ISAIAS 25

Ambahanon sa Pagdayaw bangud sang Kahamuut sang Ginoo

1O Ginoo, ikaw ang akon Dios;

pakataason ko ikaw, dayawon ko ang imo ngalan;

kay naghimo ka sing makatilingalang mga butang,

ang mga laygay kutub sa dumaan, sa pagkatutum kag sa kamatooran.

2Kay ang banwa ginhimo mo nga tinumpok,

ang banwa nga may pamakud nga kagulub-an;

ang palacio sang mga dumuloong nga indi banwa,

indi na gid ini pagpatindugon.

3Busa ang katawohan nga mabakud magahimaya sa imo;

ang banwa sang makakulugmat nga mga pungsud magakahadluk sa imo.

4Kay ikaw nanginkabakuran sa makalolooy,

kabakuran sa nawad-an sa iya kasakitan,

dalangpan gikan sa unus kag handong sa kainit;

kon ang pusnga sang mga makakulugmat subong sang unus batok sa kuta,

5subong sang kainit sa duug nga kigas.

Palinongon mo ang kagahud sang mga dumuloong;

subong sang kainit paagi sa handong sang isa ka gal-um,

ang ambahanon sang mga makakulugmat paubson.

6Sa sining bukid ang Ginoo sang mga kasoldadosan magahimo sa tanan nga mga katawohan sing piesta sa matambok nga mga butang, piesta sa mga alak sa labud, sa matambok nga mga butang nga puno sing utuk sa tul-an, sa mga alak sa labud nga pinatin-aw sing maayo. 7Kag laglagon niya sa sining bukid ang nawung sang tabon nga nagatabon sang tanan nga mga katawohan, ang takurung nga nahumlad sa ibabaw sang tanan nga mga pungsud. 8Ginlamon niya sing dayon ang kamatayon,#1 Cor. 15:54. kag pahiran sang Ginoong Dios ang luha sang tanan nilang nawung,#Bug. 7:17; 21:4. kag ang kahuluy-an sang iya katawohan kuhaon niya sa bug-os nga duta; kay ang Ginoo nagpamolong sini.

9Kag isiling sa sadtong adlaw, “Yari karon, ini amo ang aton Dios; naghulat kita sa iya, kag sia magaluwas sa aton. Ini amo ang Ginoo; naghulat kita sa iya; magkalipay kita kag magkasadya sa iya kaluwasan.”

10Kay sa sining bukid ang kamut sang Ginoo magapahuway, kag ang Moab#Isa. 15:1–16:14; Jer. 48:1-47; Ezeq. 25:8-11; Amos 2:1-3; Sof. 2:8-11. tapakon sa iya duug, subong sang pagtapak sang dagami sa tubig sang tinumpok nga ipot. 11Kag magauntay sia sang iya kamut sa tunga niya subong sang isa nga nagauntay sang iya mga kamut sa paglangoy; apang ang Ginoo magapaubus sang iya bugal pati sang mga pahito sang iya mga kamut. 12Kag ang mataas nga pamakud sang imo mga kuta ginpukan niya, ginpaubus, kag gindala sa duta, bisan tubtub sa yab-ok.

Currently Selected:

ISAIAS 25: ABHIL82

Highlight

Compare

Copy