MGA BINUHATAN 26

Ang Pangapin ni Pablo sa atubangan ni Agripa

1Si Agripa nagsiling kay Pablo, “Ginatugut sa imo ang pagpamolong nahanungud sa imo kaugalingon.” Niyan gin-untay ni Pablo ang iya kamut kag naghimo sang iya pangapin:

2“Ginakabig ko ang akon kaugalingon nga malipayon, Haring Agripa, nga magahimo ako sang akon pangapin sa imo atubangan karon nga adlaw batok sa tanan nga sumbung sang mga Judio, 3labi na gid bangud nga ikaw sampaton sa tanan nga kinabatasan kag kasuayon sang mga Judio; busa ginapakilooy ko sa imo nga pamatian mo ako sing mapailubon.

Ang Kabuhi ni Pablo Sadto Anay subong nga Fariseo

4“Ang akon pagginawi kutub sang pagkapamatan-on ko, kutub sa ginsuguran sa tunga sang akon kaugalingon nga pungsud kag sa Jerusalem, nahibaloan sang tanan nga Judio. 5Nakakilala sila sa akon kutub sa ginsuguran, kon buut sila magsaksi, nga sono sa labing maid-id nga bunghay sang amon pagtoloohan nagkabuhi ako nga Fariseo.#Binu. 23:6; Filip. 3:5. 6Kag karon nagatindug ako diri nga hukman tungud sang paglaum sa saad nga ginhimo sang Dios sa amon mga ginikanan, 7sa amo nga saad ang amon napulog duha ka kabikahan nga nagalaum sa pagdangat, subong nga nagasimba sila sing hanoot sa adlaw kag gab-i. Kag nahanungud sining paglaum ginasumbung ako sang mga Judio, O hari! 8Ngaa bala nga indi ninyo mapatihan nga ang Dios nagabanhaw sang mga patay?

Ang Paghingabut ni Pablo sang mga Cristohanon

(Binu. 8:1-3)

9“Sa akon kaugalingon naghunahuna ako nga dapat ako maghimo sing madamung butang batok sa ngalan ni Jesus nga Nazaretnon. 10Kag ini ginhimo ko man sa Jerusalem; indi lamang gintakpan ko sa mga bilanggoan ang madamu sang mga balaan, paagi sa pagbulut-an gikan sa puno nga mga sacerdote, kondi sang ginpamatay sila ginhatag ko ang akon panangdo batok sa ila. 11Kag ginsilotan ko sila sing masunsun sa tanan nga sinagoga kag ginpilit ko sila sa pagpasipala; kag sa kasingkal nga lakas batok sa ila, ginhingabut ko sila bisan tubtub sa mga banwa sa iban nga duta.

Ang Pagliso ni Pablo

(Binu. 9:1-19; 22:6-16)

12“Sa sining buluhaton nagpakadto ako sa Damasco nga may pagbulut-an kag pagpanulin sang puno nga mga sacerdote. 13Sa odtong adlaw, O hari, nakita ko sa dalanon ang kapawa gikan sa langit, nga labi pa kasanag sa adlaw, nga nagasilak palibut sa akon kag sa mga nagaupud sa akon. 14Kag sang napukan kami tanan sa duta, nakabati ako sing tingug nga nagasiling sa akon sa hambal nga Hebreo, ‘Saulo, Saulo, ngaa bala ginahingabut mo ako? Maiwat sa imo nga tindakan mo ang mga suntok.’ 15Kag nagsiling ako, ‘Sin-o bala ikaw, Ginoo?’ Kag ang Ginoo nagsabat, ‘Ako si Jesus nga ginahingabut mo. 16Apang bangon ka kag magtindug; kay sa sining katuyoan nagpakita ako sa imo, sa pagtangdo sa imo nga manug-alagad kag manugsaksi sang mga butang nga nakita mo ako kag sa mga butang diin magapahayag ako sa imo, 17nga nagaluwas sa imo sa katawohan kag sa mga Gentil—nga ginapadalhan ko sa imo 18sa pagpamuklat sang ila mga mata, agud nga magliso sila gikan sa kadudulman pa kapawa kag gikan sa gahum ni Satanas pa Dios, agud nga mabaton nila ang kapatawaran sa mga sala kag ang panublion sa tunga sang mga ginpakabalaan paagi sa pagtoo sa akon.’

Pagkamatinumanon sa Langitnon nga Palanan-awon

19“Gani, O Haring Agripa, wala ako magmalalison sa langitnon nga palanan-awon, 20kondi nag-asoy ako sing una sa mga taga-Damasco,#Binu. 9:20. niyan sa Jerusalem#Binu. 9:28-29. kag sa bug-os nga duta sang Judea, kag sa mga Gentil man, nga maghinulsul sila kag magliso sa Dios kag maghimo sang mga buhat nga takus sa paghinulsul. 21Sa sining kabangdanan gindakup ako sang mga Judio sa templo kag ginhimulatan nga patyon ako. 22Tubtub sining adlaw nakaagum ako sang pagbulig nga gikan sa Dios, kag gani nagatindug ako diri nga nagapanaksi sa kagamayan kag sa kadalagkuan, nga wala ako sing ginasiling bisan ano kondi ang ginsiling sang mga manalagna kag ni Moises nga mahanabu: 23nga ang Cristo kinahanglan mag-antus, kag nga, subong nga nahauna mabanhaw kag magbantala sia sang kapawa sa katawohan kag sa mga Gentil.#Isa. 42:6; 49:6.”

Si Pablo Nagapakilooy kay Agripa nga Magtoo Sia

24Kag sang nagahimo sia sang iya pangapin, si Festo nagsiling sa mabaskug nga tingug, “Nagabuang ka, Pablo; ang tama mo nga tinon-an nagapabuang sa imo.” 25Apang si Pablo nagsiling, “Indi ako buang, labing halangdon nga Festo, kondi nagahambal sing maligdong sang kamatooran. 26Kay ang hari nakahibalo sining mga butang, kag sa iya nagapamolong ako sing hilway; kay nakatalupangud ako nga walay bisan ano sining mga butang nga nalipdan sa iya, kay wala ini mahimo sa tago. 27Haring Agripa, nagatoo ka bala sa mga manalagna? Nakahibalo ako nga nagatoo ikaw.” 28Kag si Agripa nagsiling kay Pablo, “Sa diotay nga tion himoon mo ako nga Cristohanon!” 29Kag si Pablo nagsiling, “Ginapangabay ko sa Dios nga, kon sa diotay ukon sa daku, indi lamang ikaw kondi man ang tanan nga nagapamati sa akon sining adlaw manginsubong sa akon—luwas sining mga gapus.”

30Niyan ang hari nagtindug, kag ang pangolo-puud kag si Bernice kag ang mga naglingkod kaupud nila; 31kag sang nakagowa sila, naghambalanay sila, “Ining tawo walay ginahimo nga takus sa kamatayon ukon bilanggoan.” 32Kag si Agripa nagsiling kay Festo, “Ining tawo mabuhian kuntani kon wala sia magdangup kay Cesar.”

Currently Selected:

MGA BINUHATAN 26: ABHIL82

Highlight

Copy