1 PEDRO 2
2
1Gani isikway ang tanan nga kalautan kag tanan nga limbong kag pagkasalimpapaw kag kahisa kag tanan nga pagbutangbutang. 2Subong sang mga bata nga bag-o natawo, handuma ang gatas nga espirituhanon nga walay simbog, agud nga bangud sini magtubo kamo sa kaluwasan; 3kay natilawan ninyo nga ang Ginoo maayo.#Sal. 34:8.
Ang Buhing Bato
4Magpalapit kamo sa iya, sa sinang bato nga buhi, nga ginsikway sang mga tawo apang sa Dios pinili kag hamili; 5kag subong sang mga bato nga buhi matukud kamo inyo nga espirituhanon nga balay, nga manginbalaan nga pagkasacerdote, sa pagdolot sing espirituhanon nga mga halad nga nahamut-an sa Dios paagi kay Jesu-Cristo. 6Kay napahamtang sa kasulatan:
“Yari karon, ginabutang ko sa Sion ang isa ka pangolo nga bato nga pamag-ang, pinili kag hamili,
kag ang nagatoo sa iya indi mahuy-an.”#Isa. 28:16.
7Busa sa inyo nga nagatoo, hamili sia, apang sa mga dimatinoohon,
“Ang bato gid nga ginsikway sang mga manunukud
amo ang ginhimo nga olo sang pamag-ang,”#Sal. 118:22.
8kag
“Isa ka bato nga magapasandad sang mga tawo,
igang nga magapapukan sa ila”;#Isa. 8:14-15.
kay nasandad sila bangud nga dimatinumanon sa polong, subong nga gintangdoan sila sa paghimo.
Ang Kaugalingon nga Katawohan sang Dios
9Apang kamo pinili nga kaliwatan, harianon nga pagkasacerdote, balaan nga pungsud,#Ex. 19:5-6. katawohan nga iya sang Dios,#Deut. 4:20; 7:6; 14:2; 26:18; Tito 2:14. agud nga mapakita ninyo ang gamhanan nga mga buhat sang nagtawag sa inyo gikan sa kadudulman pakadto sa iya kalatingalahan nga kapawa. 10Sa nagligad nga tion indi kamo katawohan apang karon katawohan kamo sang Dios; sa nagligad nga tion wala kamo makaagum sing kalooy apang karon nakaagum sing kalooy.#Os. 2:23.
Magkabuhi subong nga mga Sologoon sang Dios
11Mga hinigugma, ginapakilooy ko sa inyo subong nga mga dumoloong kag mga manlulugayaw nga maglikaw sa mga kailigbon nga unudnon nga nagapakig-away batok sa inyo kalag. 12Maggawi kamo sing nagakaigo sa tunga sang mga Gentil, agud nga kon ginapakamalaut kamo nila, sila bangud sang inyo maayong mga buhat nga ila nakita maghimaya sang Dios sa adlaw sang pagduaw.
13Magpasakup kamo sa tagsa ka pagsolondan sang tawo tungud sa Ginoo, bisan sa hari subong nga labing gamhanan, 14ukon sa mga pangolo-puud subong nga ginpadala niya sa pagsilot sa nagahimo sing malaut kag pagdayaw sa mga nagahimo sing maayo. 15Kay amo ini ang kabubut-on sang Dios nga paagi sa paghimo sing maayo pahipuson ninyo ang pagkakulang sing ihibalo sang buangbuang nga mga tawo. 16Magkabuhi subong nga hilway nga mga tawo, apang wala nagagamit sang inyo kahilwayan nga kunup sang kalautan; kondi magkabuhi subong nga mga ulipon sang Dios. 17Tahora ang tanan nga tawo. Higugmaa ang paghiliutud. Kahadluki ang Dios. Tahora ang hari.
18Mga sologoon, magpasakup kamo sa inyo mga agalon sa bug-os nga pagtahud, indi lamang sa mga malolo kag mga mabuut kondi man sa mga matinaastaason. 19Kay ini kalahamut-an kon, tungud sa kaisipan ayon sa Dios, ang tawo nagabatas sing kasakit nga nagaantus sing disono sa katarungan. 20Kay ano bala ang kapuslanan sini, kon sa nagapakasala kamo kag ginasakit kamo nagapailub kamo? Apang kon sa nagahimo kamo sing maayo kag nagaantus nagapailub kamo, ini kalahamut-an sa Dios. 21Kay sa sini mga gintawag kamo, kay si Cristo man nag-antus tungud sa inyo, nga nagabilin sa inyo sing solondan, agud nga pagsondon ninyo ang iya mga tikang. 22Sia wala magpakasala; walay limbong sa iya baba.#Isa. 53:9. 23Sang ginpasipalahan sia, wala sia magbalus sa pagpasipala; sang nag-antus sia, wala magpahog; kondi gintugyan niya ang iya kaugalingon sa nagahukom sing matarung. 24Sia gid nagdala sang aton mga sala sa iya lawas sa kahoy, agud nga kita mapatay sa sala kag magkabuhi sa pagkamatarung. Bangud sang iya mga pilas nag-ayo kamo.#Isa. 53:5. 25Kay nagtalang kamo subong sang mga carnero,#Isa. 53:6. apang karon nagbalik sa Manugpahalab kag Manugtatap sang inyo mga kalag.
Currently Selected:
1 PEDRO 2: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
