ISAIAS 31
31
Ang mga Egiptohanon mga Tawo, Indi Dios
1Kailo ang mga nagadulhog sa Egipto sa pagpabulig
kag nagasandig sa mga kabayo
nga nagasalig sa mga kangga bangud nga madamu sila
kag sa mga manugkabayo bangud nga makusug gid sila,
apang wala sila magtolok sa Balaan sang Israel
ukon nagapangita sa Ginoo!
2Apang sia man maalam kag magadala sing malaut,
indi magbawi sang iya mga polong,
kondi magatindug batok sa balay sang mga manughimo sing malaut,
kag batok sa pagbulig sang mga nagahikot sing kalautan.
3Ang mga Egiptohanon mga tawo, kag indi Dios;
kag ang ila mga kabayo unud, kag indi espiritu.
Kon untayon sang Ginoo ang iya kamut,
magakasandad ang nagabulig, kag mapukan ang ginabuligan,
kag sila tanan mapapas sing tingub.
4Kay amo ini ang ginasiling sang Ginoo sa akon,
subong sang leon kag bataon nga leon nga nagangurub sa ibabaw sang iya tinukub,
kon tawgon ang kadam-an sang mga manugbantay batok sa iya
indi malisang sa ila tingug
ukon magsapak sia sa kagahud nila,
sa amo ang Ginoo sang mga kasoldadosan magapanaug
sa pag-away sa ibabaw sang Bukid nga Sion kag sa iya bakolod.
5Subong sang kapispisan nga nagakayankayan, sa amo ang Ginoo sang mga kasoldadosan
magaapin sang Jerusalem;
apinan niya kag luwason ini,
magalapaw sia kag magatipig sini.
6Balik kamo sa iya nga ginabatoan ninyo sing tuduk, O mga anak sang Israel. 7Kay sa sadto nga adlaw ipilak sang tagsa ka tawo ang iya mga diosdios nga pilak kag ang iya mga diosdios nga bulawan, nga ginhimo sa inyo nga sala sang inyo kaugalingon nga mga kamut.
8“Kag mapukan ang Asiriahanon paagi sa espada, indi sa tawo;
kag ang espada, indi sa tawo, magalamon sa iya;
kag magapalagyo sia gikan sa espada,
kag ang iya mga pamatan-on nga lalaki manginsakup sa pagpangabudlay sa takay.
9Ang iya igang magataliwan bangud sang kakugmat,
kag ang iya mga principe malisang sa hayahay,”
nagasiling ang Ginoo, nga ang iya kalayo yara sa Sion,
kag ang iya horno sa Jerusalem.
Currently Selected:
ISAIAS 31: ABHIL82
Highlight
Share
Compare
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
