy sa Tanan
1“Ho, ang tagsatagsa nga ginauhaw, kari kamo sa mga tubig;#Bug. 21:6; 22:17.
kag ang wala sing cuarta,
kari kamo, magbakal kag magkaon!
Kari, magbakal sing alak kag gatas
sa wala sing cuarta kag sa wala sing bili.
2Ngaa bala nagahinguyang kamo sing cuarta sa indi kalan-on,
kag sang inyo pagpangabudlay sa wala nagapabusug?
Magpamati sing matalupangdon sa akon,
kag magkaon kamo sang maayo,
kag pakalipaya ang inyo kalag sa katambok.
3Ihuyug ang inyo idulungug, kag magkari sa akon;
magpamati, kag ang inyo kalag magakabuhi;
kag magahimo ako sing dayon nga katipan upud sa inyo,
ang akon dayon kag malig-on nga paghigugma kay David.#Binu. 13:34.
4Yari karon, ginhatag ko sia nga saksi sa mga katawohan,
pangolo kag manugmando sa mga katawohan.
5Yari karon, magatawag ka sing pungsud nga wala mo makilala,
kag ang pungsud nga wala makakilala sa imo magadalagan sa imo,
bangud sang Ginoo nga imo Dios, kag sang Balaan sang Israel,
kay ginhimaya ka niya.
6“Pangitaa ninyo ang Ginoo samtang nga makita pa sia,
tawga ninyo sia samtang nga malapit pa sia;
7magbiya ang malauton sang iya dalanon,
kag ang dimatarung nga tawo sang iya mga painoino;
magbalik sia sa Ginoo, kag sia magakalooy sa iya,
kag sa aton Dios, kay sia magapatawad sing bugana.
8Kay ang akon mga hunahuna indi inyo mga hunahuna,
kag ang inyo mga dalanon indi akon mga dalanon, nagasiling ang Ginoo.
9Kay subong nga ang mga langit mataas pa sa duta,
sa amo ang akon mga dalanon mataas pa sa inyo mga dalanon
kag ang akon mga painoino sa inyo mga painoino.
10“Kay subong sang ulan nga nagakaholog kag sang nieve gikan sa langit,
kag wala nagabalik didto kondi nagatubig sang duta,
nga nagapabunga sini kag nagapasalingsing,
nga nagahatag sing binhi sa manugsab-ug kag kalan-on sa manugkaon,#2 Cor. 9:10.
11manginsubong sini ang akon polong nga nagagowa sa akon baba;
indi magbalik ini sa akon sa wala sing pulus,
kondi magatigayon ini sang akon nahamut-an,
kag magauswag ini sa butang nga akon ginpadal-an sini.
12“Kay magagowa kamo nga may kalipay,
kag pagtuytuyan nga may paghidait;
ang kabukiran kag ang kabakoloran sa atubangan ninyo magaamba,
kag ang tanan nga kahoy sang latagon magapamalakpak sang ila mga kamut.
13Sa baylo sang talongon magatubo ang abeto;
sa baylo sang sapinit magatubo ang mirto;
kag ini manginngalan sa Ginoo, sa dayon nga tanda nga indi mawala.”
Currently Selected:
ISAIAS 55: ABHIL82
Highlight
Share
Compare
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
