ISAIAS 28
28
Pagtagudili sang Efraim
1Kailo sang purungpurung sang bugal sang mga palahobog sang Efraim,
kag sang nagakalaya nga bulak sang iya mahimayaon nga katahum,
nga yara sa olo sang mapatubason nga nalupyakan sang mga ginadaug sang alak!
2Yari karon, ang Ginoo may isa nga gamhanan kag makusug;
subong sang bagyo sang hielo nga daw bato, sang unus nga nagalaglag,
subong sang bagyo sang mabaskug nga mga tubig nga nagaawas,
ihaboy niya sang iya kamut sa duta sa idalum.
3Ang purungpurung sang bugal sang mga palahobog sang Efraim
tapakon;
4kag ang nagakalaya nga bulak sang iya mahimayaon nga katahum,
nga yara sa olo sang mapatubason nga nalupyakan,
manginsubong sang sa nahauna nga loto nga higos sa wala pa ang tingadlaw;
kon ang nagatolok sini makakita, ginakaon niya ini
sa gilayon nga yari ini sa iya kamut.
5Sa sadto nga adlaw ang Ginoo sang mga kasoldadosan manginpurungpurung sang himaya,
kag diadema sang katahum, sa nabilin sang iya katawohan;
6kag espiritu sang katarungan sa nagalingkod sa hukmanan,
kag kusug sa mga nagapaisul sang inaway sa gawang.
7Ini sila man nagatiyog nga may alak
kag nagadulingduling sa masingkal nga ilimnon;
ang sacerdote kag ang manalagna nagatiyog sa masingkal nga ilimnon,
nagalibog sila sa alak,
nagadulingduling sila sa masingkal nga ilimnon;
nagasayup sila sa palanan-awon,
nagakasandad sila sa paghukom.
8Kay ang tanan nga latok puno sang suka,
wala sing duug nga wala sing kahigkoan.
9“Sin-o bala ang tudloan niya sing ihibalo,
kag sin-o bala ang iya pahangpon sang balita?
Sila bala nga ginlutas sa gatas,
kag ginkuha sa mga soso?
10Kay ini amo ang pagsolondan sa pagsolondan, pagsolondan sa pagsolondan,
dinalan sa dinalan, dinalan sa dinalan,
diotay diri, diotay didto.”
11Indi, kondi sa mga bibig nga bikwalon
kag sa iban nga dila
magahambal ang Ginoo sa sini nga katawohan,
12sa ila sia nagsiling,
“Amo ini ang pahuway;
hatagi ninyo sing pahuway ang nalapyo;
kag ini amo ang paumpaw”;
apang indi sila magpamati.#1 Cor. 4:21.
13Busa ang polong sang Ginoo manginsa ila
pagsolondan sa pagsolondan, pagsolondan sa pagsolondan,
dinalan sa dinalan, dinalan sa dinalan,
diotay diri, diotay didto;
agud nga maglakat sila, kag matingkaya,
kag mabali, kag masiod, kag madakpan.
Paandam sa Jerusalem
14Busa magpamati sang polong sang Ginoo, kamo nga mga mayubiton,
nga nagadumala sini nga katawohan nga yara sa Jerusalem!
15Bangud nga nagsiling kamo, “Nagpakigkatipan kami sa kamatayon,
kag nagkasugot kami sang Sheol;
kon ang nagalapaw nga kalalat-an magligad
indi maglambut sa amon;
kay ginhimo namon nga dalangpan ang kabutigan,
kag nagpanago kami sa idalum sang pagkadimatuud”;
16busa amo ini ang ginasiling sang Ginoong Dios,
“Yari karon, nagabutang ako sa Sion nga sa sadsaran
sing bato, bato nga natilawan,
bilidhon nga pamag-ang, nga sadsaran nga malig-on:
‘Ang nagatoo indi magdali.’#Roma 9:33; 10:11; 1 Ped. 2:6.
17Kag himoon ko ang katarungan nga latid,
kag ang pagkamatarung nga tonton;
kag ang hielo nga daw bato magasilhig sang dalangpan sang kabutigan,
kag ang mga tubig magalapaw sa duug nga palanagoan.”
18Niyan ang inyo katipan sa kamatayon walaon,
kag ang inyo kasugtanan sa Sheol indi magpadayon;
kon ang nagalapaw nga kalalat-an mag-agi
ligson kamo sini.
19Sa masunsun nga mag-agi ini lambuton kamo;
kay magaagi ini agaaga,
sa adlaw kag sa gab-i;
kag wala sing liwan kondi kakugmat sa paghangup sang balita.
20Kay ang higdaan malip-ot pa sa mauntayan sang tawo,
kag ang habol makitid pa sa mapangalumbut niya sa iya.
21Kay ang Ginoo magatindug subong sang sa Bukid nga Perasim,#2 Sam. 5:20; 1 Cron. 14:11.
magasingkal sia subong sang sa nalupyakan sang Gabaon;#Jos. 10:10-12.
agud nga mahimo niya ang iya buluhaton—ang iya makatilingala nga buluhaton!
kag matigayon ang iya buhat—ang iya makatilingala nga buhat!
22Busa karon dili kamo magmayubiton,
agud nga indi pagbakuron ang inyo mga gapus;
kay nabatian ko ang mando sang kalaglagan
gikan sa Ginoong Dios sang mga kasoldadosan sa ibabaw sang bug-os nga duta.
23Dungga ninyo, kag pamatii ang akon tingug;
magpamati, kag pamatii ang akon hambal.
24Ang nagaarado sa pagpanggas nagaarado bala sing dalayon?
ginabungkag niya bala kag ginakaras ang iya duta sing dalayon?
25Kon matapan na niya ang kadaygan sini,
wala bala niya ginasab-ug ang maitum nga mga comino, kag ginasabwag ang comino,
kag ipanggas ang trigo sa mga idas
kag ang cebada sa iya duug nga napat-ud,
kag ang espelta sa iya kilid?
26Kay ang iya Dios nagatudlo sa iya sing matarung;
nagatudlo sia sa iya.
27Kay ang mga comino nga maitum wala ginalinas sang matalum nga inuglinas,
kag ang comino wala ginapaligis sa aliling sang karo;
kondi ang maitum nga mga comino ginapalpag sang sungkud,
kag ang comino sang bilogon.
28Ang uyas nga tinapay ginaligis bala?
Wala, wala niya ginalinas ini sing dalayon;
kon laptahon ini sang aliling sang iya karo
kag sang iya mga kabayo, wala sia nagaligis sini.
29Ini man nagagikan sa Ginoo sang mga kasoldadosan;
makatilingala sia sa laygay,
kag labaw sa kaalam.
Currently Selected:
ISAIAS 28: ABHIL82
Highlight
Share
Compare
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
