ISAIAS 26
26
Ambahanon sang Pagsalig sa Pag-apin sang Ginoo
1Sa sadtong adlaw ining ambahanon ambahon sa duta sang Juda:
“May mabakud kita nga banwa;
ang kaluwasan ipat-ud niya
nga mga kuta kag mga pamakud.
2Buksi ninyo ang mga gawang,
agud nga ang pungsud nga matarung nga nagahuput sing pagtoo
makasulud.
3Ikaw magatipig sa iya sa himpit nga paghidait,
nga ang iya hunahuna natuhoy sa imo,
bangud nga nagasalig sia sa imo.
4Salig kamo sing dayon sa Ginoo,
kay ang Ginoong Dios
amo ang igang nga dayon.
5Kay ginpaubus niya
ang mga nagapuyo sa hitaas,
ang banwang mataas.
Ginapaubus niya ini, ginapaubus niya ini tubtub sa duta,
ginadala niya ini tubtub sa yab-ok.
6Ang tiil magatapak sini,
ang mga tiil sang mga makalolooy,
ang mga tikang sang mga nawad-an.”
7Ang dalanon sang matarung amo ang pagkatadlong;
ikaw nga matadlong nagatudlo sang banas sang matarung.
8Sa dalanon sang imo mga paghukom,
O Ginoo, naghulat kami sa imo;
sa imo ngalan nga handumanan
yara ang handum sang amon kalag.
9Sa akon kalag naghandum ako sa imo sa kagab-ihon,
sa akon espiritu sa sulud nakon pangitaon ko ikaw sing hanuut.
Kay kon ang imo mga paghukom yari sa duta,
ang mga pumuluyo sang kalibutan magatoon sing pagkamatarung.
10Ipakita ang kahamuut sa malauton,
apang indi sia magtoon sing pagkamatarung;
sa duta sang pagkatadlong magahimo sia sing masinalaypon
kag indi magtan-aw sang pagkahari sang Ginoo.
11O Ginoo, ang imo kamut ginabayaw,
apang wala sila makakita.
Pakitaa sila sang imo kakugi tungud sang katawohan,
kag mahuy-an.
Ang kalayo magalamon sang imo mga kasumpung.#Heb. 10:27.
12O Ginoo, magapatok ka sing paghidait tungud sa amon,
kay ikaw man naghimo sang tanan namon nga buluhaton tungud sa amon.
13O Ginoo nga amon Dios,
ang iban nga mga ginoo luwas sa imo nakagahum sa amon,
apang sa imo lamang magasambit kami sang imo ngalan.
14Mga patay sila, indi sila mabuhi;
mga patay sila, indi sila magbangon;
busa ginduaw mo kag ginlaglag sila
kag ginpanas mo ang tanan nilang handumanan.
15Gindugangan mo ang pungsud, O Ginoo,
gindugangan mo ang pungsud; ginhimaya ikaw;
ginpasangkad mo ang tanan nga ginsakpan sang duta.
16O Ginoo, sa kalisdanan ginduaw ka nila,
nag-ula sila sing pangamuyo
sang yara sa ila ang imo pagsilot.
17Kaangay sang babaying nagadala,
nga nagapalapit sa tion sang iya pag-anak,
kag nagauraroy sa iya mga kasakit,
nanginsubong kami sini sa imo atubangan, O Ginoo;
18nagadala kami, ginsakitan kami,
subong nga daw nag-anak kami sing hangin.
Wala kami makahimo sing bisan anong pagluwas sa duta,
kag ang mga pumuluyo sang kalibutan wala mapukan.
19Ang imo mga patay magakabuhi,
ang akon mga bangkay magabangon.
Pagmata kag mag-amba, kamo nga nagapuyo sa yab-ok!
Kay ang imo ton-og subong sang ton-og sang mga gamhon,
kag ang duta magaluad sang mga patay.
20Kari, katawohan ko, sulud ka sa imo mga hulut,
kag takpi ang imo mga ganhaan sa palibut mo;
panago ka sing malip-ot nga tion
tubtub nga magtaliwan ang kaalipungut.
21Kay yari karon, ang Ginoo nagagowa sa iya duug
sa pagsilot sang mga pumuluyo sang duta tungud sang ila kalautan,
ang duta man magapahayag sang iya dugo,
kag indi magtabon sang iya patay.
Currently Selected:
ISAIAS 26: ABHIL82
Highlight
Share
Compare
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
