ISAIAS 34
34
Ang Kasingkal sang Ginoo batok sa Edom kag sa mga Pungsud
1Palapit, kamo nga mga pungsud, sa pagpamati,
kag magpamati, kamo nga mga katawohan!
Magpamati ang duta, kag ang iya kabug-osan;
ang kalibutan, kag ang tanan nga butang nga nagagowa gikan sini.
2Kay ang Ginoo may kaalipungut batok sa tanan nga pungsud,
kag kasingkal batok sa bug-os nilang kasoldadosan,
ginlaglag niya sila sing bug-os, gintugyan niya sila sa palatyan.
3Ang pinatay sa ila man ipilak,
kag ang kabaho sang ila mga bangkay nagausbong;
ang kabukiran matunaw sang dugo nila.
4Ang bug-os nga kadam-an sang langit matunaw,
kag ang mga langit lokoton subong sang tolon-an nga linokot.
Ang bug-os nilang kadam-an malaya,
subong sang dahon nga nagakataktak gikan sa balagon,
subong sang nagakalaya nga dahon gikan sa higuera.#Bug. 6:13-14.
5Kay ang akon espada nakainum sa iya kabulusgan sa langit;
yari karon, magatupa ini sa Edom,#Isa. 63:1-6; Jer. 49:7-22; Ezeq. 25:12-14; 35:1-15; Amos 1:11-12; Ab. 1-14; Mal. 1:2-5.
kag sa katawohan sang akon pinakamalaut sa paghukom.
6Ang espada sang Ginoo puno sing dugo,
ginapatambok ini sing katambok,
sang dugo sang mga cordero kag sang mga kanding,
sang sapay sang mga batobato sang mga carnerong lalaki.
Kay ang Ginoo may halad sa Bozra,
may dakung pagpamatay sa duta sang Edom.
7Ang mga baka nga talonon magadulhog upud sa ila,
kag ang mga tinday upud sa mga bakang lalaki.
Ang ila duta mahobog sa dugo,
kag ang ila yab-ok ginpatambok sing katambok.
8Kay ang Ginoo may adlaw sang pagtimalus,
tuig sang pagbalus tungud sa kasaba sang Sion.
9Kay ang mga ilig sang Edom mahimo nga asfalto,
kag ang iya yab-ok nga azufre;
ang iya duta mahimo nga nagadabdab nga asfalto.
10Indi ini mapalong sa gab-i ukon sa adlaw;
magatub-ok sing dayon ang iya aso.#Bug. 14:11; 19:3.
Kutub sa kaliwatan pa kaliwatan magamamingaw ini;
wala gid sing mag-agi sini sa gihapon kag sa gihapon.
11Kondi ang pelicano kag ang porcupino nagatag-iya sini,
ang bukaw kag ang uwak nagapuyo sa sini.
Untayon niya sa ibabaw sini ang latid sang kagumon,
kag ang tuntun sang pagkawala.
12Tawgon nila ang mga dungganon niya sa ginharian,
apang wala gid sing isa didto,
kag ang tanan niyang principe wala na.
13Ang mga talongon magatubo sa iya mga palacio,
sa iya mga pamakud may katonokan kag mga ragiwriw.
Manginpuluy-an ini sang mga chacal,
luwang sang mga avestruz.
14Kag ang mga sapat nga talonon sang desierto magakilita upud sang mga lobo,
ang kanding nga talonon magatawag sa iya kaupud;
hoo, ang sapat sang kagab-ihon magahukmong didto,
kag makakita sia sing duug nga palahuwayan.
15Didto ang sumbilingon nga man-ug magapugad kag magaitlog
kag magabuto kag magatipon sa idalum sang landong niya;
hoo, didto magatipon ang mga dapay,
ang tagsatagsa upud sa iya minyo.
16Usisaa ninyo sa tolon-an sang Ginoo, kag basaha:
Walay isa sini sa ila nga madula;
wala gid sing mawad-an sang iya minyo.
Kay ang baba sang Ginoo nagsogo sini,
kag ang iya Espiritu nagtipon sa ila.
17Nagpapalad sia tungud sa ila,
ang iya kamut nagbahinbahin sini sa ila sa linatid;
panag-iyahan nila ini sing dayon,
sa kaliwatan pa kaliwatan magapuyo sila didto.
Currently Selected:
ISAIAS 34: ABHIL82
Highlight
Share
Compare
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
