1 CORINTO 3

Mga Masigkamanugpangabudlay tungud sa Dios

1Apang ako, mga kauturan, indi makahambal sa inyo subong nga espirituhanon nga mga tawo, kondi subong nga mga tawo nga lawasnon, subong nga mga bata kay Cristo. 2Ginpainum ko kamo sing gatas, indi matig-a nga kalan-on;#Heb. 5:12-13. kay indi pa kamo makasarang sini; kag bisan pa karon indi kamo makasarang, 3kay mga lawasnon pa kamo. Kay sa may kahisa kag pinuyasay sa tunga ninyo, indi bala kamo mga lawasnon, kag nagaginawi sono sa paagi sang mga tawo? 4Kay sa nagasiling ang isa, “Ako kay Pablo,” kag ang isa, “Ako kay Apolos,”#1 Cor. 1:12. indi bala kamo mga tawo lang?

5Niyan ano bala si Apolos? Ano bala si Pablo? Mga manug-alagad nga paagi sa ila nagtoo kamo, sono sa ginhatag sang Ginoo sa tagsatagsa. 6Ako nagtanum,#Binu. 18:4-11. si Apolos nagbunyag,#Binu. 18:24-28. apang ang Dios nagpatubo. 7Gani ang nagatanum ukon ang nagabunyag indi sia bisan ano, kondi ang Dios lamang nga nagapatubo. 8Ang nagatanum kag ang nagabunyag pareho sila, kag ang tagsa magabaton sang iya sohol sono sa iya pagpangabudlay. 9Kay kami masigkamanugpangabudlay tungud sa Dios; kamo ulumhan sang Dios, balay sang Dios.

10Sono sa sogo sang Dios nga ginhatag sa akon, kaangay sa sampaton nga pangolo nga manunukud sang balay ako nagbutang sing sadsaran, kag lain nga tawo ang nagabalay sa ibabaw sini. Mag-andam ang tagsa ka tawo kon paano ang iya pagbalay sa ibabaw sini. 11Kay walay sadsaran nga mabutang sang bisan sin-o nga liwan sang nabutang na, nga amo si Jesu-Cristo. 12Karon kon ang bisan sin-o magbalay sa ibabaw sang sadsaran sing bulawan, pilak, mga bato nga malahalon, kahoy, hilamon, ginalaban— 13ang buhat sang tagsa ka tawo ipadayag; kay ipakita ini sang Adlaw, bangud nga ipahayag ini sa kalayo, kag ang kalayo magatilaw kon ano ang buhat sang tagsa ka tawo. 14Kon ang buhat nga ginbalay sang bisan sin-o nga tawo sa ibabaw sini magpadayon, magabaton sia sing balus. 15Kon ang buhat sang bisan sin-o nga tawo masonog, magaantus sia sing kadulaan, walay sapayan sia iya maluwas, apang lamang subong nga paagi sa kalayo.

16Wala bala kamo makahibalo nga kamo templo sang Dios kag nga ang Espiritu sang Dios nagapuyo sa inyo?#1 Cor. 6:19; 2 Cor. 6:16. 17Kon ang bisan sin-o nga tawo maglaglag sang templo sang Dios, ang Dios magalaglag sa iya. Kay ang templo sang Dios balaan, kag ina nga templo amo kamo.

18Walay tawo nga magdaya sa iya kaugalingon. Kon ang bisan sin-o sa inyo nagahunahuna nga sia maalam sa sining panuigon, magmanginbuangbuang sia agud nga magmaalam sia. 19Kay ang kaalam sining kalibutan kabuangan sa Dios. Kay nasulat na, “Ginadakup niya ang maalam sa pagkadaya nila,”#Job 5:13. 20kag liwat, “Ang Ginoo nakakilala nga ang mga painoino sang mga maalam walay pulus.”#Sal. 94:11. 21Gani walay bisan sin-o nga magpabugal nahanungud sa mga tawo. Kay ang tanan nga butang inyo, 22bisan si Pablo ukon si Apolos ukon si Cefas ukon ang kalibutan ukon kabuhi ukon kamatayon ukon ang sa karon ukon ang sa palaabuton, ang tanan inyo; 23kag iya kamo ni Cristo; kag si Cristo iya sang Dios.

Currently Selected:

1 CORINTO 3: ABHIL82

Highlight

Copy

Compare