ISAIAS 24
24
Ang Paghukom sang Ginoo sa mga Pungsud
1Yari karon, ang Ginoo nagahublas sang duta kag nagawagwag sini,
kag nagabaliskad sini kag nagapaaplaag sang iya mga pumuluyo.
2Kag mahanabu, kon ano ang sa katawohan, amo sa sacerdote;
kon ano ang sa alagad, amo sa iya agalon;
kon ano ang sa sologoon nga babayi, amo sa iya agalon nga babayi;
kon ano ang sa manugbakal, amo sa manugbaligya;
kon ano ang sa manugpautang, amo sa nagautang;
kon ano ang sa manugpasaka, amo sa nagahatag sa iya sing saka.
3Ang duta hublasan sing bug-os kag wagwagon sing bug-os;
kay ang Ginoo nagpamolong sining polong.
4Ang duta nagalalaw kag nagakawala,
ang kalibutan nagakag-as kag nagakawala;
ang katawohan nga matinaastaason sang duta nagakag-as.
5Ang duta man ginadagtaan
sa idalum sang iya mga pumuluyo;
bangud nga ginlalis nila ang mga kasogoan,
ginlapas ang mga palatukuran,
ginbungkag ang katipan nga dayon.
6Busa ang pagpakamalaut naglamon sang duta,
kag ang mga nagapuyo sa iya nasapwan nga malinapason;
busa ang mga pumuluyo sang duta nasonog,
kag pila ka tawo ang nabilin.
7Ang bag-ong alak nagalalaw,
ang uvas nagakag-as,
ang tanan nga malipayon sa tagiposoon nagapanghayhay.
8Ang kasadya sang panderita nagauntat,
ang kagahud sang mga nagakasadya natapus,
ang kalipay sang arpa nagauntat.
9Indi sila mag-inum sing alak nga may inamba;
ang ilimnon nga masingkal manginmapait sa mga nagainum sini.
10Ang nawagwag nga banwa nalumpag,
ang tagsa ka balay ginatakpan agud nga walay tawo nga makasulud.
11May hinibi sa mga dalan bangud sang alak;
ang bug-os nga kalipay ginadulman;
ang kasadya sang duta nawala.
12Nabilin sa banwa ang kamingaw,
ang gawang nalaglag.
13Kay amo ini ang mahanabu sa tunga sang duta
sa mga katawohan,
subong sang pagpalaspas sang olivo,
subong sang mga pagpanaghaw kon tapus na ang patubas.
14Ini sila magabayaw sang ila tingug, magasinggit sila;
tungud sang pagkahari sang Ginoo
nagasinggit sila sing mabaskug kutub sa dagat.
15Busa himayaa ninyo ang Ginoo sa sidlangan;
ang ngalan sang Ginoo, ang Dios sang Israel, sa kapuloan sang dagat.
16Kutub sa naukbung gid nga bahin sang duta nakabati kami sing mga ambahanon,
sang himaya sa Matarung.
Apang nagsiling ako, “Nagakag-as ako,
nagakag-as ako. Kailo ako!
Ang mabudhion nagbudhi,
ang mabudhion nagbudhi sing tama.”
17Ang kahadluk, kag ang boho, kag ang siod
yara sa imo, O pumuluyo sang duta!
18Ang nagapalagyo sa kagahud sang kahadluk
maholog sa boho;
kag ang nagagowa sa kadadalman sang boho
madakpan sa siod.
Kay ang mga talambuan sa hitaas nabuksan,
kag ang mga sadsaran sang duta nagakurug.
19Ang duta nabuka sing bug-os,
ang duta napihak,
ang duta ginauyog sing mabaskug.
20Ang duta magadulingduling subong sang tawo nga hobog,
magakapukanpukan kaangay sang duyan;
ang paglalis sini manginmabug-at sa sini,
kag mapukan ini, kag indi na magbangon.
21Sa sadtong adlaw ang Ginoo magasilot sang kasoldadosan sang mga mataas, sa hitaas,
kag sang mga hari sang duta, sa duta.
22Tiponon sila sing tingub
subong sang mga binilanggo sa boho;
takpan sila sa bilanggoan,
kag duawon sila sa tapus ang madamung adlaw.
23Niyan ang bulan malibogan,
kag ang adlaw mahuy-an;
kay ang Ginoo sang mga kasoldadosan magahari
sa Bukid nga Sion kag sa Jerusalem
kag sa atubangan sang iya mga tigulang may himaya.
Currently Selected:
ISAIAS 24: ABHIL82
Highlight
Share
Compare
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
