1 CORINTO 2

Ang Pagbantala kay Cristo nga Ginlansang

1Sang pagkara ko sa inyo, mga kauturan, wala ako magkara nga nagabantala sa inyo sang pagpamatuud sang Dios nga may pagkasampaton sang polong ukon sang kaalam. 2Kay nagtapat ako nga indi magkilala sing bisan ano sa tunga ninyo luwas kay Jesu-Cristo kag sia nga ginlansang sa cruz. 3Kag nagkara ako sa inyo sa kaluyahon kag sa kahadluk kag sa dakung pagkurug;#Binu. 18:9. 4kag ang akon polong kag akon pagwali indi sa dalayawon nga mga polong sang kaalam, kondi sa kahayagan sang Espiritu kag sang gahum, 5agud nga ang inyo pagtoo indi mapahamtang sa kaalam sang mga tawo kondi sa gahum sang Dios.

Ang Bugna sang Espiritu sang Dios

6Walay sapayan nagahambal kami sing kaalam sa tunga sang mga hamtong, bisan ining kaalam indi iya sining panuigon ukon ila sang mga punoan sining panuigon, nga pakawalaon. 7Apang kami nagahambal sang tinago kag nalipdan nga kaalam sang Dios, nga natangdoan nga daan sang Dios sa wala pa ang mga panuigon nga sa aton himaya. 8Walay bisan sin-o sang mga punoan sining panuigon nga nakahangup sini; kay kon ila nahangpan, wala nila kuntani pag-ilansang sa cruz ang Ginoo sang himaya. 9Apang, sono sa nasulat na,

“Ang wala makit-i sang mata, kag wala mabatii sang idulungug,

ukon wala mapainoino sa hunahuna sang tawo,

ini gin-aman sang Dios sa nagahigugma sa iya,”#Isa. 64:4.

10sa aton ginpahayag sang Dios paagi sa Espiritu. Kay ang Espiritu nagausisa sang tanan nga butang, bisan ang mga kadadalman sang Dios. 11Kay sin-o nga tawo ang nakahibalo sang mga painoino sang tawo luwas ang espiritu sang tawo nga yara sa iya? Subong man walay sin-o nga nakahangup sang mga painoino sang Dios luwas ang Espiritu sang Dios. 12Karon nabaton ta indi ang espiritu sang kalibutan kondi ang Espiritu nga gikan sa Dios, agud nga mahangpan ta ang mga hiyas nga ginhatag sa aton sang Dios. 13Kag amon ginapalaton ini indi sa mga polong nga ginatudlo sang kaalam sang tawo kondi ginatudlo sang Espiritu, nga nagasaysay sang espirituhanon nga mga kamatooran sa mga nagahuput sang Espiritu.

14Ang tawong di-espirituhanon wala nagabaton sang mga hiyas sang Espiritu sang Dios, kay kabuangan sila sa iya, kag indi sia nakahangup sa ila bangud nga ginatalupangud sila sa espirituhanon nga bagay. 15Ang tawong espirituhanon nagahukom sang tanan nga butang, apang sia iya indi ginahukman sang bisan sin-ong tawo. 16“Kay sin-o bala ang nakakilala sang hunahuna sang Ginoo nga sia pagatudloan?”#Isa. 40:13. Apang aton ang hunahuna ni Cristo.

Currently Selected:

1 CORINTO 2: ABHIL82

Highlight

Copy

Compare