ISAIAS 41
41
Ang Pagpasalig sang Dios sa Israel
1Maghipus sa atubangan ko, O kapuloan;
magbag-o ang mga katawohan sang ila kusug;
magpalapit sila, niyan magpamolong sila;
magpalapit kita sing tingub sa hukmanan.
2Sin-o bala ang nagapatindug sing isa gikan sa sidlangan
nga ginatawag niya sa pagkamatarung sa iya tiil?
Nagahatag sila sing mga pungsud sa atubangan niya,
kag ginapagahum niya sia sa mga hari;
ginahatag sila subong sang yab-ok sa iya espada,
subong sang ginalaban nga ginapalis sa iya pana.
3Ginalagas niya sila kag nagaagi nga hilway,
sa mga dalanon nga wala niya maagihi.
4Sin-o bala ang nagbuhat kag naghimo sini,
nga nagatawag sang mga kaliwatan kutub sa kamunoan?
Ako, ang Ginoo, nga nahauna,
kag upud sang katapusan; ako amo Sia.
5Ang kapuloan nakakita kag nagakahadluk,
ang mga ukbung sang duta nagakurug;
nagapalapit sila kag nagakari.
6Nagabuligay ang tagsa sa iya isigkatawo,
kag ang tagsatagsa nagasiling sa iya utud, “Magpakaisug ka!”
7Gani ang panday nagapaisug sang manugsalsal sang bulawan,
kag ang nagapapa nga may pakang sia nga nagamaso sang landasan,
nga nagasiling nahanungud sang pagsolda, “Maayo ini”;
kag ginpalig-on niya ini sang mga lansang agud nga indi mapalus.
8Apang ikaw, Israel, alagad ko,
si Jacob, nga akon ginpili,
ang kaliwat ni Abraham, nga akon abyan;#2 Cron. 20:7; Sant. 2:23.
9ikaw nga ginkaptan ko kutub sa mga ukbung sang duta,
kag gintawag gikan sa mga pamusud niya,
nga nagsiling sa imo,
“Ikaw akon alagad, ginpili ko ikaw kag wala pag-ipilak”;
10dili ka mahadluk, kay ako nagaupud sa imo,
dili ka magkahangawa, kay ako ang imo Dios;
palig-onon ko ikaw, buligan ko ikaw,
alay-ayon ko ikaw sang too nga kamut sang akon pagkamatarung.
11Yari karon, ang tanan nga nasingkal sa imo
mahuy-an kag maligban;
ang mga nagapakigsuay sa imo
manginsubong sang walay pulus kag mawala.
12Pangitaon mo sila nga nagapakigsuay sa imo,
apang indi mo makita sila;
ang mga nagapakig-away sa imo
manginsubong sang wala kag sang butang nga walay pulus.
13Kay ako ang Ginoo nga imo Dios,
magauyat sang imo kamut nga too;
nagasiling sa imo, “Dili magkahadluk,
magatabang ako sa imo.”
14Dili magkahadluk, ikaw nga ulud nga Jacob,
kamo nga mga tawo sang Israel!
Ako magatabang sa imo, nagasiling ang Ginoo;
ang imo manunubus amo ang Balaan sang Israel.
15Yari karon, ginahimo ko ikaw nga inugkarus
bag-o, matalum, kag may mga ngipon;
karuson mo ang mga bukid kag dugmukon sila,
kag ang kabakoloran himoon subong sang labhang;
16pahanginan mo sila kag ang hangin magapalid sa ila,
kag ang buhawi magalapta sa ila.
Kag magakalipay ka sa Ginoo;
magahimaya ka sa Balaan sang Israel.
17Ang mga makalolooy kag ang nawad-an nagapangita sing tubig,
kag wala gid,
kag ang ila dila nagamala sa kauhaw,
ako nga Ginoo magasabat sa ila,
ako nga Dios sang Israel indi magbiya sa ila.
18Magabukas ako sing mga suba sa hublas nga mga kataasan,
kag mga tuburan sa tunga sang mga nalupyakan;
himoon ko ang kamingawan nga punong sang tubig,
kag ang duta nga mala nga mga tuburan sang tubig.
19Ibutang ko sa kamingawan ang cedro,
ang acacia, ang mirto, kag ang kahoy sa lana;
ipahamtang ko sing tingub sa desierto ang abeto,
ang encina kag ang kahoy nga boks;
20agud nga makita nila kag makilala,
mapatugsilingan kag mahangup sing tingub,
nga ang kamut sang Ginoo naghimo sini,
nga ang Balaan sang Israel nagtuga sini.
Ang Paghangkat sang Dios sa Dimatuud nga mga Dios
21Ipakita ang inyo kasaba, nagasiling ang Ginoo;
ipagowa ang inyo mga katarungan nga mabakud,
nagasiling ang Hari ni Jacob.
22Ipagowa nila sila, kag ipahayag nila sa amon
ang magaabut.
Ipahayag ninyo ang nahauna nga mga butang, kon ano sila,
agud nga mapatugsilingan naton sila,
kag mahibaloan ang ila kaolihian;
ukon ipakita sa amon ang mga butang nga magaabut.
23Ipahayag ang mga butang nga magaabut sa olihi,
agud nga mahibaloan namon nga kamo mga dios;
maghimo kamo sing maayo, ukon malaut,
agud nga mahanguyus kami kag magtan-aw sini sing tingub.
24Yari karon, wala kamo,
kag ang inyo binuhatan wala sing pulus;
kangil-aran ang nagapili sa inyo.
25Gikan sa aminhan ginapatindug ko ang isa, kag nagakari sia,
gikan sa bulutlakan sang adlaw, ang isa nga nagatawag sa akon ngalan;
magaabut sia sa mga manuggahum subong sang sa galagala,
subong sang maninihon nga nagalinas sa lunang.
26Sin-o bala ang nagpahayag sini kutub sa ginsuguran, agud nga makahibalo kita,
kag sa una nga tion, agud nga magsiling kita, “Matarung sia”?
Wala sing nagapahayag,
wala sing nagapakita,
wala gid sing nagapamati sang inyo mga polong.
27Ako ang nahauna nga nagasiling sa Sion, Yari karon, yari karon sila,
kag ihatag ko sa Jerusalem ang isa nga nagadala sing maayo nga mga balita.
28Apang sang nagatolok ako, wala sing tawo;
sa tunga nila wala sing manuglaygay
nga, sang pamangkoton ko sila, makasabat sing polong.
29Yari karon, tanan sila kadayawan;
ang ila mga binuhatan wala sing pulus;
ang ila mga larawan nga tinunaw hangin kag kalibog.
Currently Selected:
ISAIAS 41: ABHIL82
Highlight
Share
Compare
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
