ISAIAS 39
39
Si Ezequias Nagabaton sang mga Manugbalita gikan sa Babilonia
(2 Hari 20:12-19; 2 Cron. 32:27-31)
1Sa sadtong tion si Merodac-baladan nga lalaking anak ni Baladan, hari sang Babilonia, nagpadala sing mga sulat kag dolot kay Ezequias, kay nakabati sia nga nagmasakit sia kag nag-ayo. 2Kag si Ezequias nalipay sa ila; kag ginpakita sa ila ang balay sang iya bilidhon nga mga butang, ang pilak, ang bulawan, kag ang mga pahumut, ang bilidhon nga lana, ang bug-os nga balay sang iya hinganiban, ang tanan nga nakita sa iya mga bahandi. Walay bisan ano sa iya balay ukon sa bug-os niyang ginsakpan nga wala mapakita ni Ezequias sa ila. 3Niyan nag-abut si Isaias nga manalagna kay Hari Ezequias, kag nagsiling sa iya, “Ano bala ang ginsiling sining mga tawo? Kag diin bala sila maghalin pakari sa imo?” Si Ezequias nagsiling, “Nagkari sila sa akon gikan sa duta nga malayo, gikan gid sa Babilonia.” 4Niyan nagsiling sia, “Ano bala ang nakita nila sa imo balay?” Si Ezequias nagsabat, “Nakita nila ang tanan nga yara sa akon balay; walay ano sa akon mga bahandi nga wala ko mapakita sa ila.”
5Niyan si Isaias nagsiling kay Ezequias, “Pamatii ang polong sang Ginoo sang mga kasoldadosan: 6Yari karon, magaabut ang mga adlaw nga ang tanan nga yara sa imo balay, kag ang ginsuput sang imo ginikanan tubtub sining adlaw, dalhon sa Babilonia; wala gid sing mabilin, nagasiling ang Ginoo. 7Kag ang pila sang imo mga anak nga lalaki, nga maanak mo, kuhaon nila; kag mangin-eunuco sila sa palacio sang hari sang Babilonia.#Dan. 1:17; 2 Hari 24:10-16; 2 Cron. 36:10.” 8Niyan nagsiling si Ezequias kay Isaias, “Maayo ang polong sang Ginoo nga imo ginpamolong.” Labut pa nagsiling sia, “Kay manginmay paghidait kag kamatooran sa akon mga adlaw.”
Currently Selected:
ISAIAS 39: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
