ISAIAS 27
27
Pagluwas kag Pagtipon sang Israel
1Sa sadtong adlaw ang Ginoo nga may iya nga espada nga matig-a kag daku kag mabakud magasilot sang leviatan#Job 41:1; Sal. 74:14; 104:26. nga man-ug nga madasig, kag sang leviatan nga man-ug nga tikotiko, kag patyon niya ang dragon nga yara sa dagat.
2Sa sadtong adlaw:
“Ulubasan sang alak, amba kamo sa sini!
3Ako, ang Ginoo, amo ang manugbantay sini;
bunyagan ko ini sa tagsa ka tion.
Basi nga may magsamad sini,
bantayan ko ini sa gab-i kag adlaw;
4wala sa akon ang kasingkal.
Kabay nga ang mga sapinit kag ang mga talongon batok sa akon sa inaway!
Tapakon ko sila,
sonogon ko sila sing tingub.
5Ukon kon indi magkaput sia sa akon kusug,
agud nga magpakighidait sia sa akon,
magpakighidait sia sa akon.”
6Sa palaabuton nga mga adlaw si Jacob magapanggamut,
ang Israel magapamulak kag magapanalingsing,
kag pun-on nila sing bunga ang kadaygan sang kalibutan.
7Ginpilas bala niya sila subong sang pagpilas niya sa mga nagpilas sa ila?
Ukon ginpatay bala sila sono sa pagpamatay sa mga ginpatay nila?
8Sa talaksan, sang ginapalakat mo sila sa malayo nagapakigsuay ka sa ila;
ginpahalin niya sila sang iya mamadlus nga huyup sa adlaw sang salatan.
9Busa paagi sini patawaron ang kalautan ni Jacob,
kag ini amo ang bug-os nga bunga sa pagkuha sang iya sala:
kon ginahimo niya ang tanan nga bato sang halaran
subong sang mga bato sang apog nga gindugmok,
agud nga indi na magtindug ang mga Asherim kag ang mga larawan nga adlaw.
10Kay ang banwa nga napamakuran mamingaw,
puluy-an nga tinalikdan kag binayaan, kaangay sang kamingawan;
didto magahalab ang tinday nga baka,
didto magaluko sia, kag magapapas sang iya mga sanga.
11Kon ang iya mga sanga malaya, balion sila;
magakari ang mga babayi kag tutdan sila sa kalayo.
Kay katawohan ini nga walay paghangup;
busa ang naghimo sa ila indi malooy sa ila,
ang naghuman sa ila indi mahamuut sa ila.
12Sa sadtong adlaw paspason sang Ginoo ang iya bunga kutub sa baha sang Suba tubtub sa Sapa sang Egipto, kag tiponon kamo sing tag-isaisa, O kamo nga katawohan sang Israel, 13kag sa sadto nga adlaw patunggon ang daku nga budyong, kag magaabut ang mga mawala sa duta sang Asiria kag ang mga sinikway sa duta sang Egipto kag magasimba sila sa Ginoo sa bukid nga balaan sa Jerusalem.
Currently Selected:
ISAIAS 27: ABHIL82
Highlight
Share
Compare
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
