ISAIAS 18
18
Ang Tagna nahanungud sa Etiopia
1Ah, ang duta sang nagakapakapa nga mga pakpak
nga yara sa tabok sang mga suba sang Etiopia;#Sof. 2:12.
2nga nagapadala sing mga embajador paagi sa Nilo,
sa mga sakayan nga papiro sa mga tubig!
Lakat, kamo nga madasig nga mga manugbalita,
sa pungsud, nga matag-as kag mahanip,
sa katawohan nga makakulugmat kutub sa ila kamunoan padayon,
pungsud nga nagapanakus kag nagapanapak,
nga ang ila duta ginabahinbahin sang mga suba.
3Kamo tanan nga pumuluyo sang kalibutan,
kamo nga nagapuyo sa duta,
kon ang hayahay mabayaw sa kabukiran, tan-awa ninyo!
Kon patonggon ang budyong, pamatii ninyo!
4Kay amo ini ang ginsiling sang Ginoo sa akon:
“Magapahimonong ako kag lantawon ko sa akon puluy-an
kaangay sang matin-aw nga kainit sa silak sang adlaw,
kaangay sang gal-um sang ton-og sa kainit sang ani.”
5Kay sa wala pa ang ani, sa pagkatapus sang pamulak,
kag ang bulak mangin-uvas nga nagakaluto,
utdon niya sang inughagbas nga mga sanggut ang mga singil,
kag kuhaon niya kag utdon ang mga sanga nga magapa.
6Ibilin sila sing tingub
sa kapispisan nga mananagit sang kabukiran,
kag sa kasapatan sang duta.
Kag ang mananagit nga kapispisan magapatingadlaw sa ila,
kag ang tanan nga kasapatan sang duta magapatigtulugnaw sa ila.
7Sa sadtong tion dalhon nga dolot sa Ginoo sang mga kasoldadosan
gikan sa katawohan nga matag-as kag mahanip,
gikan sa katawohan nga makakulugmat kutub sa ila kamunoan padayon,
pungsud nga nagapanakus kag nagapanapak,
nga ang ila duta ginabahinbahin sang mga suba,
pakadto sa duug sang ngalan sang Ginoo sang mga kasoldadosan, ang Bukid nga Sion.
Currently Selected:
ISAIAS 18: ABHIL82
Highlight
Share
Compare
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
