2 SAMUEL 20
20
Ang Pagribuk ni Seba
1Karon didto may tawong hurushurus nga ginhingalanan Seba, ang anak ni Bicri, nga Benjaminhon; kag nagpatonog sia sang budyong, kag nagsiling,
“Wala kita sing bahin kay David,
kag wala kita panublion sa anak ni Jesse;
ang tagsa ka lalaki sa iya mga layanglayang, O Israel!”#1 Hari 12:16; 2 Cron. 10:16.
2Gani nagtaklad gikan sa pagsonod kay David ang tanan nga lalaki sang Israel, kag nagsonod kay Seba nga anak ni Bicri; apang ang mga tawo sang Juda nagbuylog sa ila hari kutub sa Jordan tubtub sa Jerusalem.
3Kag nag-abut si David sa iya balay sa Jerusalem; kag ginkuha sang hari ang napulo niya ka babayi#2 Sam. 16:22. nga ginbilin niya sa pagbantay sang balay, kag ginpabantayan sila, kag ginsakdag sila, apang wala na maghiusa sa ila. Gani gintakpan sila tubtub sa adlaw sang ila kamatayon, nga nagakabuhi sa pagkabalo.
4Niyan nagsiling ang hari kay Amasa, “Ilawag ako sing tingub sa mga tawo sang Juda sa sulud sang tatlo ka adlaw, kag magtambong ka diri.” 5Gani naglakat si Amasa sa pagpatipon sing tingub sang mga tawo sang Juda; apang nagdugay sia sing kapin sa tion nga ginpat-ud niya sa iya. 6Kag si David nagsiling kay Abisai, “Karon si Seba nga anak ni Bicri magahimo sa aton sing labi pa nga kalainan sang ginhimo ni Absalom; kuha ka sang mga alagad sang imo ginoo kag lagsa sia, basi pa nga makaabut sia sa mga banwa nga napamakuran, kag makapalagyo gikan sa aton itololok.” 7Kag may naggowa sa olihi niya nga mga tawo ni Joab, kag ang mga Keretnon kag ang mga Peletnon, kag ang tanan nga gamhanan nga lalaki; naggowa sila sa Jerusalem sa paglagas kay Seba nga anak ni Bicri. 8Sang didto sila sa luyo sang daku nga bato nga yara sa Gabaon, si Amasa nag-abut sa pasugata sa ila. Karon si Joab nagtampion sang iya panapton sa inaway nga nasuklub niya, kag sa sini may wagkus nga may espada nga natagub nga natakud sa iya balikawang, kag sang paggowa niya naholog ini. 9Kag si Joab nagsiling kay Amasa, “Maayo ka bala, utud ko?” Kag gindakup ni Joab si Amasa sa bungut sang iya kamut nga too sa paghaluk sa iya. 10Apang si Amasa wala magsapak sang espada nga yara sa kamut ni Joab; gani ginlabo sia ni Joab sini sa lawas, kag nagwagay ang iya mga kasudlan sa duta, kag wala na sia paglab-a liwat; kag napatay si Amasa.
Niyan si Joab kag ang iya utud nga si Abisai naglagas kay Seba nga anak ni Bicri. 11Kag didto may nagtindug sa luyo niya nga isa sang mga pamatan-on ni Joab, kag nagsiling, “Ang nakauyon kay Joab, kag kay David, magsonod sia kay Joab.” 12Kag si Amasa nagtubog sa iya kaugalingon nga dugo sa tunga sang dalan. Kag sang nakita sang tawo nga ang tanan nga tawo nagdolog, ginuyud niya si Amasa pagowa sa dalan pakadto sa latagon, kag gintabunan sia sing panapton, sang nakita niya nga ang tagsatagsa nga naglabay sa luyo niya nagdolog. 13Sang nakuha sia sa dalan, ang tanan nga tawo nagsonod kay Joab sa paglagas kay Seba nga anak ni Bicri.
14Kag ginlatas niya ang tanan nga kabikahan sang Israel tubtub sa Abel, kag sa Bet-maaca; kag ang tanan nga Berhanon nagtipon sila sing tingub, kag nagsonod man sa iya. 15Kag nag-abut sila kag ginlikupan sia sa Abel sang Bet-maaca; naghimo sila sing bungyud batok sa banwa, kag nagsandig ini batok sa kuta; kag ang bug-os nga katawohan upud kay Joab nagbungkal sang kuta, sa pagpukan sini. 16Niyan ang babayi nga maalamon nagsinggit gikan sa banwa, “Pamati! pamati! Isiling ninyo kay Joab, ‘Magpalapit ka diri, agud nga ako makapamolong sa imo.’” 17Kag sia nagpalapit sa iya; kag nagsiling ang babayi, “Ikaw bala si Joab?” Sia nagsabat, “Amo ako.” Niyan nagsiling sia sa iya, “Pamatii ang mga polong sang imo ulipon nga babayi.” Kag sia nagsabat, “Nagapamati ako.” 18Niyan nagpamolong sia, “Naanad sila sa pagpamolong sa dumaan nga tion, ‘Magapangayo sila sing laygay sa Abel’; kag sa amo gintapus nila ang butang. 19Ako isa sang mga makidaiton kag matutum sa Israel; ikaw nagahimulat sa paglaglag sing isa ka banwa kag isa ka iloy sa Israel; ngaa bala halunhonon mo ang panublion sang Ginoo?” 20Si Joab nagsabat, “Malayo ini, malayo ini sa akon, nga ako maghalunhon ukon maglaglag! 21Ang butang indi subong. Kondi ang isa ka tawo gikan sa kabakoloran sang Efraim, nga ginhingalanan Seba nga anak ni Bicri, nagbayaw sang iya kamut batok kay Hari David; itugyan lamang sia, kag magahalin ako sa banwa.” Kag ang babayi nagsiling kay Joab, “Yari karon, ang iya olo ihaboy sa imo kutub sa kuta.” 22Niyan ang babayi nagkadto sa bug-os nga katawohan sa iya kaalam. Kag ginpunggol nila ang olo ni Seba nga anak ni Bicri, kag ginhaboy ini kay Joab. Gani sia nagpatonog sang budyong, kag nag-alaplaag sila gikan sa banwa, ang tagsa ka tawo pakadto sa iya layanglayang. Kag si Joab nagbalik sa hari sa Jerusalem.
Ang mga Pangolo ni David
(2 Sam. 8:15-18; 1 Cron. 18:14-17)
23Karon si Joab pangolo sa bug-os nga kasoldadosan sang Israel; kag si Benaya nga anak ni Joiada sa ibabaw sang mga Keretnon kag sang mga Peletnon; 24kag si Adoram sa ibabaw sang mga lalaki nga nagapangabudlay sa takay; kag si Josafat nga anak ni Ahilud amo ang manugsulat sang maragtas; 25kag si Seba ang escriba; kag si Sadoc kag si Abiatar ang mga sacerdote; 26kag si Ira man nga Jairnon sacerdote ni David.
Currently Selected:
2 SAMUEL 20: ABHIL82
Highlight
Share
Compare
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
