2 SAMUEL 21
21
Ang Pagtimalus sang mga Gabaonhon
1Karon sa mga adlaw ni David may gutum nga tatlo ka tuig, sa tuigtuig; kag si David nagpangita sang nawung sang Ginoo. Kag ang Ginoo nagsiling, “Ini tungud kay Saul kag tungud sa iya balay nga dugoon, bangud nga ginpatay niya ang mga Gabaonhon.” 2Gani ginpatawag sang hari ang mga Gabaonhon. Karon ang mga Gabaonhon indi katawohan sang Israel, kondi gikan sa salin sang mga Amornon; bisan ang katawohan sang Israel nagsumpa sa pagpasaylo sa ila,#Jos. 9:3-15. si Saul nagtinguha sa pagpatay sa ila sa iya kakugi tungud sa katawohan sang Israel kag sang Juda. 3Kag nagsiling si David sa mga Gabaonhon, “Ano bala ang himoon ko bangud sa inyo? Kag sa ano nga magahimo ako sang katumbasan, agud nga mapakamaayo ninyo ang panublion sang Ginoo?” 4Ang mga Gabaonhon nagsiling sa iya, “Indi ini butang sang pilak ukon bulawan sa tunga naton kag ni Saul ukon sang iya balay; kag indi aton ang pagpatay sa bisan sin-o nga tawo sa Israel.” Kag sia nagsiling, “Kon ano ang inyo isiling ina himoon ko tungud sa inyo.” 5Sila nagsiling sa hari, “Ang tawo nga nagpapas sa amon kag nagpadugi batok sa amon, nga laglagon kami gikan sa pagpabilin sa bisan diin nga ginsakpan sang Israel, 6itugyan sa amon ang pito ka lalaki sang iya mga anak, kag bitayon namon sila nga sa Ginoo sa Gabaa ni Saul ang pinili sang Ginoo.” Kag ang hari nagsiling, “Ihatag ko sila.”
7Apang ginpaiway sang hari si Mefiboset, ang anak ni Jonatan nga anak ni Saul, bangud sang sumpa sang Ginoo nga yara sa tunga nila, sa tunga ni David kag ni Jonatan nga anak ni Saul.#1 Sam. 20:15-17; 2 Sam. 9:1-7. 8Nagkuha ang hari sang duha ka lalaki nga anak ni Rizpa nga babayi nga anak ni Aya, nga gin-anak niya kay Saul, si Armoni kag si Mefiboset; kag ang lima ka lalaki nga mga anak ni Merab#1 Sam. 18:19. nga babayi nga anak ni Saul, nga gin-anak niya kay Adriel nga lalaki nga anak ni Barsilai nga Meholatnon; 9kag gintugyan sila sa mga kamut sang mga Gabaonhon, kag ginbitay sila nila sa bukid sa atubang sang Ginoo, kag napukan sila nga pito sing tingub. Ginpatay sila sa mga adlaw sang ani, sa nahauna nga mga adlaw sa pamuno sang ani sang sebada.
10Niyan si Rizpa nga anak nga babayi ni Aya nagkuha sing sako nga panapton, kag ginhumlad ini nga sa iya sa ibabaw sang igang, kutub sa pamuno sang ani tubtub nga nag-ulan sa ibabaw nila sing tubig gikan sa langit; kag wala sia magtugut sa mga pispis sang langit nga maghapon sa ila sa adlaw, ukon sa mga sapat sang latagon sa kagab-ihon. 11Sang ginsugid kay David ang ginhimo ni Rizpa nga anak nga babayi ni Aya, ang babayi ni Saul, 12si David nagkadto kag nagkuha sang mga tul-an ni Saul kag sang mga tul-an ni Jonatan nga iya anak gikan sa mga lalaki sang Jabes-galaad, nga nagkawat sa ila sa dalan sang Bet-san, diin ginbitay sila sang mga Filistinhon, sa adlaw nga ginpatay sang mga Filistinhon si Saul sa Gilboa;#1 Sam. 31:8-13. 13kag ginpadala niya gikan didto ang mga tul-an ni Saul kag ang mga tul-an ni Jonatan nga iya anak; kag gintipon nila ang mga tul-an sang mga ginbitay. 14Kag ginlubung nila ang mga tul-an ni Saul kag ni Jonatan nga iya anak sa duta sang Benjamin sa Zela, sa lulubngan ni Cis nga iya amay; kag ginhimo nila ang tanan nga ginsogo sang hari. Kag sa tapus sina ang Dios napakilooyan tungud sa duta.
Si Abisai Nagaluwas kay David gikan sa Gigante
15Ang mga Filistinhon nagpakig-away liwat batok sa Israel, kag si David nagdulhog kag ang iya mga alagad upud sa iya, kag nagpakig-away batok sa mga Filistinhon; kag si David ginlapyo. 16Kag si Isbi-benob, nga sa mga anak nga lalaki sang gigante, nga ang bug-at sang iya bangkaw tatlo ka gatus ka siclo nga saway sa kabug-aton, nga sia nagtaklus sang bag-o nga espada, naghunahuna sa pagpatay kuntani kay David. 17Apang si Abisai nga anak ni Sarvia nagtabang sa iya, kag naglabo sang Filistinhon kag nagpatay sa iya. Niyan ang mga tawo ni David nagsumpa sa iya, “Dili ka na gid maggowa upud sa amon sa inaway, agud nga indi mo mapalong ang suga sang Israel.”
Ang mga Gigante Pinatay sang mga Tawo ni David
(1 Cron. 20:4-8)
18Sa tapus sini may pagpakig-away liwat sa Gob sa mga Filistinhon; niyan si Sibecai nga Husatnon nagpatay kay Saf, nga sa mga anak nga lalaki sang gigante. 19Kag may pagpakig-away liwat sa mga Filistinhon sa Gob; kag si Elhanan nga lalaki nga anak ni Jaare-oregim, nga Bet-lehemnon, nagpatay kay Goliat nga Githanon, nga ang olongon sang iya bangkaw kaangay sang likisan sang manughabol. 20Kag may inaway liwat sa Gat, diin may isa ka tawo nga layog, nga may anum ka tudlo sa tagsa ka kamut, kag anum ka tudlo sa tagsa ka tiil, duha ka pulo kag apat sa kadamuon; kag sia man natawo sa gigante. 21Kag sang gintamay niya ang Israel, si Jonatan nga anak ni Simei, utud ni David, nagpatay sa iya. 22Ini sila nga apat natawo sa gigante sa Gat; kag napukan sila tungud sa kamut ni David kag tungud sa kamut sang iya mga alagad.
Currently Selected:
2 SAMUEL 21: ABHIL82
Highlight
Share
Compare
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
