2 SAMUEL 19
19
Si David Nagabalik sa Jerusalem
1Ginsugid ini kay Joab, “Yari karon, ang hari nagahibi kag nagalalaw tungud kay Absalom.” 2Gani sadto nga adlaw ang kaluwasan nabaylo sa paglalaw sa bug-os nga katawohan; kay nakabati ang katawohan nga ginsiling sadto nga adlaw, “Ang hari nagakalisud tungud sa iya anak.” 3Kag ang katawohan nagsulud sing kawat sa banwa subong sang pagpalagyo sing kawat sang katawohan nga nahuya kon nagapalagyo sila sa inaway. 4Ang hari nagtabon sang iya nawung, kag ang hari nagsinggit sa mabaskug nga tingug, “O anak ko nga Absalom, O Absalom, anak ko, anak ko!” 5Niyan si Joab nagsulud sa balay sa hari, kag nagsiling, “Sini nga adlaw ginpakahuy-an mo ang mga nawung sang tanan mo nga alagad, nga sa sini nga adlaw nagluwas sang imo kabuhi, kag sang mga kabuhi sang imo mga anak nga lalaki kag sang imo mga anak nga babayi, kag sang mga kabuhi sang imo mga asawa kag sang mga kabuhi sang imo mga babayi, 6bangud nga nagahigugma ka sa mga nagadumut sa imo kag nagadumut sa mga nagahigugma sa imo. Kay sini nga adlaw nagpahayag ka nga ang mga principe kag mga alagad wala sing pulus sa imo; kay sini nga adlaw nahantup ko nga kon si Absalom nabuhi kag kami tanan napatay sini nga adlaw, niyan nagpahamuut ini kuntani sa imo sing maayo. 7Busa karon tindug, gowa ka kag magpamolong sing paglipay sa imo mga alagad; kay nagasumpa ako tingud sa Ginoo, kon indi ka maggowa, wala sing tawo nga mapabilin sa imo sini nga gab-i; kag ini manginlabi pa kalain sa imo sang sa bug-os nga malaut nga nahanabu sa imo kutub sang imo pagkapamatan-on tubtub karon.” 8Niyan nagtindug ang hari, kag naglingkod sa gawang. Kag nagsugid sila sa bug-os nga katawohan, “Yari karon, ang hari nagalingkod sa gawang”; kag nag-abut ang bug-os nga katawohan sa atubang sang hari.
Karon ang Israel nagpalagyo ang tagsa ka tawo pakadto sa iya layanglayang. 9Kag ang bug-os nga katawohan nagsinuay sa bug-os sang tanan nga kabikahan sang Israel, nga nagasiling, “Ang hari nagluwas sa aton sa kamut sang aton mga kaaway, kag sia nagluwas sa aton sa kamut sang mga Filistinhon; kag karon nagpalagyo sia sa duta gikan kay Absalom. 10Apang si Absalom, nga aton ginhaplas sa ibabaw naton, napatay sa inaway. Busa karon ngaa bala nga wala kamo magpamolong sing isa ka polong sa pagpabalik sang hari?”
11Kag si Hari David nagpadala kay Sadoc kag kay Abiatar nga mga sacerdote, “Ipamolong sa mga tigulang sang Juda, ‘Ngaa bala naolihi kamo sa pagpapauli sa hari sa iya balay, sa ginatan-aw nga ang hambal sang bug-os nga Israel nag-abut na sa hari, sa pagpapauli sa iya sa balay niya? 12Kamo akon mga utud, kamo akon tul-an kag akon unud; ngaa bala niyan nga naolihi kamo sa pagpabalik sang hari?’ 13Kag isiling ninyo kay Amasa, ‘Indi bala ikaw akon tul-an kag akon unud? Amo ini ang himoon sang Dios sa akon, kag labi pa man, kon indi ka bala manginpangolo sang kasoldadosan sa atubang nakon sing dalayon sa tal-us ni Joab.’” 14Kag nabuyok niya ang tagiposoon sang tanan nga tawo sang Juda subong sang isa ka tawo; sa bagay nga nagpadala sila sa hari, “Balik ka, kag ang tanan mo nga mga alagad.” 15Gani ang hari nagpauli kag nag-abut sa Jordan; kag ang Juda nag-abut sa Gilgal sa pagsugata sang hari, sa pagpatabok sang hari sa Jordan.
16Kag si Simei#2 Sam. 16:5-13. nga anak ni Gera, ang Benjaminhon, nga taga-Bahurim, nagdalidali kag nagdulhog upud sa mga tawo sang Juda sa pagsugata kay Hari David; 17kag upud sa iya may isa ka libo ka tawo gikan sa Benjamin. Kag si Siba nga alagad sang balay ni Saul, kag ang iya napulo kag lima ka anak nga lalaki kag ang iya duha ka pulo ka alagad upud sa iya, nagtabok sila sa Jordan sa atubang sang hari, 18kag may nagtabok nga banka nga talabokan sa pagpatabok sang panimalay sang hari, kag sa paghimo sang ginapakamaayo niya. Kag si Simei nga anak ni Gera naghapa sa atubang sang hari, sang sia nakatabok sa Jordan, 19kag nagsiling sia sa hari, “Dili ang akon ginoo magpabangud sa akon sing kalautan kag dili pagdumduma ang ginhimo sing binalingag sang imo alagad sang adlaw nga ang akon ginoo nga hari naggowa sa Jerusalem; nga ang hari magsapak sini sa iya tagiposoon. 20Kay ang imo alagad nagakilala nga nakasala ako; busa, yari karon, nagkari ako sini nga adlaw nga una sa bug-os nga panimalay ni Jose sa pagdulhog sa pagsugata sang akon ginoo nga hari.” 21Si Abisai nga anak ni Sarvia nagsabat, “Indi bala pagpatyon tungud sini si Simei, bangud nga nagpakamalaut sia sang hinaplas sang Ginoo?” 22Apang si David nagsiling, “Ano bala ang akon sa inyo, kamo nga mga anak ni Sarvia, nga manginkasumpung kamo nakon sini nga adlaw? May patyon bala nga tawo sini nga adlaw sa Israel? Kay wala bala ako makahibalo nga sini nga adlaw hari ako sa Israel?” 23Kag nagsiling ang hari kay Simei, “Indi ka mapatay.” Kag ang hari nagsumpa sa iya.
24Kag si Mefiboset#2 Sam. 9:1-13; 16:1-4. nga anak ni Saul nagdulhog sa pagsugata sang hari; wala sia makatinlo sang iya mga tiil, ukon makabanhay sang iya bungut, ukon makabunak sang iya mga panapton, kutub sang adlaw nga nagtaliwan ang hari tubtub sang adlaw nga nagpauli sia sa paghidait. 25Kag sang nag-abut sia sa Jerusalem sa pagsugata sang hari, ang hari nagsiling sa iya, “Ngaa bala wala ka mag-upud sa akon, Mefiboset?” 26Sia nagsabat, “Ginoo ko, O hari, ang akon alagad naglimbong sa akon; kay ang imo alagad nagsiling, ‘Pagasiyahan ko ang asno, agud nga makasakay ako sa iya kag mag-upud sa hari.’ Kay ang imo alagad piang. 27Ginbutangbutangan niya ang imo alagad sa akon ginoo nga hari. Apang ang akon ginoo nga hari kasubong sang manugtunda sang Dios; busa himoa ang maayo sa imo mga mata. 28Kay ang bug-os nga panimalay sang akon amay patay lamang nga mga tawo sa atubang sang akon ginoo nga hari; wala sing sapayan ginbutang mo ang imo alagad sa tunga sang mga nagkaon sa imo kaugalingon nga latok. Busa ano pa bala ang kinamatarung ko nga magpanawag pa ako sa hari?” 29Kag ang hari nagsiling sa iya, “Ngaa bala nga nagapamolong ka pa sang mga kahimtangan mo? Ako nagasiling: ikaw kag si Siba magbahin sang duta.” 30Kag si Mefiboset nagsiling sa hari, “Hoo, ipakuha sa iya ang tanan, sa bagay nga ang akon ginoo nga hari nag-abut sa paghidait sa iya kaugalingon nga balay.”
31Karon si Barsilai#2 Sam. 17:27-29. nga Galaadnon nagdulhog gikan sa Rogelim; kag nagtabok sia sa Jordan upud sa hari, sa pagdol-ong sa iya sa tabok sang Jordan. 32Si Barsilai tama na katigulang nga tawo, kawaloan ka tuig; kag ginsakdag niya ang hari sang didto sia sa Mahanaim; kay sia tama gid kamanggaranon nga tawo. 33Kag ang hari nagsiling kay Barsilai, “Kari upud sa akon, kag sakdagon ko ikaw upud sa akon sa Jerusalem.” 34Apang si Barsilai nagsiling sa hari, “Kapid-an pa bala ang mga adlaw sang mga tuig sang akon kabuhi, nga ako magtaklad upud sa hari sa Jerusalem? 35Ako sini nga adlaw kawaloan ka tuig; makakilala pa ako bala sang maayo kag sang malain? Makapanglalim pa bala ang imo alagad sang akon ginakaon ukon sang akon ginainum? Makabati pa ako bala sang tingug sang nagaamba nga mga lalaki kag nagaamba nga mga babayi? Ngaa bala niyan nga manginlulan pa ang imo alagad sa akon ginoo nga hari? 36Ang imo alagad magatabok lamang sa Jordan upud sa hari. Ngaa bala nga tumbasan ako sang hari sang subong nga balus? 37Nagaampo ako sa imo pabalika liwat ang imo alagad, agud nga mapatay ako sa akon kaugalingon nga banwa, sa luyo sang lulubngan sang akon amay kag sang akon iloy. Apang yari ang imo alagad nga si Camaam; pataboka sia upud sa akon ginoo nga hari; kag himoa sa iya ang maayo sa imo.” 38Kag ang hari nagsabat, “Magatabok upud sa akon si Camaam, kag himoon ko sa iya ang maayo sa imo; kag ang bisan ano nga kinahanglanon mo sa akon ina himoon ko sa imo.” 39Niyan ang bug-os nga katawohan nagtabok sa Jordan, kag ang hari nagtabok; kag ang hari naghaluk kay Barsilai kag ginpakamaayo sia, kag sia nagpauli sa iya kaugalingon nga duug. 40Ang hari nagtabok pa Gilgal, kag upud sa iya nagtabok si Camaam; kag ang bug-os nga katawohan sang Juda, kag ang katunga man sang katawohan sang Israel, nagpatabok sang hari sa Jordan.
41Niyan ang tanan nga lalaki sang Israel nagkadto sa hari, kag nagsiling sa hari, “Ngaa bala nga ang amon mga utud nga lalaki sang Juda nagkawat sa imo, kag nagpatabok sa Jordan sang hari, kag sang iya panimalay, kag sang tanan nga tawo ni David upud sa iya?” 42Ang tanan nga lalaki sang Juda nagsabat sa mga lalaki sang Israel, “Bangud nga ang hari amon himata nga malapit. Ngaa bala niyan nga naakig kamo sini nga butang? Nagkaon bala kami nga mas-a sa kahinguyangan sang hari? Ukon ginhatagan bala niya kami sing dolot?” 43Kag nagsabat ang mga lalaki sang Israel sa mga lalaki sang Juda, “May napulo kami ka bahin sa hari, kag kami man may labi pa nga kinamatarung kay David sang sa inyo. Ngaa bala niyan nga ginpasipalahan ninyo kami? Nga ang amon laygay wala pagbatona sing una sa pagpapauli sang aton hari?” Apang ang mga polong sang mga lalaki sang Juda matigdas pa sa mga polong sang mga lalaki sang Israel.
Currently Selected:
2 SAMUEL 19: ABHIL82
Highlight
Share
Compare
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
