1 CORINTO 14
14
Ang Paghambal sa mga Dila
1Tinguhaa ninyo ang gugma, kag handuma ninyo sing hanuut ang mga hiyas nga espirituhanon, labi na gid nga makapanagna kamo. 2Kay ang nagahambal sa dila wala nagapamolong sa mga tawo kondi sa Dios; kay walay tawo nga nakahangup sa iya, kondi sa Espiritu nagapamolong sia sing mga tinago. 3Sa isa ka bagay, ang nagapanagna nagapamolong sa mga tawo sing pagpalig-on kag pagpabakud kag paglipay. 4Ang nagapamolong sa dila nagapalig-on sang iya kaugalingon, apang ang nagapanagna nagapalig-on sang iglesia. 5Karon buut ko nga magpamolong kamo tanan sa dila, apang labi pa nga magpanagna kamo. Daku pa ang nagapanagna sang sa nagapamolong sa dila, luwas kon may nagapatpat, agud nga mapalig-on ang iglesia. 6Karon, mga kauturan, kon magkara ako sa inyo nga nagapamolong sa dila, ano bala ang mapulus ninyo sa akon kon wala ako nagadala sa inyo sing bugna ukon pagkilala ukon pagpanagna ukon pagpanudlo? 7Kon ang mga gamit nga walay kabuhi, subong sang lantoy ukon arpa, wala sing maathag nga tonog, paano bala ang pagkilala kon ano ang ginalanton? 8Kag kon ang budyong indi magtonog sing maathag, sin-o bala ang maga-aman sa pag-awayan? 9Amo man kamo; kon magmitlang kamo sa dila sing polong nga indi mahangpan, paano bala ang pagkilala sang iban kon ano ang ginapamolong? Kay magapamolong kamo sa hangin. 10Sa walay duhaduha may nagakasarisari nga mga hambal sa kalibutan, kag walay isa nga walay kahologan; 11apang kon indi ako makahibalo sang kahologan sang hambal, mangindumuloong ako sa nagapamolong kag ang nagapamolong mangindumuloong sa akon. 12Amo man kamo; sanglit nga makugi kamo sa mga pagpahayag sang Espiritu, tinguhaa ninyo nga maglandas kamo sa pagpalig-on sang iglesia.
13Busa, ang nagapamolong sa dila magpangamuyo nga hatagan sia sing gahum sa pagpatpat. 14Kay kon ako nagapangamuyo sa dila, nagapangamuyo ang akon espiritu apang ang akon paghangup walay bunga. 15Ano bala ang himoon ko? Magapangamuyo ako nga may espiritu kag magapangamuyo ako nga may paghangup man; magaambahan ako nga may espiritu kag magaambahan ako nga may paghangup man. 16Kon indi, kon ikaw nagapakamaayo#14:16 Kon sayoron nagapasalamat sa Dios. sa espiritu, paano bala ang pagsiling sang isa nga tagaluwas#14:16 Ukon sia nga walay mga hiyas. “Kabay pa” sa imo mga pagpasalamat kon wala sia makahibalo sang imo ginasiling? 17Kay ikaw sa pagkamatuud makapasalamat sing maayo, apang ang iban nga tawo wala ginapalig-on. 18Nagapasalamat ako sa Dios nga nagapamolong ako sa mga dila sing labi pa sa inyo tanan; 19walay sapayan, sa iglesia maayo pa nga maghambal ako sing lima ka polong nga may paghangup, agud nga matudloan ko ang iban, sang sa isa ka laksa nga polong sa dila.
20Mga kauturan, dili kamo magpakabata sa painoino; magpakabata kamo sa kalautan, apang magpakahamtong kamo sa painoino. 21Sa kasogoan nasulat na, “Paagi sa mga tawo nga dumoloong sing mga hambal kag sa mga bibig sang mga dumoloong magapamolong ako sa sining katawohan, kag bisan pa indi sila magpamati sa akon, nagasiling ang Ginoo.”#Isa. 28:11-12. 22Gani, ang mga hambal sa dila isa ka tanda indi sa mga nagatoo kondi sa mga dimatinoohon, apang ang pagpanagna isa ka tanda indi sa mga dimatinoohon kondi sa mga nagatoo. 23Busa kon ang bug-os nga iglesia magtipon sing tingub kag ang tanan nagahambal sa dila, kag may magsulud nga mga tagaluwas ukon dimatinoohon, indi bala magsiling sila nga mga buang kamo? 24Apang kon ang tanan nagapanagna, kag may magsulud nga isa nga dimatinoohon ukon tagaluwas, ginasabdong sia sang tanan, ginahukman sia sang tanan, 25ginapadayag ang mga tinago sang iya tagiposoon; kag magahapa sia kag magasimba sa Dios, nga nagaasoy nga ang Dios totoo nga yara sa inyo.
26Niyan ano bala, mga kauturan? Kon nagatipon kamo, ang tagsatagsa may salmo, may pagtolon-an, may bugna, may hambal sa dila, ukon may pagpatpat. Himoon ang tanan nga sa pagpalig-on. 27Kon ang bisan sin-ong tawo maghambal sa dila, himoon ina sang duha ukon maglabi sang tatlo, kag bulusbulus; kag magpatpat ang isa. 28Apang kon wala sing manugpatpat, maghipus ang tagsa sa ila sa iglesia kag maghambal sia sa iya kaugalingon kag sa Dios. 29Ang duha ukon tatlo ka manalagna maghambal, kag magbinagbinag ang iban sang ginsiling. 30Kon may bugna sa isa nga nagalingkod, maghipus ang nahauna. 31Kay kamo tanan makapanagna sing tag-isaisa, agud nga ang tanan makatoon kag ang tanan malaygayan; 32kag ang mga espiritu sang mga manalagna ginapasakup sa mga manalagna. 33Kay ang Dios indi Dios sang kagamo kondi sang paghidait.
Subong sa tanan nga mga iglesia sang mga balaan, 34ang mga babayi maghipus sa mga iglesia. Kay wala ginatugut sa ila ang paghambal, apang magpasakup sila, subong sang ginasiling man sang kasogoan. 35Kon buut sila magtoon sing bisan ano, magpamangkot sila sa ila mga bana sa balay. Kay makahuluya sa babayi ang paghambal sa iglesia. 36Ano! Nagikan bala sa inyo ang polong sang Dios, ukon nag-abut bala ini sa inyo lamang?
37Kon ang bisan sin-o nga tawo nagahunahuna nga manalagna sia, ukon espirituhanon, magkilala sia nga ang ginasulat ko sa inyo isa ka sogo sang Ginoo. 38Kon ang bisan sin-o nga tawo wala nagakilala sini, indi pagsapaka sia. 39Gani, mga kauturan ko, handuma ninyo sing hanuut ang pagtagna, kag dili magdumili sa paghambal sa dila; 40apang ang tanan nga butang himoon sing nagakaigo kag mahusay.
Currently Selected:
1 CORINTO 14: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
