ISAIAS 16

1Ipadala ninyo ang mga cordero

sa manuggahum sang duta,

kutub sa Sela, paagi sa kamingawan,

tubtub sa bukid sang babaying anak sang Sion.

2Subong sang mga pispis nga nagadalangdalang,

subong sang pugad nga nawas-ag,

amo ini ang babaying mga anak sang Moab

sa mga ubogan sang Arnon.

3“Hatag sing laygay,

himo sing katarungan;

himoa ang imo handong subong sang gab-i

sa tunga sang kaodtohon;

tagoa ang mga sinikway,

dili pagluibi ang mga laaslaas;

4magpuyo upud sa imo

ang mga sinikway sang Moab;

manginpalanagoan ka niya

gikan sa nawung sang manuglaglag.

Kon ang malupigon mawala,

kag ang kalaglagan mauntat,

kag ang mga manugpigus

ginapapas sa duta,

5niyan ang trono patindugon sa malig-on nga paghigugma

kag sa sini magalingkod sa kamatooran

sa layanglayang ni David

ang isa nga nagahukom kag nagapangita sing katarungan

kag madasig sa paghimo sing pagkamatarung.”

6Nakabati kami sang bugal sang Moab,

nga bugalon gid sia;

sang iya pagkamatinaastaason, sang iya bugal, kag sang iya kasingkal—

ang iya mga pagpabugal walay pulus.

7Busa ang Moab maghaya,

tungud sang Moab ang tagsatagsa magahaya.

Tungud sa mga pighol nga pasas sang Kir-hareseth,

magalalaw kamo, nga nalisdan sing bug-os.

8Kay ang mga latagon sang Hesbon nagakag-as,

kag ang uvas sang Sibma;

ang mga ginoo sang mga pungsud

nagbanggi sang pinili nga mga sanga sini,

nga naglambut tubtub sa Jazer

kag nagkalapkap tubtub sa kamingawan;

ang iya mga singil naglapnag

kag nagtabok sila sa dagat.

9Busa magahibi ako upud sa paghibi sang Jazer

tungud sa uvas sang Sibma;

bunyagan ko ikaw sang akon mga luha,

O Hesbon kag Eleale;

kay sa imo mga bunga sa tingadlaw kag sa imo ani

ang singgit sa inaway naholog.

10Kag ang kasadya nakuha kag ang kalipay

gikan sa latagon nga mabungahon;

kag sa mga ulubasan manginwalay pag-ambahan,

walay malipayon nga kagahud;

walay manuglinas nga magalinas sing mga alak sa mga linasan;

ginpauntat ko ang singgit sang patubas.

11Busa ang akon tagiposoon nagatonog kaangay sang arpa tungud sa Moab,

kag ang akon mga kasudlan tungud sa Kir-heres.

12Kag kon si Moab mag-atubang, kon lapyoon niya ang iya kaugalingon sa mataas nga duug, kag magkadto sa iya santuario sa pagpangamuyo, indi sia magdaug.

13Ini amo ang polong nga ginpamolong sang Ginoo nahanungud sa Moab sa tion nga nagligad. 14Apang karon ang Ginoo nagasiling, “Sa sulud sang tatlo ka tuig, subong sang mga tuig sang sinoholan, ang himaya sang Moab mangintalamayon, pati sang iya bug-os nga dakung kadam-an; kag ang salin magintama kadiotay kag manginwalay pulus.”

Currently Selected:

ISAIAS 16: ABHIL82

Highlight

Compare

Copy