1 MGA HARI 11

Ang Pagtalikod ni Salomon kag ang Iya mga Kasumpong

1Karon si Hari Salomon naghigugma sing madamu nga babayi nga dumuloong:#Deut. 17:17. luwas sa anak ni Faraon, mga babayi sa mga Moabnon, sa mga Amonhon, sa mga Edomnon, sa mga Sidonhon, kag sa mga Hethanon, 2nahanungud sa mga pungsud nga ginsiling sang Ginoo sa katawohan sang Israel, “Dili kamo magsimpon sa ila, ukon sila magsimpon sa inyo, kay sa pagkamatuud patalangon nila ang inyo tagiposoon sa pagsonod sa ila mga dios”;#Ex. 34:16; Deut. 7:3-4. sa ila sini nagtapik si Salomon sa paghigugma. 3Sia may pito ka gatus ka asawa, nga mga princesa, kag tatlo ka gatus ka mga babayi; kag ang iya mga asawa nagpatalang sang iya tagiposoon. 4Kay sang si Salomon tigulang na ang iya mga asawa nagpatalang sang iya tagiposoon sa pagsonod sa iban nga mga dios; kag ang iya tagiposoon indi bug-os sa Ginoo nga iya Dios, subong sang tagiposoon ni David nga iya amay. 5Kay si Salomon nagsonod kay Astarot nga diosa sang mga Sidonhon, kag kay Milcom nga kangil-aran sang mga Amonhon. 6Gani ginhimo ni Salomon ang malaut sa itololok sang Ginoo, kag wala magsonod sing bug-os sa Ginoo, subong kay David nga iya amay. 7Niyan si Salomon nagpatindug sing duug nga mataas kay Cemos nga kangil-aran sang Moab, sa bukid nga yara sa atubang sang Jerusalem, kag kay Moloc nga kangil-aran sang mga anak ni Amon. 8Kag amo ini ang ginhimo niya sa tanan nga iya asawa nga dumuloong, nga nagsonog sing incienso kag naghalad sa ila mga dios.

9Kag naakig ang Ginoo kay Salomon, bangud nga nagtalang ang iya tagiposoon gikan sa Ginoo, ang Dios sang Israel, nga nakapahayag sa iya sing makaduha, 10kag nakasogo sa iya nahanungud sining butang, nga indi sia magsonod sa iban nga mga dios; apang wala niya pagbantayi ang ginsogo sang Ginoo. 11Busa nagsiling ang Ginoo kay Salomon, “Sanglit nga nahimo mo ini kag wala mo pagbantayi ang akon katipan kag ang akon mga palatukuran nga ginsogo ko sa imo, sa pagkamatuud kusniton ko ang ginharian gikan sa imo kag ihatag ini sa imo alagad. 12Wala sing sapayan indi ko paghimoon ini sa imo mga adlaw tungud kay David nga imo amay, apang kusniton ko ini sa kamut sang imo anak. 13Apang indi ko pagkusniton ang bug-os nga ginharian; kondi ihatag ko ang isa ka kabikahan sa imo anak, tungud kay David nga akon alagad kag tungud sa Jerusalem nga akon ginpili.”

14Kag ang Ginoo nagbangon sing kasumpung kay Salomon, si Hadad nga Edomnon; sia gikan sa kaliwat sang hari sa Edom. 15Kay sang didto si David sa Edom, kag si Joab nga pangolo sang kasoldadosan nagtaklad sa paglubung sang mga pinatay, napatay niya ang tanan nga lalaki sang Edom 16(kay nagpabilin didto si Joab sing anum ka bulan kag ang bug-os nga Israel, tubtub nga napapas niya ang tagsa ka lalaki sa Edom); 17apang si Hadad nagpalagyo, sia kag ang pila ka Edomnon sang mga alagad sang iya amay upud sa iya, sa pagkadto sa Egipto, si Hadad diotay pa nga bata. 18Nagtindug sila pagowa sa Madian kag nag-abut sa Paran, kag nagkuha sila sing mga tawo gikan sa Paran kag nag-abut sila sa Egipto, kay Faraon nga hari sang Egipto, nga naghatag sa iya sing balay, kag nagtangdo sa iya sing mga pagkaon, kag naghatag sa iya sing duta. 19Kag si Hadad nahamut-an gid sa itololok ni Faraon, sa bagay nga ginpaasawa niya sa iya ang iya bayaw nga babayi, ang utud ni Tafenes nga hara. 20Kag ang utud nga babayi ni Tafenes nag-anak sa iya sing lalaki nga si Genubat, nga ginlutas ni Tafenes sa balay ni Faraon; kag si Genubat nagpuyo sa balay ni Faraon sa tunga sang mga anak nga lalaki ni Faraon. 21Apang sang pagkabati ni Hadad sa Egipto nga si David nagtolog upud sa iya mga ginikanan kag nga si Joab nga pangolo sang kasoldadosan patay na, si Hadad nagsiling kay Faraon, “Pataliwana ako, agud nga mapauli ako sa akon kaugalingon nga duta.” 22Niyan si Faraon nagsiling sa iya, “Apang ano bala ang nakulang sa imo upud sa akon nga karon nagtinguha ka sa pagkadto sa imo kaugalingon nga duta?” Kag sia nagsabat, “Pataliwana lamang ako.”

23Ang Dios nagpatindug sing isa pa ka kasumpung sa iya, si Rezon nga anak ni Eliada, nga nagpalagyo gikan sa iya ginoo nga si Hadadezer nga hari sang Zoba. 24Kag nagtipon sia sing mga tawo sa iya kag nanginpangolo sa isa ka kabon, sang pagpamatay ni David sa ila sa Zoba; kag nagkadto sila sa Damasco, kag nagpuyo didto, kag naghari sa Damasco. 25Kasumpung sia sa Israel sa tanan nga mga adlaw ni Salomon, luwas sa kalainan nga ginhimo ni Hadad; kag ginkangil-aran niya ang Israel, kag naghari sia sa Siria.

26Si Jeroboam nga anak ni Nabat, nga Efraimnon sang Sereda, alagad ni Salomon, nga ang iya iloy ginahingalanan Serua, babaying balo, sia man nagbayaw sang iya kamut batok sa hari. 27Kag amo ini ang kabangdanan nga nagbayaw sia sang iya kamut batok sa hari. Si Salomon nagpatindug sang Milo, kag ginkapulan niya ang bulho sang banwa ni David nga iya amay. 28Ang tawo nga si Jeroboam tawo nga isganan, kag nakita ni Salomon nga ang pamatan-on mapisan sia kag gintugyanan sia sang tanan nga palangabudlayan sang balay ni Jose. 29Kag sa sadtong tion, sang si Jeroboam naggowa sa Jerusalem, ang manalagna nga si Ahias nga Silonhon nakakita sa iya sa dalanon. Karon si Ahias nagpanaput sing panapton nga bag-o; kag duha lamang sila sa latagon. 30Niyan si Ahias nag-uyat sang bag-ong panapton nga yara sa iya, kag ginkusnit ini sa napulog duha ka gihay. 31Kag nagsiling sia kay Jeroboam, “Kuha ka sing napulo ka gihay; kay amo ini ang ginasiling sang Ginoo, ang Dios sang Israel, ‘Yari karon, kusniton ko ang ginharian gikan sa kamut ni Salomon, kag ihatag sa imo ang napulo ka kabikahan 32(apang may isa sia ka kabikahan, tungud kay David nga akon alagad kag tungud sa Jerusalem, ang banwa nga akon ginpili gikan sa tanan nga kabikahan sang Israel), 33bangud nga ginbayaan nila ako, kag nagsimba kay Astarot nga diosa sang mga Sidonhon, kay Cemos nga dios sang Moab, kag kay Milcom nga dios sang mga anak ni Amon, kag wala sila maglakat sa akon mga dalanon, sa paghimo sang matarung sa atubangan sang akon mga mata kag sa pagbantay sang akon mga palatukuran kag sang akon mga pagsolondan, subong sang ginhimo ni David nga iya amay. 34Wala sing sapayan indi ko pagkuhaon ang bug-os nga ginharian sa iya kamut; kondi himoon ko sia nga principe sa tanan nga adlaw sang iya kabuhi, tungud kay David nga akon alagad nga ginpili ko, nga nagbantay sang akon mga sogo kag sang akon mga palatukuran; 35apang kuhaon ko ang ginharian sa kamut sang iya anak nga lalaki, kag ihatag ini sa imo, bisan ang napulo ka kabikahan. 36Apang sa iya anak ihatag ko ang isa ka kabikahan, agud nga ang akon alagad nga si David may suga sa gihapon sa atubangan nakon sa Jerusalem, ang banwa nga ginpili ko nga sa akon sa pagbutang sang akon ngalan didto. 37Kag kuhaon ko ikaw, kag magahari ka sono sa tanan nga ginahandum sang imo kalag, kag manginhari sa ibabaw sang Israel. 38Kag kon magpamati ka sa tanan nga ginasogo ko sa imo, kag maglakat sa akon mga dalanon, kag maghimo sang matarung sa akon mga mata sa pagbantay sang akon mga palatukuran kag sang akon mga sogo, subong sang ginhimo ni David nga akon alagad, ako magaupud sa imo, kag magapatindug sa imo sing balay nga malig-on, subong sang ginpatindug ko kay David, kag magahatag ako sang Israel sa imo. 39Kag tungud sini papiotan ko ang mga kaliwatan ni David, apang indi sa gihapon.’” 40Busa si Salomon naghimulat sa pagpatay kay Jeroboam; apang nagtindug si Jeroboam, kag nagpalagyo pakadto sa Egipto, kay Sisac nga hari sang Egipto, kag didto sa Egipto tubtub sa pagkapatay ni Salomon.

Ang Pagkapatay ni Salomon

(2 Cron. 9:29-31)

41Karon ang nabilin nga mga binuhatan ni Salomon, kag ang tanan nga iya ginhimo, kag ang iya kaalam, wala bala sila masulat sa tolon-an sang mga binuhatan ni Salomon? 42Kag ang tion nga naghari si Salomon sa Jerusalem sa ibabaw sang bug-os nga Israel kap-atan ka tuig. 43Kag si Salomon nagtolog upud sa iya mga ginikanan, kag ginlubung sa banwa ni David nga iya amay; kag si Roboam nga iya anak nga lalaki naghari sa tal-us niya.

Currently Selected:

1 MGA HARI 11: ABHIL82

Highlight

Copy

Compare