1 MGA HARI 10
10
Ang Hara sang Saba Nagaduaw kay Salomon
(2 Cron. 9:1-12)
1Karon sang nakabati ang hara sang Saba#Mat. 12:42; Luc. 11:31. sang kabantugan ni Salomon nahanungud sang ngalan sang Ginoo, nag-abut sia sa pagtilaw sa iya sa maiwat nga mga pamangkot. 2Nag-abut sia sa Jerusalem upud ang tama kadaku nga katay, nga may mga camelyo nga nagdala sing mga pahumut, kag tama kadamu nga bulawan, kag mga bato nga bilidhon; kag sang nag-abut sia kay Salomon, ginpabutyag niya sa iya ang tanan nga yara sa iya tagiposoon. 3Kag si Salomon nagsaysay sa iya sang tanan niya nga pamangkot; wala sing bisan ano nga natago sa hari nga wala niya masaysay sa iya. 4Kag sang nakita sang hara sang Saba ang bug-os nga kaalam ni Salomon, ang balay nga iya napatindug, 5ang pagkaon sa iya latok, ang paglingkod sang iya mga ulipon, ang pag-alagad sang iya mga alagad, ang ila panapton, ang iya mga manugtagay, kag ang iya salakaan nga ginsakaan niya pakadto sa balay sang Ginoo, nahalawhaw sia.
6Kag nagsiling sia sa hari, “Matuud ang balita nga akon nabatian sa akon kaugalingon nga duta sang imo mga binuhatan kag sang imo kaalam, 7apang wala ako magpati sang mga polong tubtub nga nag-abut ako kag ang akon mga mata nakakita sini; kag, yari karon, ang katunga wala masugid sa akon; ang imo kaalam kag kauswagan nagalabaw sang kabantugan nga akon nabatian. 8Bulahan ang imo mga tawo! Bulahan ini nga imo mga alagad, nga yara sa dalayon sa imo atubangan nga nagapamati sang imo kaalam! 9Pakamaayohon ang Ginoo nga imo Dios, nga nahamuut sa imo sa pagbutang sa imo sa trono sang Israel! Bangud nga ang Ginoo naghigugma sa gihapon sa Israel, busa ginhimo ka niya nga hari, sa paghimo sing katarungan kag pagkamatarung.” 10Niyan naghatag sia sa hari sing isa ka gatus kag duha ka pulo ka talanton nga bulawan, kag tama kabugana nga mga pahumut, kag mga bato nga bilidhon; wala na gid sing nag-abut pa nga subong sini kabugana nga pahumut sang sa ginhatag sang hara sang Saba kay Hari Salomon.
11Labut pa ang panong nga mga sakayan man ni Hiram, nga nagdala sing bulawan gikan sa Ofir, nagdala gikan sa Ofir sing madamu gid nga kahoy nga sandalo kag mga bato nga bilidhon. 12Kag sa kahoy nga sandalo naghimo ang hari sing mga tuko nga sa balay sang Ginoo, kag sa balay sang hari, mga arpa man kag mga salterio nga sa mga manug-amba; wala na gid sing nag-abut nga kasubong nga kahoy nga sandalo ukon nakit-an, tubtub sini nga adlaw.
13Kag si Hari Salomon naghatag sa hara sang Saba sang tanan nga iya naluyagan, ang bisan ano nga ginpangayo niya luwas sang ginhatag sa iya ni Salomon gikan sa iya harianon nga kabugana. Gani nagtaliwan sia kag nagpauli sa iya kaugalingon nga duta, sia kag ang iya mga alagad.
Ang mga Manggad kag Kabantugan ni Salomon
(2 Cron. 9:13-24)
14Karon ang kabug-aton sang bulawan nga nag-abut kay Salomon sa isa ka tuig anum ka gatus kag kan-uman kag anum ka talanton nga bulawan, 15luwas sang gindala sang mga manugpatikang kag sang buhis sang mga manugbaligya, kag gikan sa tanan nga hari sang Arabia kag sang mga pangolo-puud sang duta. 16Si Hari Salomon nagbuhat sing duha ka gatus ka kalasag nga bulawan nga sinalsal; anum ka gatus ka siclo nga bulawan sa isa ka kalasag. 17Kag naghimo sia sing tatlo ka gatus ka taming nga bulawan nga sinalsal; tatlo ka libra nga bulawan sa isa ka taming; kag ginbutang sila sang hari sa Balay sang Kagulangan sang Libano. 18Labut pa ang hari naghimo sing isa ka daku nga trono nga tiposo, kag gintaklapan ini sing tunay gid nga bulawan. 19May anum ka alintaga pakadto sa trono, kag ang naibabaw sang trono manipolon sa likod, kag may mga halambuyan sa magtimbang nga kilid sang lingkoran kag duha ka leon nga nagatindug sa luyo sang mga halambuyan, 20samtang napulog duha ka leon nagtindug didto sa magtimbang nga kilid sang anum ka alintaga. Wala sing subong nga nahimo sa bisan diin nga ginharian. 21Ang tanan nga gamit nga ilimnan ni Hari Salomon bulawan, kag ang tanan nga gamit sang Balay sang Kagulangan sang Libano bus-og nga bulawan; wala gid sing sa pilak, sa kaadlawan ni Salomon wala ini ginpakamahala. 22Kay ang hari may panong nga sakayan sang Tarsis sa dagat upud sang panong nga sakayan ni Hiram. Makaisa sa tagsa ka tatlo ka tuig nag-abut ang panong nga sakayan sang Tarsis nga nagadala sing bulawan, pilak, tiposo, mga amo, kag mga paboreal.
23Gani si Hari Salomon naglabaw sa tanan nga hari sang duta sa manggad kag sa kaalam. 24Kag ang bug-os nga duta naghimulat sa pagpakigkita kay Salomon sa pagpamati sang iya kaalam, nga ginbutang sang Dios sa iya tagiposoon. 25Ang tagsa ka tawo nagdala sang iya dolot, mga suludlan nga pilak kag mga suludlan nga bulawan, panapton, hinganib, mga pahumut, mga kabayo, kag mga mula, sa amo kadamu tuigtuig.
Ang Pagpatikang ni Salomon sing mga Kabayo kag mga Kangga
(2 Cron. 1:14-17; 9:25-28)
26Kag si Salomon nagtipon sing tingub sing mga kangga kag mga manugkabayo; sia may isa ka libo kag apat ka gatus ka kangga kag napulo kag duha ka libo ka manugkabayo,#1 Hari 4:26. nga iya ginbutang sa mga banwang kanggahan kag upud sa hari sa Jerusalem. 27Kag sa Jerusalem ginbilang sang hari nga mga bato ang pilak,#Deut. 17:17. kag ginbilang ang mga cedro nga daw mga kahoy nga sicomoro nga yara sa kapatagan sa kabugana. 28Kag ang mga kabayo ni Salomon gindala gikan sa Egipto,#Deut. 17:16. kag ginbaton sila sa pinanong sang mga manugbaligya sang hari ang tagsa ka panong sa bili. 29Ginpataklad kag ginpagowa gikan sa Egipto ang kangga sa anum ka gatus ka siclo nga pilak, kag ang kabayo sa isa ka gatus kag kalim-an; kag amo ini tungud sa tanan nga hari sang mga Hethanon kag sa mga hari sang Siria gindala nila sila sa ila pagpangalima.
Currently Selected:
1 MGA HARI 10: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
