ISAIAS 33
33
Ang Ginoo Magadala sing Kaluwasan
1Kailo sa imo nga nagapanglaglag,
nga wala ka malaglag;
ikaw nga nagaluib,
nga wala sila magluib sa imo!
Kon mag-untat ka sa paglaglag,
laglagon ka;
kag kon makatapus ka sa pagluib,
magaluib sila sa imo.
2O Ginoo, magmaayohon ka sa amon; naghulat kami sa imo.
Magmanginbutkon ka sa tagsa ka aga,
ang amon kaluwasan man sa tion sang kalisdanan.
3Sa kagahud sang kagubut ang mga katawohan nagapalagyo,
sa pagbayaw sang imo kaugalingon ang mga pungsud nagaalaplaag;
4kag ang inyo inagaw tiponon subong sang pagtipon sang atataro;
subong sang paglukso sang mga apan, magalukso ang mga tawo sa sini.
5Ang Ginoo ginapakataas, kay nagapuyo sia sa hitaas;
ginpuno niya ang Sion sing katarungan kag pagkamatarung;
6kag may kalig-onan sa imo mga tion,
kabuganaan sang kaluwasan, kaalam, kag ihibalo;
ang kahadluk sa Ginoo amo ang imo bahandi.
7Yari karon ang ila mga isganan nagasinggit sa gowa;
ang mga embajador sang paghidait nagahibi sing mapait.
8Ang dakung mga dalan mamingaw,
ang manlalakat nga tawo nag-untat.
Ang kaaway nagbungkag sang katipan,
hikayan niya ang kabanwaanan,
wala sia sing tawo nga ginapasulabi.
9Nagalalaw ang duta kag nagakag-as;
ang Libano nalibogan kag nagakalaya;
ang Saron kaangay sang desierto;
kag ang Basan kag ang Carmelo nagataktak sang ila mga dahon.
10“Karon magatindug ako,” nagasiling ang Ginoo, “karon magabayaw ako sang akon kaugalingon;
karon pakataason ako.
11Magapanamkon kamo sing labhang, magaanak kamo sing ginalaban;
ang inyo ginhawa amo ang kalayo nga magalamon sa inyo.
12Kag ang mga katawohan manginsubong sa mga pagsonog sang apog,
subong sang mga talongon nga ginatapas, kag ginasonog sa kalayo.”
13Pamati, kamo nga yara sa malayo, sang akon nahimo;
kag kamo nga malapit, kilalaha ang akon gahum.
14Ang mga makasasala sa Sion nahadluk;
ang pagkurug nagdakup sa mga walay Dios:
“Sin-o bala sa aton ang makapuyo sa nagalamon nga kalayo?
Sin-o bala sa aton ang makapuyo sa dayon nga mga pagdabdab?”
15Ang nagalakat sing matarung kag nagapamolong sing matadlong;
ang nagatamay sang daug sang mga pagpigus,
nga nagawaslik sang iya mga kamut nga indi magbaton sang hamham,
ang nagasungsung sang iya dulunggan nga indi magpamati sang dugo,
kag nagapiyong sang iya mga mata nga indi magtolok sa malaut.
16Sia magapuyo sa mataas;
ang iya duug sang pangapin amo ang mga pamakud sang mga igang;
ang iya kalan-on ihatag sa iya, ang iya mga tubig indi makulang.
17Ang imo mga mata makakita sa hari sa iya katahuman;
magatolok sila sa duta nga nagalambut sa malayo.
18Ang imo tagiposoon magapamalandong sa kakugmat:
“Diin bala ang nag-isip, diin bala ang nagtimbang sang buhis?
Diin bala ang nag-isip sang mga torre?”
19Indi ka makakita sang mabangis nga katawohan,
katawohan nga madalum sing hambal nga indi mo mahantupan,
sa dumuloong nga hambal nga indi mo mahangpan.
20Magtolok sa Sion, ang banwa sang aton mga piesta nga pinat-ud!
Ang imo mga mata makakita sang Jerusalem,
puluy-an nga malinong, layanglayang nga indi pagbungkagon,
nga ang iya mga palpal indi gid paggabuton,
kag ang bisan ano sang iya mga banting indi pagbugtoon.
21Apang didto ang Ginoo magaupud sa aton sa pagkaharianon,
duug sang masangkad nga mga suba kag mga ilig,
nga sa ila indi magsulud ang sakayan nga may mga gaud,
nga sa ila indi mag-agi ang maambong nga sakayan.
22Kay ang Ginoo aton hukom, ang Ginoo aton manughatag sing kasogoan,
ang Ginoo aton hari;
sia magaluwas sa aton.
23Ang imo mga banting nagtugak;
indi sila makapalig-on sang puno sang ila palo,
indi sila makapahumlad sang layag.
Niyan ginbahinbahin ang dakung inagaw;
bisan ang piang nagkuha sang inatihan.
24Kag ang pumuluyo indi magsiling, “Nagamasakit ako”;
ang katawohan nga nagapuyo sa iya patawaron sang ila kalautan.
Currently Selected:
ISAIAS 33: ABHIL82
Highlight
Share
Compare
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
