1 CORINTO 15
15
Ang Pagkabanhaw sang mga Patay
1Karon ginapahanumdum ko sa inyo, mga kauturan, ang maayong balita nga ginwali ko sa inyo, nga ginbaton man ninyo, nga sa sini nagatindug kamo, 2nga paagi sini naluwas kamo, kon ginahuptan ninyo sing malig-on ini—luwas kon nagtoo kamo sing walay pulus.
3Kay sa nahauna ginpaliton ko sa inyo ang akon man nabaton, nga si Cristo napatay tungud sa aton mga sala sono sa mga kasulatan,#Isa. 53:5-12. 4nga ginlubung sia, nga ginbanhaw sia sa ikatlong adlaw sono sa mga kasulatan,#Sal. 16:8-10; Os. 6:2. 5kag nga nagpahayag sia kay Cefas,#Luc. 24:34. ugaling sa napulog duha.#Mat. 28:16-17; Mar. 16:14; Luc. 24:36; Juan 20:19. 6Ugaling nagpahayag sia sa kapin sa lima ka gatus ka mga kauturan sa isa ka tion, nga ang kalabanan sa ila nagakabuhi pa tubtub karon, apang ang iban nagakatolog#15:6 Ukon napatay. na. 7Ugaling nagpahayag sia kay Santiago, ugaling sa tanan nga pinadala. 8Sa katapusan sang tanan, nagpahayag sia sa akon man,#Binu. 9:3-6. nga subong sang natawo sa indi pa ang tion. 9Kay ako amo ang labing kubus sa mga pinadala, nga indi takus pagtawgon nga pinadala, bangud nga ginhingabut ko ang iglesia sang Dios.#Binu. 8:3. 10Apang sa bugay sang Dios amo ako nga amo ako, kag ang iya bugay nga ginhatag sa akon wala manginwalay pulus. Kondi nagpangabudlay ako sing labi pa sa ila tanan, apang indi ako, kondi ang bugay sang Dios nga yari sa akon. 11Bisan ako ukon sila, amo ini ang ginawali namon kag amo ini ang gintoohan ninyo.
12Karon kon si Cristo ginawali nga nabanhaw, paano bala nga nagasiling ang iban sa inyo nga walay pagkabanhaw? 13Apang kon walay pagkabanhaw, niyan wala mabanhaw si Cristo; 14kon si Cristo wala mabanhaw, niyan walay pulus ang amon pagwali kag walay pulus ang inyo pagtoo. 15Nasapwan kami nga dimatuud nga mga saksi sang Dios, bangud nga nagsaksi kami nahanungud sa Dios nga ginbanhaw niya si Cristo, nga wala niya pagbanhawa kon matuud nga ang mga patay wala ginabanhaw. 16Kay kon ang mga patay wala ginabanhaw, niyan wala mabanhaw si Cristo. 17Kon wala mabanhaw si Cristo, ang inyo pagtoo walay pulus kag yara pa kamo sa inyo mga sala. 18Niyan sila man nga nagakatolog kay Cristo nawala. 19Kon ang paglaum ta kay Cristo sa sining kabuhi lamang, labi kakailo kita sa tanan nga tawo.
20Apang karon si Cristo nabanhaw, ang panganay sang mga nagakatolog.#15:20 Ukon napatay. 21Sanglit kay bangud sa tawo nag-abut ang kamatayon, bangud man sa tawo ang pagkabanhaw. 22Kay subong nga kay Adam ang tanan nagakalamatay, amo man kay Cristo ang tanan buhion. 23Apang ang tagsa sa iya kaugalingon nga paagisud: si Cristo ang panganay, ugaling ang mga iya ni Cristo sa pag-abut niya. 24Niyan ang katapusan, kon matugyan niya ang ginharian sa Dios nga Amay sa tapus nga nalaglag niya ang tanan nga pagdumala kag ang tanan nga pagbulut-an kag gahum. 25Kay kinahanglan sia maghari tubtub nga mabutang niya ang iya tanan nga kaaway sa idalum sang iya mga tiil.#Sal. 110:1. 26Ang katapusan nga kaaway nga laglagon amo ang kamatayon. 27“Kay ang tanan nga butang ginpasakup sang Dios sa idalum sang iya mga tiil.”#Sal. 8:6. Apang ang ginasiling, “Ang tanan nga butang ginpasakup sa iya,” maathag nga wala malakip ang nagpasakup sang tanan nga butang sa iya. 28Kon napasakup na ang tanan nga butang sa iya, niyan ang Anak man magapasakup sa iya nga nagpasakup sang tanan nga butang sa iya, agud nga ang Dios mangintanan sa tanan.
29Sa isa ka bagay, ano bala ang buut silingon sang mga tawo nga nagapabautiso tungud sa mga patay? Kon ang mga patay wala nga mas-a ginabanhaw, ngaa bala nagapabautiso ang katawohan tungud sa ila? 30Ngaa bala nga ako yari sa katalagman sa tagsa ka takna? 31Nagapamatuud ako, mga kauturan, bangud sang akon paghimaya sa inyo nga akon sa kay Cristo Jesus nga aton Ginoo, nagakapatay ako adlawadlaw! 32Kon sono sa paagi sang mga tawo nagpakig-away ako sa mga sapat sa Efeso, ano bala ang mapulus ko? Kon ang mga patay wala ginabanhaw, “Magkaon kita kag mag-inum, kay buwas mapatay kita.”#Isa. 22:13. 33Dili kamo magtalang: “Ang malaut nga mga paghiliupud nagadunut sang maayo nga mga pamatasan.” 34Pagmata kamo sa pagkabut-anan, kag dili magpakasala. Kay ang iban walay pagkilala sa Dios. Ginahambal ko ini sa kahuluy-an ninyo.
Ang Lawas sa Pagkabanhaw
35Apang magasiling ang isa, “Paano bala ang pagbanhaw sang mga patay? Sa ano bala nga bagay sang lawas sila magabalik?” 36Buangbuang! Ang imo ginasab-ug indi mabuhi kon indi mapatay. 37Kag ang ginasab-ug mo indi ang lawas nga mangin-amo, kondi ang uyas lamang, ayhan sang trigo ukon sang iban nga uyas. 38Apang ang Dios nagahatag sini sing lawas sono sa nahamut-an niya, kag sa tagsa ka binhi isa ka lawas nga iya kaugalingon. 39Ang tanan nga unud indi alangay, kondi isa ka unud ang sa mga tawo, tuhay nga unud ang sa mga sapat, tuhay ang sa mga pispis, kag tuhay ang sa mga isda. 40May mga lawas man nga langitnon kag mga lawas nga dutan-on; apang ang himaya sang langitnon isa ka bagay, kag tuhay ang himaya sang dutan-on. 41Tuhay ang himaya sang adlaw, kag tuhay ang himaya sang bulan, kag tuhay ang himaya sang mga bitoon; kay ang isa ka bitoon tuhay sa isa ka bitoon sa himaya.
42Amo man ang pagkabanhaw. Ginasab-ug sa pagkamadinulunton, ginabanhaw sa pagkadimadinulunton. 43Ginasab-ug ini sa kahuluy-an, ginabanhaw sa himaya. Ginasab-ug ini sa kaluyahon, ginabanhaw sa gahum. 44Ginasab-ug ini nga lawas nga unudnon, ginabanhaw nga lawas nga espirituhanon. Kon may lawas nga unudnon, may lawas man nga espirituhanon. 45Sa amo nasulat na, “Ang nahaunang tawo nga si Adam nanginbuhi nga kalag”;#Gen. 2:7. ang katapusan nga Adam nangin-espiritu nga manughatag sing kabuhi. 46Apang ang espirituhanon indi ang nahauna kondi ang unudnon, kag ugaling ang espirituhanon. 47Ang nahaunang tawo gikan sa duta, dutan-on; ang ikaduhang tawo gikan sa langit. 48Kon ano ang tawong dutan-on, amo man ang mga dutan-on; kag kon ano ang tawong langitnon, amo man ang mga langitnon. 49Subong nga ginadala naton ang larawan sang tawong dutan-on, dalhon ta man ang larawan sang tawong langitnon. 50Ginasiling ko ini sa inyo, mga kauturan: ang unud kag dugo indi makapanubli sang ginharian sang Dios, kag ang pagkamadinulunton indi makapanubli sang pagkadimadinulunton.
Pagdaug batok sa Kamatayon
(1 Tes. 4:13-18)
51Yari karon! Nagasugid ako sa inyo sing tinago. Indi kita tanan magatolog, kondi kita tanan pamaylohan, 52sa isa ka tion, sa isa ka pagpamisok, sa katapusan nga budyong. Kay magatonog ang budyong, kag ang mga patay banhawon nga dimadinulunton, kag pamaylohan kita.#1 Tes. 4:15-17. 53Kay ining madinulunton kinahanglan magsuklub sang pagkadimadinulunton, kag ining mamalatyon kinahanglan magsuklub sang pagkadimamalatyon. 54Kon magsuklub ining madinulunton sang pagkadimadinulunton, kag ining mamalatyon magsuklub sang pagkadimamalatyon, niyan matuman ang polong nga nasulat na,
“Ang kamatayon ginlamon sa pagdaug.”#Isa. 25:8.
55“O kamatayon, diin bala ang imo pagdaug?
O kamatayon, diin bala ang imo sudlot?”#Os. 13:14.
56Ang sudlot sang kamatayon amo ang sala, kag ang gahum sang sala amo ang kasogoan. 57Apang salamat sa Dios, nga nagahatag sa aton sang pagdaug paagi sa aton Ginoong Jesu-Cristo.
58Busa, mga kauturan ko nga hinigugma, magpakalig-on kamo, nga dimationg, nga nagabugana gihapon sa buluhaton sang Ginoo, sa nahibaloan ninyo nga ang inyo pagpangabudlay indi walay pulus sa Ginoo.
Currently Selected:
1 CORINTO 15: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
