ISAIAS 35
35
Ang Mahimayaon nga Palaabuton sang Sion
1Ang kamingawan kag ang duta nga kigas magakasadya,
ang desierto magakalipay kag magapamulak;
subong sang rosa
2magapamulak ini sing bugana,
kag magakalipay gid nga may kasadya kag inamba.
Ang himaya sang Libano ihatag sa iya,
ang pagkahalangdon sang Carmelo kag Saron.
Makita nila ang himaya sang Ginoo,
ang pagkahalangdon sang Dios naton.
3Pabaskuga ninyo ang mga kamut nga maluya,
kag lig-ona ang mga tuhud nga nagakurug.#Heb. 12:12.
4Isiling sa mga mahadlukon sing tagiposoon,
“Magpakabakud, dili mahadluk!
Yari karon,
ang inyo Dios magakari nga may pagtimalus,
nga may balus sang Dios.
Sia magakari kag magaluwas sa inyo.”
5Niyan ang mga mata sang mga bulag pamuklaton,
kag ang mga idulungug sang mga bungul mabuksan;
6niyan ang piang magalumpat subong sang usa,
kag ang dila sang apa magaamba.#Mat. 11:5; Luc. 7:22.
Kay ang mga tubig magagowa sa kamingawan,
kag ang mga ilig sa desierto,
7ang nagaigpat nga balas manginlinaw,
kag ang kigas nga duta mga tuburan sang tubig;
sa puluy-an sang mga chacal diin sila nagaluko
manginhilamon nga may mga tabun-ak kag mga bagaas.
8Kag manginmay dakung dalan didto,
kag tawgon ini nga Alagyan sang Pagkabalaan;
ang dimatinlo indi makaagi sa sini, kondi ini manginsa manlalakat nga mga tawo,
kag ang mga buangbuang indi makadalang sa sini.
9Manginwalay leon didto,
ukon bisan anong sapat nga manunukub nga magataklad sa sini;
indi sila makita didto,
apang ang mga tinubus magalakat didto.
10Kag ang mga tinubus sang Ginoo magabalik,
kag magaabut nga may inamba sa Sion,
ang dayon nga kalipay manginsa ila mga olo;
magaagum sila sing kasadya kag kalipay,
kag ang kasubo kag ang panghayhay magapalagyo.
Currently Selected:
ISAIAS 35: ABHIL82
Highlight
Share
Compare
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
