ISAIAS 17
17
Ang Lulan sang Damasco
1Ang lulan sang Damasco.#Jer. 49:23-27; Amos 1:3-5; Zac. 9:1.
Yari karon, ang Damasco ginakuha sa pagkabanwa,
kag manginnalaglag nga tinumpok.
2Ang mga banwa sang Aroer ginabayaan;
mangin-iya sila sang mga panong,
nga magaluko, kag walay magapahadluk sa ila.
3Ang kuta makuha sa Efraim,
kag ang ginharian gikan sa Damasco;
kag ang salin sang Siria manginsubong
sang himaya sang mga anak sang Israel,
nagasiling ang Ginoo sang mga kasoldadosan.
Ang Paghukom sang Israel
4Kag sa sadtong adlaw,
ang himaya ni Jacob magabuhin,
kag maganiwang ang katambokon sang iya unud.
5Kag manginsubong ini sang manug-ani nga nagaani sang alanyon
kag ang iya butkon nagaani sang mga uhay,
kag manginsubong ini sang nagapanaghaw ang isa sang mga uhay
sa Nalupyakan sang Refaim.
6Apang may mabilin sa iya nga mga salaghawon,
subong sang pagpalaspas sang olivo—
duha ukon tatlo ka bilog
sa natuyoktuyokan nga sanga,
apat ukon lima
sa nagowa gid nga mga sanga sang kahoy nga mabungahon,
nagasiling ang Ginoong Dios sang Israel.
7Sa sadtong adlaw magatolok ang mga tawo sa ila Magbubuhat, kag ang ila mga mata magahangad sa Balaan sang Israel; 8indi sila magtolok sa mga halaran, ang buhat sang ila mga kamut, kag indi sila magsapak sa ginhimo sang ila mga tudlo, bisan sa Asherim ukon sa mga larawan nga adlaw.
9Sa sadtong adlaw ang ila mga banwa nga mabakud manginsubong sang binayaan nga mga duug sa kakahoyan kag sa putokputokan sang bukid, nga ginbayaan sa atubangan sang mga anak sang Israel, kag manginmamingaw ini.
10Kay nalimtan mo ang Dios sang imo kaluwasan,
kag wala magdumdum sang Igang sang imo kusug;
busa, bisan nagatanum ka sing mga tanum nga matahum
kag ginabutangan ini sing dumuloong nga mga sul-ip,
11sa adlaw sang imo pagtanum ginahabongan mo ini,
kag sa aga ginapabulak mo ang imo binhi;
apang ang ani nagapalagyo
sa adlaw sang kalisud kag sa walay aputan nga kasubo.
12Ah, ang kinagahud sang madamung mga katawohan,
nga nagahuganas kaangay sang paghuganas sang mga dagat!
Ah, ang pagdinaguso sang mga pungsud,
nga nagasagana kaangay sang pagsagana sang gamhanan nga mga tubig!
13Ang mga pungsud magadinaguso kaangay sang pagsagana sang madamung tubig,
apang sabdongon niya sila, kag magapalagyo sila sa malayo,
kag lagson subong sang sagbut sang kabukiran sa atubangan sang hangin
kag kaangay sang nagaalimpulus nga yab-ok sa atubangan sang unus.
14Sa kahaponon, yari karon, ang kakugmat!
Sa wala pa mag-aga, wala na sila!
Ini amo ang bahin sang mga nagaati sa aton,
kag ang kapalaran sang mga nagapangawat sa aton.
Currently Selected:
ISAIAS 17: ABHIL82
Highlight
Share
Compare
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
