1 MGA HARI 9
9
Ang Katipan sang Ginoo kay Salomon
(2 Cron. 7:11-22)
1Sang natapus ni Salomon ang pagpatindug sang balay sang Ginoo kag sang balay sang hari kag sang tanan nga handum ni Salomon nga nahamut-an niya sa paghimo, 2ang Ginoo nagpahayag kay Salomon sa ikaduha, subong sang pagpahayag niya sa iya sa Gabaon.#1 Hari 3:5; 2 Cron. 1:7. 3Kag ang Ginoo nagsiling sa iya, “Ginpamatian ko ang imo pangamuyo kag ang imo pag-ampo, nga ginhimo mo sa akon atubangan; ginpakabalaan ko ining balay nga imo ginpatindug, sa pagbutang didto sang akon ngalan sa gihapon; ang akon mga mata kag ang akon tagiposoon mangindidto sing dalayon. 4Kag nahanungud sa imo, kon ikaw maglakat sa atubangan nakon, subong sang paglakat ni David nga imo amay, sa kalubus sang tagiposoon kag sa pagkatarung, sa paghimo sono sa tanan nga akon ginsogo sa imo, kag magbantay sang akon mga palatukuran kag sang akon mga pagsolondan, 5niyan palig-onon ko ang trono sang imo ginharian sa ibabaw sang Israel sa gihapon, sono sa ginsaad ko kay David nga imo amay, nga nagasiling, ‘Walay makulang sa imo nga lalaki sa trono sang Israel.’#1 Hari 2:4. 6Apang kon magtalikod kamo gikan sa pagsonod sa akon, kamo ukon ang inyo mga anak, kag indi magbantay sang akon mga sogo kag sang akon mga palatukuran nga ginbutang ko sa atubangan ninyo, kondi magkadto kag mag-alagad sa iban nga mga dios kag magsimba sa ila, 7niyan utdon ko ang Israel gikan sa duta nga akon nahatag sa ila; kag ining balay nga akon ginpakabalaan sa akon ngalan akon isikway gikan sa itololok nakon; kag ang Israel manginhulubaton kag ululigyaton sa tunga sang tanan nga mga katawohan. 8Kag bisan ining balay tama kataas,#2 Hari 25:9; 2 Cron. 36:19. apang ang tagsatagsa nga maglabay sa iya matingala, kag magapanagutsut; kag magasiling, ‘Ngaa bala nga ginhimo sang Ginoo ang subong sini sa sining duta kag sa sining balay?’ 9Niyan magasiling sila, ‘Bangud nga ginbayaan nila ang Ginoo nga ila Dios nga nagpagowa sang ila mga ginikanan gikan sa duta sang Egipto, kag nagdangup sa iban nga mga dios, kag nagsimba sa ila kag nag-alagad sa ila; busa gindala sang Ginoo ini tanan nga kalaut sa ila.’”
Ang Iban nga mga Buhat ni Salomon
(2 Cron. 8:1-18)
10Sa tapus ang duha ka pulo ka tuig, nga si Salomon nakapatindug sing duha ka balay, ang balay sang Ginoo kag ang balay sang hari, 11kag si Hiram nga hari sang Tiro naghatag kay Salomon sing kahoy nga cedro kag mga kahoy nga abeto kag bulawan, sono sa tanan niyang luyag, si Hari Salomon naghatag kay Hiram sing duha ka pulo ka banwa sa duta sang Galilea. 12Apang sang si Hiram naggowa gikan sa Tiro sa pagtan-aw sang mga banwa nga ginhatag sa iya ni Salomon, wala niya mahamut-i sila. 13Busa nagsiling sia, “Ano bala ining mga banwa nga ginhatag mo sa akon, utud ko?” Gani ginhingalanan niya sila nga duta sang Cabul tubtub sining adlaw. 14Si Hiram nagpadala sa hari sing isa ka gatus kag duha ka pulo ka talanton nga bulawan.
15Kag amo ini ang kabangdanan sang takay sa pigus nga pagpangabudlay nga ginhimo ni Hari Salomon, sa pagpatindug sang balay sang Ginoo kag sang iya kaugalingon nga balay kag sang Milo kag sang kuta sang Jerusalem kag sang Hazor kag sang Meguido kag sang Gezer 16(si Faraon nga hari sang Egipto nakataklad kag nakaagaw sang Gezer kag ginsonog ini sa kalayo, kag ginpatay ang mga Canaanhon nga nagpuyo sa banwa, kag ginhatag ining bahin sa iya anak nga babayi, asawa ni Salomon; 17gani ginpatindug ni Salomon ang Gezer) kag ang Bet-horon nga naubus 18kag ang Baalat kag ang Tamar sa kamingawan, sa duta, 19kag ang tanan nga banwa nga suluptan nga iya ni Salomon, kag ang mga banwa nga sa iya mga kangga, kag ang mga banwa nga sa iya mga manugkabayo, kag ang buut patindugon ni Salomon nga sa iya kalipayan sa Jerusalem, kag sa Libano, kag sa bug-os nga duta sang iya ginharian. 20Nahanungud sang tanan nga katawohan nga nabilin sang mga Amornon, sang mga Hethanon, sang mga Pereznon, sang mga Hevhanon, kag sang mga Jebusnon, nga indi gikan sa katawohan sang Israel— 21ang ila mga anak nga nabilin sa duta sa olihi nila, nga wala malaglag sing bug-os sang katawohan sang Israel—gikan sa ila si Salomon naghimo sing mga ulipon sa takay, tubtub sining adlaw. 22Apang gikan sa katawohan sang Israel si Salomon wala maghimo sing mga ulipon; kondi sila mga tawo sa inaway, iya mga alagad, iya mga principe, iya mga capitan, mga manugdumala sang iya mga kangga kag iya mga manugkabayo.
23Ini sila puno nga mga manugdumala sa buluhaton ni Salomon: lima ka gatus kag kalim-an, nga naggahum sa katawohan nga nagpangabudlay sa buluhaton.
24Apang nagtaklad ang babaying anak ni Faraon gikan sa banwa ni David pakadto sa iya balay nga ginpatindug nga sa iya ni Salomon; niyan ginpatindug ni Salomon ang Milo.
25Si Salomon nagdolot sing makatlo sa tagsa ka tuig#Ex. 23:17; 34:23; Deut. 16:16. sing mga halad-nga-sinonog kag mga halad-sa-paghidait sa halaran nga iya ginpatindug sa Ginoo, nga nagasonog sing incienso sa ibabaw niya nga yara sa atubangan sang Ginoo. Gani ginhuman niya ang balay.
26Naghimo si Hari Salomon sing panong sang mga sakayan sa Ezion-geber, nga yara sa luyo sang Elot sa baybayon sang Dagat nga Mapula, sa duta sang Edom. 27Kag ginpadala ni Hiram ang iya mga alagad sa panong sang mga sakayan, mga sakayanon nga may ihibalo sang dagat, upud sang mga alagad ni Salomon; 28kag nag-abut sila sa Ofir, kag nagkuha didto sing bulawan, nga apat ka gatus kag duha ka pulo ka talanton; kag gindala ini kay Hari Salomon.
Currently Selected:
1 MGA HARI 9: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
