ISAIAS 42
42
Ang Alagad sang Ginoo
1Yari karon ang akon alagad, nga akon ginatib-ong,
ang akon pinili, nga sa iya ang akon kalag nagakalipay;#Mat. 3:17; 17:5; Mar. 1:11; Luc. 3:22; 9:35.
ginbutang ko sa iya ang akon Espiritu,
ipahayag niya ang katarungan sa mga Gentil.
2Indi sia magsinggit ukon magbayaw sang iya tingug,
ukon magpabati sini sa dalan;
3ang tabun-ak nga basag indi niya pagbalion,
kag ang pabilo nga nagairaw indi niya pagpalongon;
ipahayag niya ang katarungan sa kamatooran.
4Indi sia magluya ukon magmatalaw
tubtub nga mapahamtang niya sa duta ang katarungan;
kag ang mga pulo magahulat sang iya kasogoan.#Mat. 12:18-21.
5Amo ini ang ginasiling sang Dios, ang Ginoo,
sia nga nagtuga sang mga langit kag naghitad sa ila,
sia nga naghumlad sang duta kag sang nagagowa sa sini,
sia nga nagahatag sing ginhawa sa katawohan sa ibabaw sini,#Binu. 17:24-25.
kag espiritu sa mga nagalakat sa sini;
6“Ako amo ang Ginoo, nagtawag ako sa imo sa pagkamatarung,
nag-uyat ako sang imo kamut kag nagbantay sa imo;
naghatag ako sa imo nga katipan sa katawohan,
nga kapawa sa mga Gentil,#Isa. 49:6; Luc. 2:32; Binu. 13:47; 26:23.
7sa pagpamuklat sang mga mata sang bulag,
sa pagpagowa sa bilanggoan nga madulum sang mga binilanggo,
sang mga nagalingkod sa kadudulman gikan sa bilanggoan.
8Ako amo ang Ginoo, ina amo ang akon ngalan;
indi ko pag-ihatag sa iban ang akon himaya,
ukon ang akon pagdayaw sa mga larawan nga tinigban.
9Yari karon, ang mga butang nga nahauna nagakahanabu,
kag ako nagapahayag sing mga butang nga bag-o;
sa wala pa sila maggowa
ginasugid ko sila sa inyo.
Pagdayaw bangud sang Gamhanan nga Pagluwas sang Ginoo
10Ambahan kamo sa Ginoo sing bag-o nga ambahanon,
sang iya pagdayaw gikan sa ukbung sang duta!
Kamo nga nagadulhog sa dagat kag ang tanan nga yara sa iya,
ang kapuloan kag ang iya mga pumuluyo.
11Magbayaw sang ila tingug ang kamingawan kag ang iya kabanwaanan,
ang mga minoro nga ginasakup sang Cedar;
mag-ambahan ang mga pumuluyo sang Sela,
magsinggit sila kutub sa putokputokan sang mga bukid.
12Maghimaya sila sa Ginoo,
kag magpahayag sang iya pagdayaw sa kapuloan.
13Ang Ginoo magagowa subong sang gamhanan nga tawo,
painiton niya ang iya kakugi kaangay sang hangaway;
magasinggit sia, magasinggit sia sing mabaskug,
magagamhanan sia batok sa iya mga kaaway.
14Naghipus ako sing malawig nga tion,
nagpahimonong ako kag nagpugung sang akon kaugalingon;
magasinggit ako subong sang babayi nga ginasakitan,
magahingakhingak ako kag magahagal sing tingub.
15Laglagon ko ang kabukiran kag kabakoloran,
kag palayaon ang tanan nila nga gamhon;
himoon ko nga kapuloan ang mga suba,
kag pamalahon ang mga ponong.
16Kag dalhon ko ang mga bulag
sa dalan nga wala nila mahibaloi,
sa mga banas nga wala nila makilala
tuytuyan ko sila.
Sa atubangan nila himoon ko ang mga kadudulman nga kapawa,
ang mga duug nga tiko nga matadlong.
Ini nga mga butang himoon ko,
kag indi ko sila pagbayaan.
17Pabalikon sila kag pakahuy-an sila sing bug-os,
nga nagasalig sa mga larawan nga tinigban,
nga nagasiling sa mga larawan nga tinunaw,
“Mga dios kamo namon.”
Ang Israel Wala Makahimulus sang Disiplina
18Pamati, kamo nga mga bungul;
kag magtolok, kamo nga mga bulag, agud nga makakita kamo!
19Sin-o bala ang bulag kondi ang akon alagad,
ukon bungul subong sang akon manugbalita nga ginapadala ko?
Sin-o bala ang bulag subong sang may paghidait sa akon,
ukon bulag subong sang alagad sang Ginoo?
20Nagatan-aw ka sang madamu nga butang, apang wala ka nagatalupangud;
nabuksan ang iya mga idulungug, apang wala sia nagapamati.
21Nahamut-an sang Ginoo, tungud sa iya pagkamatarung,
sa pagpakadaku sang kasogoan kag paghimo sini nga dungganon.
22Apang ini nga katawohan kinawatan kag inati,
sila tanan nasiod sa mga boho
kag ginatago sila sa mga bilanggoan;
natugyan sila nga alagawon kag wala gid sing nagaluwas,
alatihon kag wala gid sing nagasiling, “Iuli!”
23Sin-o bala dira sa inyo ang magadungug sini,
nga magatalupangud kag magapamati nahanungud sa tion nga palaabuton?
24Sin-o bala ang nagtugyan sang Jacob nga alagawon,
kag sang Israel sa mga buyong?
Indi bala ang Ginoo, nga sa iya nakasala kita,
nga sa iya mga dalanon indi sila maglakat,
kag indi sila matinumanon sa iya kasogoan?
25Busa iya gin-ula sa iya ang kapintas sang iya kaakig
kag ang kakusug sang inaway,
gintutdan sia sing kalayo sa palibut, apang wala sia makahibalo;
nagsonog ini sa iya, apang wala niya ini paghupti sa tagiposoon.
Currently Selected:
ISAIAS 42: ABHIL82
Highlight
Share
Compare
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
