MGA BINUHATAN 27

Si Pablo Nagapanakayon pa Roma

1Kag sang gintapat nga magsakay kami pa Italia, gintugyan nila si Pablo kag pila sang iban pa nga mga binilanggo sa isa ka capitan nga ginhingalanan si Julio, sa Kabon ni Augusto. 2Kag sang nakasakay sa isa ka sakayan sang Adrumentina, nga manuglayag na padolong sa mga dulungkaan sa baybayon sang Asia, nagtaliwan kami, nga nagaupud sa amon si Aristarco, nga Macedoniahanon nga taga-Tesalonica. 3Sa adlaw nga madason nagdungka kami sa Sidon; kag ginkalooyan ni Julio si Pablo, kag gintugutan sa pagkadto sa iya mga abyan agud makabaton sia sang ila pag-alila. 4Kag sang nakataliwan gikan didto naglayag kami sa lipud sang Cipre, bangud nga ang mga hangin sumpung. 5Kag sang nakatabok kami sang dagat nga nalawud sang Cilicia kag Panfilia, nag-abut kami sa Mira sa Licia. 6Didto nakakita ang capitan sing sakayan sang Alejandria nga nagalayag pa Italia, kag ginpasakay niya kami sa sini. 7Mahinay ang amon paglayag sa madamung adlaw, kag halus makalambut sa tampad sang Gnido, kag sang wala magtugut sa amon ang hangin sa pagpadayon, naglayag kami sa lipud sang Creta sa tampad sang Salmo. 8Sang halus kami makapamaybay sa sini, nag-abut kami sa isa ka duug nga gintawag mga Matahum nga Dulungkaan, nga malapit didto ang banwa nga Lasea.

9Sang nakataliwan ang malawig nga tion, kag may katalagman na ang panakayon bangud nga nagtaliwan na ang puasa, si Pablo nagpaandam sa ila, 10nga nagasiling, “Mga ginoo, ginahantup ko nga ang panakayon manginmay kasamaran kag daku nga kadulaan, indi lamang sang lulan kag sang sakayan, kondi man sang aton mga kabuhi.” 11Apang ang capitan nagpamati sing labi pa sa nagadumala kag sa tag-iya sang sakayan sang sa ginpamolong ni Pablo. 12Kag bangud nga ang dulungkaan indi bagay nga duug sa tigtulugnaw, ang kalabanan naglaygay nga maglayag pa lawud gikan didto, basi nga makalambut sila sa Fenice, nga dulungkaan sa Creta, nga nagalantaw sa timugan kag sa salatanan, kag sa pagpanugnaw didto.

Ang Unus sa Kadagatan

13Kag sang nagkanaykanay ang habagat, sang ginabanta nila nga naagum ang ila tinutuyo, nagbatak sila sang sinipit kag naglayag sa obay sang Creta, malapit sa baybayon. 14Apang sa wala madugay nagtugpo halin sa takas ang mamadlus nga hangin, nga ginatawag nga timug; 15kag sang gindaldal ang sakayan kag indi makasumpung sa hangin, nagpasonod kami kag nagpapalis. 16Kag sang nagapadalagan kami sa lipud sang diotay nga pulo nga ginatawag nga Cauda, halus namon madaug ang bote; 17sang ginbatak nila ini, gindapatan nila sing mga tabang nga ginwagkusan nila ang sakayan; niyan, sang ginahadlukan sila basi kon idas-il sa Sirte, gintuntun nila ang mga layag, kag sa amo nagpapalis. 18Sanglit ginakuso kami sing sugung gid sang bagyo, sa adlaw nga madason nagsugud sila sa pagpanagbung sang mga lulan; 19kag sa ikatlo nga adlaw ginpamilak nila sang ila gid mga kamut ang mga galamiton sang sakayan. 20Kag sa walay adlaw ukon mga bitoon nga nagdilag sa madamung mga adlaw, kag nagapadayon ang mabaskug nga bagyo, ang tanan nga paglaum nga maluwas kami nadula na.

21Sang madugay na nga wala sila makakaon, niyan si Pablo nagtindug sa tunga nila kag nagsiling, “Mga ginoo, dapat kamo kuntani nagpamati sa akon, kag wala maglayag gikan sa Creta kag mag-agum sining kasamaran kag kadulaan. 22Karon nagalaygay ako sa inyo nga magkalipay kamo; kay walay kabuhi nga madula sa inyo, kondi lamang ang sakayan. 23Kay kagab-i nagtupad sa akon ang manugtunda sang Dios nga iya ako kag akon man ginasimba, 24kag sia nagsiling, ‘Dili ka mahadluk, Pablo; kinahanglan ka mag-atubang kay Cesar; kag yari karon, gintugyan sa imo sang Dios ang tanan nga nagapanakayon kaupud nimo.’ 25Gani, mga ginoo, magkalipay kamo, kay nagatoo ako sa Dios nga mangin-amo gid ini subong sang napamolong sa akon. 26Apang dapat kita isampay sa isa ka pulo.”

27Sang nag-abut ang ikanapulog apat ka gab-i, sang ginaanudanud kami sa dagat sang Adria, sa may tunga ang gab-i ang mga sakayanon nagbanta nga nagahinamput sila sa duta. 28Gani gintungkad nila kag nasapwan nga duha ka pulo ka dupa; sa nauluunhan gintungkad nila liwat kag nasapwan nga napulog lima ka dupa. 29Kag sang ginahadlukan kami basi kon ibunggo sa mga takot, ginholog nila ang apat ka sinipit sa olin, kag ginpangamuyo nga mag-aga. 30Kag sang nagtinguha ang mga sakayanon sa pagpalagyo gikan sa sakayan, kag nakatonton sang bote sa dagat, nga daw buut magholog sila sing mga sinipit sa dolong, 31si Pablo nagsiling sa capitan kag sa mga soldado, “Kon indi ini sila magpabilin sa sakayan, indi kamo maluwas.” 32Niyan gin-utud sang mga soldado ang mga kalat sang bote, kag pinabayaan nila nga maholog ini.

33Sa nagapamanagbanag na, si Pablo nagpakilooy sa ila tanan nga magkaon sila, nga nagasiling, “Karon amo ang ikanapulog apat nga adlaw nga nagahulat kamo kag nagapadayon nga nagapuasa, nga walay bisan ano nga nakaon. 34Busa ginapakilooy ko sa inyo nga magkaon kamo; kay ini sa kaayohan ninyo, kay walay bohok nga madula sa olo sang bisan sin-o sa inyo.” 35Kag sang nakasiling sia sini, nagkuha sia sing tinapay, kag sang nagapasalamat sia sa Dios sa atubangan sang tanan gintipiktipik niya ini kag nagsugud sia sa pagkaon. 36Niyan nagkalipay sila tanan kag nagkaon man sila. 37(Kami tanan sa sakayan duha ka gatus kag kapitoan kag anum ka kalag.) 38Kag sang nabusug sila, ginpamag-anan nila ang sakayan, nga ginapanagbung ang trigo sa dagat.

Ang Pagkalunud

39Karon sang adlaw na, wala nila makilala ang duta, apang natatapan nila ang isa ka luuk nga may baybayon, nga ang amo ginhambalan nila kon makapadungka sila sang sakayan didto. 40Gani ginbuhian nila ang mga sinipit kag ginbayaan nila ini sa dagat, kag ginhubad man nila ang mga higot sang mga bansalan; niyan sang ginbatak nila ang layag sa dolong sa hangin nagpadolong sila sa baybayon. 41Apang sang naigoan nila ang ginkitaan sang duha ka dagat napasunggo nila ang sakayan; ang dolong nagdulut kag indi na mationg, kag ang olin nagsugud pagkawagwag bangud sang kabaskug sang mga balud. 42Ang buko sang mga soldado amo nga pamatyon ang mga binilanggo, basi kon may maglangoy sa ila kag magpalagyo; 43apang ang capitan, nga buut magluwas kay Pablo, nagpugong sa ila sa tinutuyo nila. Nagsogo sia nga ang makalangoy magsugbo kag mag-una sa duta, 44kag ang iban sa tapi ukon sa mga bahin gikan sa sakayan. Kag sa amo nga bagay naluwas sila tanan nga nakatakas sa duta.

Currently Selected:

MGA BINUHATAN 27: ABHIL82

Highlight

Copy