1 MGA CRONICA 19
19
Ang mga Amonhon kag ang mga Sirianhon Gindaug
(2 Sam. 10:1-19)
1Karon sa tapus sini napatay si Nahas nga hari sang mga Amonhon, kag naghari nga tal-us niya ang iya lalaking anak. 2Kag si David nagsiling, “Ako magapakita sing kalolo kay Hanun nga lalaking anak ni Nahas, bangud nga ang iya amay nagpakita sing kalolo sa akon.” Gani nagpadala si David sing mga manugbalita sa paglipay sa iya nahanungud sang iya amay. Kag ang mga alagad ni David nag-abut sa duta sang mga Amonhon kay Hanun, sa paglipay sa iya. 3Apang ang mga principe sang mga Amonhon nagsiling kay Hanun, “Nagahunahuna ka bala nga si David nagapadungug sa imo amay, sa bagay nga nagpadala sia sing mga manuglipay sa imo? Wala bala magkari ang iya mga alagad sa pag-usisa kag sa paglaglag kag sa paglampitaw sang duta?” 4Gani gindakup ni Hanun ang mga alagad ni David, kag ginkiskisan sila, kag ginguhaban ang ila mga panapton sa tunga, tubtub sa ila mga buli, kag ginpalakat sila. 5Niyan may pila ka tawo nga naglakat kag nagsugid kay David kon paano ang pagtatap sa mga tawo. Nagpadala sia sa pagsugata sa ila, kay ang mga tawo nahuya sing daku. Kag ang hari nagsiling, “Pabilin kamo sa Jerico tubtub nga magtubo ang inyo bungut, kag ugaling magpauli.”
6Sang nakita sang mga Amonhon nga nanginmangil-ad sila kay David, si Hanun kag ang mga Amonhon nagpadala sing isa ka libo ka talanton nga pilak sa paghinakay sing mga kangga kag mga manugkabayo gikan sa Mesopotamia, gikan sa Aram-maaca, kag gikan sa Soba. 7Ginhinakayan nila sila sang katloan kag duha ka libo ka mga kangga kag ang hari sang Maaca pati ang iya katawohan, nga nag-abut kag nagpahamtang sing dologan sa atubangan sang Medeba. Kag nagtipon sing tingub ang mga Amonhon gikan sa ila mga banwa kag nagkadto sa pag-away. 8Sang nakabati sini si David, ginpadala niya si Joab kag ang bug-os nga kasoldadosan sang gamhanan nga mga lalaki. 9Kag naggowa ang mga Amonhon kag nagpaagisud sa inaway sa gawang sang banwa, kag ang mga hari nga nag-abut didto sila ila sa latagon.
10Sang nakita ni Joab nga ang inaway napahamtang batok sa iya sa atubangan kag sa likod, nagpili sia sa tanan nga pinili nga lalaki sang Israel, kag ginpaagisud sila batok sa mga Sirianhon; 11ang nabilin sang katawohan gintugyan niya sa kamut ni Abisai nga iya utud nga lalaki, kag nagpaagisud sila ila batok sa mga Amonhon. 12Kag sia nagsiling, “Kon ang mga Sirianhon mangintama kabakud sa akon, niyan buligan mo ako; apang kon ang mga Amonhon mangintama kabakud sa imo, niyan ako magabulig sa imo. 13Magpakaisug, kag magpakalalaki kita tungud sa aton katawohan, kag tungud sa mga banwa sang aton Dios; kag himoon sang Ginoo ang maayo sa iya.” 14Gani si Joab kag ang katawohan nga nag-upud sa iya nagpalapit sa inaway sa atubangan sang mga Sirianhon; kag sila nagpalagyo gikan sa atubangan niya. 15Kag sang nakita sang mga Amonhon nga ang mga Sirianhon nagpalagyo, sila man nagpalagyo gikan sa atubangan ni Abisai, nga utud ni Joab, kag nagsulud sa banwa. Niyan si Joab nagsulud sa Jerusalem.
16Apang sang nakita sang mga Sirianhon nga gintamaan sila sa atubangan sang Israel, nagpadala sila sing mga manugbalita kag ginpagowa nila ang mga Sirianhon nga didto sa tabok sang Suba, upud kay Sofac nga pangolo sang kasoldadosan ni Hadarezer nga nagdumala sa ila. 17Kag sang ginsugid ini kay David, gintipon niya sing tingub ang bug-os nga Israel, kag nagtabok sa Jordan, kag nag-abut sa ila, kag nagpahamtang sing paagisud sa inaway batok sa ila. Gani sang nakaagisud na sa inaway si David batok sa mga Sirianhon, nagpakig-away sila sa iya. 18Kag ang mga Sirianhon nagpalagyo gikan sa atubangan sang Israel; kag ginpatay ni David sa Sirianhon ang mga tawo sang pito ka libo ka kangga, kag kap-atan ka libo ka hangaway nga nagalakat, kag ginpatay si Sofac nga pangolo sang kasoldadosan. 19Kag sang nakita sang mga alagad ni Hadarezer nga natamaan sila sa atubangan sang Israel, nagpakighidait sila kay David, kag nag-alagad sa iya. Gani ang mga Sirianhon indi na magbulig sa mga Amonhon.
Currently Selected:
1 MGA CRONICA 19: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
