1 CORINTO 4

Ang Pagpangabudlay sang mga Pinadala

1Ang tagsa ka tawo dapat magkabig sa amon, subong nga mga manug-alagad ni Cristo kag mga tulugyanan sang mga tinago sang Dios. 2Kapin pa ginakinahanglan sa mga tulugyanan nga sila masapwan nga matutum. 3Apang sa akon tama kadiotay nga butang nga paghukman ako ninyo ukon sang bisan ano nga tawohanon nga corte. Wala gani ako nagahukom sang akon kaugalingon. 4Wala ako sing nahibaloan nga bisan ano nga batok sa akon kaugalingon, apang wala ako ginapakamatarung sa sini. Ang nagahukom sa akon amo ang Ginoo. 5Busa dili kamo maghukom sing bisan ano sa wala pa ang tion, tubtub nga mag-abut ang Ginoo, nga magadala sa kapawa sang natago nga mga butang sang kadudulman kag magapahayag sang mga tinutuyo sang tagiposoon. Niyan ang tagsa ka tawo magabaton sing pagdayaw gikan sa Dios.

6Ini tanan, mga kauturan, napahanungud ko sa akon kaugalingon kag kay Apolos tungud sa inyo kaayohan agud nga sa amon makatoon kamo sa pagpangabuhi sono sa kasulatan, agud nga walay isa sa inyo nga magpahabok tungud sa isa batok sa iban. 7Kay sin-o bala ang nagapalabi sa imo? Ano bala ang imo nga wala mo mabaton? Niyan kon imo nabaton ini, ngaa bala nga nagapabugal ka subong nga daw wala mo mabaton?

8Nabusug na kamo. Manggaranon na kamo! Naghari na kamo sa wala kami! Kag buut ko kuntani nga naghari kamo, agud nga kami man maghari kaupud ninyo! 9Kay nagahunahuna ako nga ang Dios nagpaatubang sa amon nga mga pinadala nga olihi sa tanan, subong sang mga tawo nga pinanghukman sa kamatayon; kay ginhimo kamo nga talan-awon sang kalibutan, sa mga manugtunda kag mga tawo. 10Mga buangbuang kami tungud kay Cristo, apang maalam kamo kay Cristo. Maluya kami, apang mabaskug kamo. Ginapadunggan kamo, apang wala kami sing dungug. 11Tubtub karon nga takna ginagutum kami kag ginauhaw, hubo kami kag ginapintasan kag walay puluy-an, 12kag nagahimulat kami, nga nagapangabudlay sa amon kaugalingon nga mga kamut.#Binu. 18:3. Kon ginapasipalahan, nagapakamaayo kami; kon ginahingabut, nagabatas kami; 13kon ginapakahuy-an, nagapakilooy kami; ginahimo kami nga subong sang higko sang kalibutan, nga sagbut sang tanan nga butang, bisan tubtub karon.

14Wala ako nagasulat sini sa pagpakahuya sa inyo, kondi sa paglaygay sa inyo subong nga akon mga anak nga hinigugma. 15Kay bisan may dimaisip kamo nga mga manugtuytuy kay Cristo, wala kamo sing madamu nga amay. Kay nangin-anak ko kamo kay Cristo Jesus paagi sa maayong balita. 16Niyan, ginapakilooy ko sa inyo, magmanug-ilog kamo sa akon.#1 Cor. 11:1; Filip. 3:17. 17Busa napadala ko sa inyo si Timoteo, nga hinigugma kag matutum nga anak ko sa Ginoo, nga magapahanumdum sa inyo sang akon mga paagi sa kay Cristo, subong sang ginapanudlo ko sa tanan nga duug sa tagsa ka iglesia. 18Ang iban nagapahabok, subong nga daw indi ako magkara sa inyo. 19Apang magakara ako sa inyo sing madali, kon buut sang Ginoo, kag mahibaloan ko indi ang polong sang mga nagapahabok kondi ang ila gahum. 20Kay ang ginharian sang Dios indi sa polong kondi sa gahum. 21Ano bala ang buut ninyo? Makara bala ako sa inyo nga may bunal, ukon sa gugma kag espiritu sang pagkalolo?

Currently Selected:

1 CORINTO 4: ABHIL82

Highlight

Copy

Compare