ISAIAS 43
43
Ang Ginoo Amo Lamang ang Manunubus
1Apang karon amo ini ang ginasiling sang Ginoo,
nga nagtuga sa imo, O Jacob,
ang naghuman sa imo, O Israel:
“Dili ka mahadluk, kay gintubus ko ikaw;
gintawag ko ikaw sa imo ngalan, akon ikaw.
2Kon mag-agi ka sa mga tubig ako magaupud sa imo;
kag sa mga suba indi sila maglapaw sa imo;
kon mag-agi ka sa kalayo, indi ka masonog,
kag ang dabdab indi magdukut sa imo.
3Kay Ako amo ang Ginoo nga imo Dios,
ang Balaan sang Israel, nga imo Manluluwas.
Ginhatag ko ang Egipto subong nga sa imo gawad,
ang Etiopia kag ang Seba nga tal-us nimo.
4Tungud nga bilidhon ka sa akon itololok,
kag dungganon, kag ginhigugma ko ikaw,
busa ihatag ko ang katawohan sa tal-us nimo,
ang mga katawohan sa baylo sang imo kabuhi.
5Dili ka mahadluk, kay ako nagaupud sa imo;
gikan sa sidlangan dalhon ko ang imo kaliwat,
kag tiponon ikaw gikan sa katundan;
6magasiling ako sa aminhan, Itugyan,
kag sa bagatnan, Dili pagpunggi;
dalha gikan sa malayo ang akon mga anak nga lalaki
kag ang akon mga anak nga babayi gikan sa ukbung sang duta,
7ang tagsatagsa nga ginatawag sa akon ngalan,
nga sa akon himaya gintuga ko,
nga ginhuman kag ginbuhat ko.”
8Pagowaa ang katawohan nga bulag, apang may mga mata,
nga mga bungul, apang may mga idulungug!
9Pagtiponon sing tingub ang tanan nga pungsud,
kag tiponon ang mga katawohan.
Sin-o bala sa ila ang makapahayag sini,
kag magpakita sa aton sang nahauna nga mga butang?
Padalha sila sang ila mga saksi agud nga mapakamatarung sila,
ukon papamati-a sila kag magsiling, Kamatooran ini.
10“Kamo akon mga saksi,” nagasiling ang Ginoo,
“kag ang akon alagad nga ginpili ko,
agud nga magakilala kamo kag magtoo sa akon
kag makahangup nga ako Sia.
Una sa akon wala gid sing dios nga ginhuman,
kag wala na gid sa olihi nakon.
11Ako, Ako gid amo ang Ginoo,
kag luwas sa akon walay manluluwas.
12Ako nagpahayag kag ako nagluwas, kag ako nagpakita,
sang walay dumuloong nga dios sa tunga ninyo;
busa kamo ang akon mga saksi,” nagasiling ang Ginoo.
13“Ako amo ang Dios, kag kutub sang pagpamuno sang adlaw ako Sia;
wala gid sing makaluwas gikan sa akon kamut;
ako magapangabudlay kag sin-o bala ang magasablag sini?”
14Amo ini ang ginasiling sang Ginoo,
nga inyo Manunubus, ang Balaan sang Israel:
“Tungud sa inyo ginpadalhan ko ang Babilonia
kag padulhogon ko ang tanan sa ila subong nga mga laaslaas,
kag ang mga Caldeanhon sa mga sakayan sang ila pagkinalipay.
15Ako amo ang Ginoo, ang inyo Balaan,
ang Manunuga sang Israel, nga inyo Hari.”
16Amo ini ang ginasiling sang Ginoo,
nga nagahimo sing dalan sa dagat,
kag banas sa gamhanan nga mga tubig,
17nga nagapagowa sang kangga kag kabayo,
sang hangaway kag gamhanan nga tawo;
nagahulid sila sing tingub, indi sila magbangon,
nawala sila, napalong sila subong sang pabilo:
18“Dili kamo magpanumdum sang nahaunang mga butang,
ukon magpamalandong sang dumaan nga mga butang.
19Yari karon, magahimo ako sing bag-ong butang;
karon magalutaw ini, indi bala kamo makahibalo sini?
Magahimo pa ako sing dalan sa kamingawan
kag mga suba sa desierto.
20Ang mga sapat sa latagon magapadungug sa akon,
ang mga chacal kag ang mga avestruz;
bangud nga naghatag ako sing mga tubig sa kamingawan,
mga suba sa desierto,
sa pagpainum sa akon katawohan nga pinili,
21ang katawohan nga ginhuman ko nga sa akon
agud nga sila magpahayag sang akon kadayawan.
22“Apang wala ka magpanawag sa akon, O Jacob;
kondi gintak-an ka sa akon, O Israel!
23Wala mo ako pagdalhi sang imo mga carnero nga sa mga halad-nga-sinonog,
ukon ginpadunggan ako sang imo mga halad.
Wala ko ikaw paglulani sang mga halad,
ukon ginpatak-an ko ikaw sing incienso.
24Wala mo ako mabakli sa cuarta sing calamus nga mahumut,
ukon ginbusug ako sang sapay sang imo mga halad.
Kondi ginlulanan mo ako sang imo mga sala,
ginpatak-an mo ako sang imo mga kalautan.
25“Ako, Ako gid amo Sia
nga nagapanas sang imo mga paglalis tungud sa akon,
kag indi na ako magdumdum sang imo mga sala.
26Dumduma ako magkasabaay kita;
ipahayag ang imo kasaba, agud nga mapakamatarung ka.
27Ang imo nahaunang amay nagpakasala,
kag ang imo mga manunudlo naglalis sa akon.
28Busa pasipalahan ko ang mga principe sang santuario,
himoon ko ang Jacob nga katagudilian
kag ang Israel nga buluyayawon.
Currently Selected:
ISAIAS 43: ABHIL82
Highlight
Share
Compare
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
