ISAIAS 32
32
Ang Matarung nga Hari
1Yari karon, ang isa ka hari magahari sa pagkamatarung,
kag ang mga principe magagahum sa katarungan.
2Ang isa ka tawo manginsubong sang palalipdan sa hangin,
palanagoan sa unus,
subong sang mga ilig sang tubig sa duug nga kigas,
subong sang landong sang daku nga igang sa duta nga makalalapyo.
3Niyan ang mga mata sang mga makakita indi magdulum,
kag ang mga idulungug sang mga nagapamati magatalupangud.
4Ang tagiposoon sang madalas magahangup sing ihibalo,
kag ang dila sang mga ang-ang mahanda sa pagpamolong sing maathag.
5Ang buangbuang indi na pagtawgon nga dungganon,
ukon ang malimbongon pagtawgon nga maalwan.
6Kay ang buangbuang magapamolong sing binuang,
kag ang iya tagiposoon magahikot sing kalautan:
sa paggawi sing mapasipalahon,
sa pagmitlang sing sayup batok sa Ginoo,
sa pagkuha sing sulud sang kalag sang mga gutum,
kag sa pagpakulang sang ilimnon sang ginauhaw.
7Ang mga galamiton sang malimbongon malaut;
sia nagapahito sing malaut nga mga kalalangan
sa paglaglag sang mga kubus sa mga polong nga binutig,
bisan kon ang nawad-an nagapamolong sing matarung.
8Apang ang mga dungganon nagapahito sing dungganon nga mga butang,
kag sia magapadayon sa mga butang nga dungganon.
Ang mga Babayi sa Jerusalem Ginpaandaman
9Tindug, kamo nga mga babayi nga matawhay, pamatii ang akon tingug;
kamo nga mga anak nga babayi nga mapatumbayaon, dungga ang akon hambal.
10Kay sa mga adlaw sa tapus ang isa ka tuig
gamohon kamo, kamo nga mapatumbayaon nga mga babayi;
kay ang ani sang uvas mapaslawan,
ang pagdamisag indi mag-abut.
11Magkurug, kamo nga mga babayi nga matawhay,
magkalisud, kamo nga mga mapatumbayaon;
uba kamo, kag maghublas kamo,
kag magtampion sing panapton nga sako sa inyo mga balikawang.
12Magapanampok sila sa dughan tungud sa mga latagon nga matahum,
tungud sa uvas nga mabungahon,
13sa duta sang akon katawohan
magatubo ang mga talongon kag mga sapinit;
hoo, sa ibabaw sang tanan nga balay sang kalipay
sa banwa nga malipayon.
14Kay ang palacio ginbayaan,
ang banwa nga madamu sing pumuluyo halinan;
ang bakolod kag ang torre nga balantayan
mga manginlungib sing dayon,
kalipay sang mga asno nga talonon,
halalban sang mga panong;
15tubtub nga ipasagahay sa aton ang Espiritu gikan sa hitaas,
kag ang kamingawan manginmabungahon nga latagon,
kag ang latagon nga mabungahon kabigon subong sang talon.
16Niyan ang katarungan magapuyo sa kamingawan,
kag ang pagkamatarung magapabilin sa latagon nga mabungahon.
17Kag ang binuhatan sang pagkamatarung manginpaghidait,
kag ang patubas sang katarungan, kalinong kag pagkalig-on nga dayon.
18Ang akon katawohan magapabilin sa puluy-an nga makidaiton,
sa mga puluy-an nga malig-on, kag sa mga palahuwayan nga malinong.
19Apang magaulan sing mga hielo nga daw bato sa pagpukan sang talon,
kag ang banwa paubson sing bug-os.
20Bulahan kamo nga nagasab-og sa luyo sang tanan nga tubig,
nga nagapalagaw sang baka kag sang asno.
Currently Selected:
ISAIAS 32: ABHIL82
Highlight
Share
Compare
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
