MGA BINUHATAN 28

Si Pablo sa Pulo sang Malta

1Sang naluwas kami, niyan nakilala namon nga ang pulo gintawag Malta. 2Kag gin-amuma kami sang tumandok nga mga pumuluyo sa pinasahi nga kalolo, kay nagdabok sila kag ginbaton nila kami tanan, bangud sang ulan nga nagatupa kag sang tugnaw. 3Nakatipon si Pablo sing hugpong sang mga inuggatung kag nadap-ung ini sa dabok, sang nag-ulway ang man-ug nga dalitan bangud sang kainit kag nag-ungut sa iya kamut. 4Sang nakita sang mga tumandok ang sapat nga nagakabit sa iya kamut, nagsinilingay sila, “Sa walay duhaduha ining tawo mamumuno. Bisan nakapalagyo sia sa dagat, indi magtugut ang katarungan nga mabuhi sia.” 5Walay sapayan ginwaslik niya ang sapat sa kalayo kag wala sia maano. 6Naghulat sila nga magpalanghubag sia ukon mapukan nga patay sa hinali; apang sang nadugay ang ila nga paghulat kag nakita nila nga walay bisan ano nga kalainan nga nahanabu sa iya, ginbaylohan nila ang ila mga hunahuna kag nagsiling nga sia isa ka dios.

7Karon sa palibut sa sadtong duug may mga palangumhan sang puno sang pulo, nga ginhingalanan si Publio, nga nagbaton sa amon kag ginpadayon kami sing tatlo ka adlaw sing maabiabihon gid. 8Nahanabu nga ang amay ni Publio ginahilanat kag ginabalaud; kag nagduaw si Pablo sa iya kag nagpangamuyo, kag sang natakdungan sia sang iya mga kamut gin-ayo sia. 9Kag sang nahimo ini, ang iban man nga may mga masakit sa pulo nagkara kag gin-ayo. 10Sila man nagpadungug sa amon sing madamu nga dolot; kag sang paglayag namon, ginlulan nila sa sakayan ang amon mga kinahanglan.

Si Pablo Nagaabut sa Roma

11Sa tapus ang tatlo ka bulan naglayag kami sa sakayan sang Alejandria nga nagpabilin sa pulo tubtub natapus ang tigtulugnaw, nga ang tanda sang sakayan ang Kapid nga mga Lalaki. 12Sang pagdungka sa Siracusa, nagpabilin kami didto sing tatlo ka adlaw. 13Kag gikan didto naglibut kami kag nag-abut sa Regio; kag sa tapus ang isa ka adlaw naghuyup ang habagat, kag sa ikaduha nga adlaw nagsamput kami sa Puteoli. 14Didto nakakita kami sing mga kauturan, kag nag-agda sila sa amon sa pagpabilin sa ila sing pito ka adlaw. Kag sa amo nag-abut kami sa Roma. 15Kag ang mga kauturan didto, sang pagkabati nila nahanungud sa amon, nagsugat sa amon tubtub sa Foro ni Appio kag sa Tres Tavernas. Sang nakita sila ni Pablo nagpasalamat sia sa Dios kag nagpakaisug. 16Kag sang pag-abut namon sa Roma, si Pablo gintugutan sa pagpuyo sing kinaugalingon, upud sa soldado nga nagabantay sa iya.

Si Pablo Nagawali sa Roma

17Sa tapus ang tatlo ka adlaw gintawag niya sing tingub ang mga puno sang mga Judio didto; kag sang nagtipon sila, nagsiling sia sa ila, “Ako, mga kauturan, bisan walay nahimo batok sa katawohan ukon sa mga batasan sang aton mga ginikanan, walay sapayan gintugyan ako nga binilanggo gikan sa Jerusalem sa mga kamut sang mga Romanhon. 18Sang nausisa nila ako, buut sila magbuhi sa akon, bangud nga wala sa akon sing kabangdanan sa kamatayon. 19Apang sang nagpamolong ang mga Judio batok sini, napilitan ako sa pagdangup kay Cesar#Binu. 25:11.—indi nga may isumbung ako batok sa akon pungsud. 20Busa sa sining kabangdanan ginpatawag ko kamo sa pagpakigkita kag sa pagpakighambal sa inyo, kay bangud sa paglaum sang Israel nagapus ako sining talikala.” 21Kag nagsiling sila sa iya, “Wala kami sing nabaton nga mga sulat nahanungud sa imo gikan sa Judea, ukon may nagkari diri sang mga kauturan kag nagpanugid ukon nagpamolong nga may kalainan sa imo. 22Apang luyag kami mamati sa imo sang imo ginahunahuna; kay nahanungud sining bunghay nahibaloan namon nga bisan diin ginapakamalain ini.”

23Sang nakapat-in sila sing adlaw sa iya, madamu sila nga nag-abut sa iya dalayonan. Kag sa ila nagtalastas sia, nga nagapanaksi nahanungud sa ginharian sang Dios kag nagabuyok sa ila nahanungud kay Jesus gikan sa kasogoan ni Moises kag sa mga manalagna, kutub sa aga tubtub sa gab-i. 24Kag ang iban nagtoo sang iya ginpamolong, kag ang iban wala magtoo. 25Gani, sang wala sila magkalasugut, nagtaliwan sila sang nakahambal si Pablo sang polong: “Igo gid ang ginpamolong sang Espiritu Santo sa inyo mga ginikanan paagi kay Isaias nga manalagna:

26‘Kadto ka sa sining katawohan, kag magsiling,

Makabati gid kamo apang indi nga mas-a makahangup,

kag makakita gid kamo apang indi nga mas-a makahantup.

27Kay ang tagiposoon sining katawohan ginkibulan,

kag ang ila mga idulungug halus makabati,

kag ginpiyong nila ang ila mga mata;

basi makakita sila sa ila mga mata,

kag makabati sa ila mga idulungug,

kag makahantup sa ila tagiposoon,

kag magliso nga sa akon kag ayohon ko sila.#Isa. 6:9-10.’

28Niyan kilalaha ninyo nga ining kaluwasan sang Dios ginpadala sa mga Gentil; sila magapamati man.” [29Kag sang nakasiling sia sining mga polong, nagtaliwan ang mga Judio, nga may daku nga pagbinaisay.]

30Kag nagpuyo sia sa bug-os nga duha ka tuig sa puluy-an nga iya gin-alquilahan, kag nagbaton sang tanan nga nagdu-aw sa iya, 31nga nagawali sang ginharian sang Dios kag nagapanudlo nahanungud kay Ginoong Jesu-Cristo sa bug-os nga kasidla kag walay nagaupang sa iya.

Currently Selected:

MGA BINUHATAN 28: ABHIL82

Highlight

Copy