ISAIAS 40
40
Ang mga Polong sang Ginoo sa Paglipay sang Sion
1Lipaya ninyo, lipaya ninyo ang akon katawohan,
nagasiling ang inyo Dios.
2Pamolong kamo sing malipayon sa Jerusalem,
kag isinggit sa iya
nga ang iya pag-away tapus na,
nga ang iya kalautan napatawad.
nga sia nakabaton sa kamut sang Ginoo
sing pilo tungud sa tanan niyang sala.
3Ang tingug sang isa nga nagasinggit:
“Amana ninyo sa kamingawan ang dalan sang Ginoo,
magtadlong sa desierto sing dakung dalan tungud sa aton Dios.#Mat. 3:3; Mar. 1:3; Juan 1:23.
4Ang tagsa ka nalupyakan pataason,
kag ang tagsa ka bukid kag bakolod paubson;
ang mga bulubungyud panhayon,
kag ang mga duug nga kudulkudul tapanon.
5Kag ang himaya sang Ginoo igapahayag,
kag ang tanan nga unud makakita sini sing tingub,
kay ang baba sang Ginoo nagpamolong sini.#Luc. 3:4-6.”
6Ang tingug sang isa nga nagasiling, “Singgit!”
Kag ang isa nagsiling, “Ano bala ang isinggit ko?”
Ang tanan nga unud hilamon,
kag ang bug-os nga katahum sa ila subong sang bulak sang latagon.
7Ang hilamon nagakalaya, ang bulak nagakalayong,
bangud nga ang gininhawa sang Ginoo nagahuyup sa iya;
sa pagkamatuud ang katawohan hilamon.
8Ang hilamon nagakalaya, ang bulak magakalayong;
apang ang polong sang aton Dios nagapadayon sa gihapon.#Sant. 1:10-11; 1 Ped. 1:24-25.
9O ikaw nga nagasugid sing maayong balita sa Sion,
taklad ka sa bukid nga mataas;
O ikaw nga nagasugid sing maayong mga balita sa Jerusalem,
bayawa ang imo tingug nga may kusug, bayawa, dili magkahadluk;
isiling sa mga banwa sang Juda,
“Yara karon ang inyo Dios!”
10Yari karon, ang Ginoong Dios magakari subong nga gamhanan,
kag ang iya butkon magagahum tungud sa iya;
yari karon, ang iya balus upud sa iya,
kag ang iya tumbas sa una niya.#Isa. 62:11; Bug. 22:12.
11Sia magapahalab sang iya panong kaangay sang manugpahalab
kungkungon niya sa iya butkon ang mga cordero,
dalhon sila sa iya dughan,
kag magatuytuy sing mahinay sang mga may tinday.
Ang Dimapaangayan nga Dios sang Israel
12Sin-o bala ang nagsukub sang mga tubig sa siku-ong sang iya tapnay
kag nagtakus sang langit sa iya dangaw,
nga nakahantup sang yab-ok sang duta sa sulukban
kag nagtimbang sang mga bukid sa mga tilimbangan
kag sang kabakoloran sa timbangan?
13Sin-o bala ang nagmando sa Espiritu sang Ginoo,
ukon subong nga manuglaygay niya nagtudlo sa iya?#Roma 11:34; 1 Cor. 2:16.
14Sa kay sin-o bala sia nagpalaygay kag sin-o bala ang nagsaysay sa iya,
kag nagtudlo sa iya sa banas sang katarungan,
kag nagtudlo sa iya sing ihibalo,
kag nagpakita sa iya sang dalan sang paghangup?
15Yari karon, ang mga pungsud subong sang isa ka tolo gikan sa timba,
kag ginaisip subong sang diotay nga yab-ok sang timbangan;
yari karon, ginahakwat niya ang mga pulo subong sang diotay gid nga butang.
16Ang Libano indi tuman nga isonog,
ukon ang mga sapat niya tuman nga sa halad-nga-sinonog.
17Ang tanan nga pungsud subong nga wala sa atubangan niya, ginakabig sila niya nga kubus pa sa walay pulus kag walay sulud.
18Niyan sa kay sin-o bala ninyo ipaangay ang Dios,
ukon sa ano bala nga kaangay ipaanggid ninyo sa iya?
19Ang larawan! ginhorma ini sang panday,
kag gintaklapan sing bulawan sang manugsalsal sang bulawan,
kag nagahimo nga sa sini sing mga talikala nga pilak.
20Ang tama ka imol nga sa among halad nagapili
sing kahoy nga indi magabok;
nagapangita sia sing sampaton nga panday
sa paghimo sing larawan nga tinigban nga indi maggiho.
21Wala bala kamo makahibalo? Wala bala kamo makabati?
Wala bala masugid sa inyo kutub sa ginsuguran?
Wala bala kamo makahangup kutub sa mga pagpasad sang duta?
22Sia amo ang nagalingkod sa ibabaw sang natipolonan sang duta,
kag ang iya mga pumuluyo subong sang mga tibakla;
nga nagabitad sang mga langit subong sang kumbung,
kag nagahumlad sa ila subong sang layanglayang nga puluy-an;
23nga nagapakawalay pulus sang mga principe,
kag nagahimo nga walay pulus sang mga hukom sang duta.
24Halus sila matanum, halus sila masab-ug,
halus makagamut sa duta ang ila puno, sang nagahuyup sia sa ila, kag nalaya sila,
kag ang buhawi nagadala sa ila subong sang ginalaban.
25Sa kay sin-o bala ipaangay ninyo ako,
agud nga mangintupung ako sa iya?
nagasiling ang Balaan.
26Itangla ang inyo mga mata sa hitaas kag tan-awa:
sin-o bala ang nagtuga sini sa ila?
Sia nga nagapagowa sang ila kasoldadosan sa isip,
ginatawag niya sila tanan sa ngalan;
paagi sa kadaku sang iya gahum,
kag bangud nga makusug sia sa gahum
wala sing isa nga nakulang.
27Ngaa bala nagasiling ka, O Jacob,
kag nagapamolong, O Israel,
“Ang akon dalan nalipdan sa Ginoo,
kag ang katarungan nga naigo sa akon nagaligad sa akon Dios”?
28Wala ka bala makahibalo? Wala ka bala makabati?
Ang nagapadayon nga Dios amo ang Ginoo,
ang Manunuga sang mga ukbung sang duta.
Wala sia ginapunaw ukon ginalapyo,
wala sing pagtungkad sang iya paghangup.
29Sia nagahatag sing gahum sa ginapunaw,
kag sa wala sing gahum nagadugang sia sing kusug.
30Bisan ang mga pamatan-an punawon kag lapyoon,
kag ang mga pamatan-on nga lalaki mapukan sing bug-os;
31apang ang mga nagahulat sa Ginoo magabag-o sang ila kusug,
magatimbook sila nga may mga pakpak subong sang mga aguila,
magadalagan sila kag indi paglapyoon,
magalakat sila kag indi pagpunawon.
Currently Selected:
ISAIAS 40: ABHIL82
Highlight
Share
Compare
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
