1 MGA CRONICA 18
18
Si David Nagapasangkad sang Iya Ginharian
(2 Sam. 8:1-14)
1Sa tapus sini gingubat ni David ang mga Filistinhon kag gindaug sila, kag gin-agaw ang Gat kag ang iya mga minoro sa kamut sang mga Filistinhon.
2Kag gingubat niya ang Moab, kag ang mga Moabnon nangin-alagad kay David kag nagdala sing buhis.
3Gingubat ni David si Hadarezer nga hari sang Soba, sa Hamat, sang nagkadto sia sa pagpalig-on sang iya ginsakpan sa ubay sang suba nga Eufrates. 4Kag si David nag-agaw sa iya sing isa ka libo ka kangga, pito ka libo ka manugkabayo, kag duha ka pulo ka libo ka hangaway nga nagalakat; kag ginkitinan ni David ang tanan nga kabayo sa kangga, apang ginhawiran sa ila ang sa isa ka gatus ka kangga. 5Kag sang nag-abut ang mga Sirianhon sang Damasco sa pagtabang kay Hadarezer nga hari sang Soba, ginpatay ni David sa mga Sirianhon ang duha ka pulo kag duha ka libo ka tawo. 6Niyan si David nagbutang sing mga pamakud nga balantayan sa Siria sang Damasco; kag ang mga Sirianhon nangin-alagad kay David, kag nagdala sing buhis. Kag ginpadaug sang Ginoo si David sa bisan diin magkadto sia. 7Kag ginkuha ni David ang mga taming nga bulawan nga yara sa mga alagad ni Hadarezer, kag gindala sila sa Jerusalem. 8Kag sa Tibha kag sa Cun, mga banwa ni Hadarezer, nagkuha si David sing madamu gid nga saway; sa sini naghimo si Salomon sing dagat nga saway kag mga haligi kag mga gamit nga saway.#1 Hari 7:40-47; 2 Cron. 4:11-18.
9Sang si Tou nga hari sang Hamat nakabati nga si David nagdaug sang bug-os nga kasoldadosan ni Hadarezer nga hari sang Soba, 10ginpadala niya si Hadoram nga iya lalaking anak kay Hari David, sa pag-abiabi sa iya, kag sa pagpangibulahan sa iya bangud nga nagpakig-away sia kay Hadarezer kag gindaug sia; kay si Hadarezer nag-away kay Tou. Kag gindala ni Hadoram ang tanan nga sari sang mga gamit nga bulawan kag pilak kag saway; 11ini sila man ginhalad ni Hari David sa Ginoo, pati sang pilak kag bulawan nga gindala niya gikan sa tanan nga pungsud, gikan sa Edom, sa Moab, sa mga Amonhon, sa mga Filistinhon, kag sa Amalec.
12Kag si Abisai nga anak nga lalaki ni Sarvia nagpatay sang mga Edomnon sa Nalupyakan sang Asin#Sal. 60 Titulo. sang napulo kag walo ka libo. 13Kag ginbutangan niya sing mga pamakud nga balantayan sa Edom; kag ang bug-os nga Edomnon nangin-alagad kay David. Kag ginpadaug sang Ginoo si David bisan diin magkadto sia.
Ang mga Pangolo ni David
(2 Sam. 8:15-18; 20:23-26)
14Gani si David naghari sa bug-os nga Israel; kag ginhimo niya ang katarungan kag pagkamatarung sa bug-os niyang katawohan. 15Kag si Joab nga lalaking anak ni Sarvia manugdumala sang kasoldadosan; kag si Josafat nga lalaking anak ni Ahilud manugsulat sang maragtas; 16kag si Sadoc nga lalaking anak ni Ahitub kag si Abimelec nga lalaking anak ni Abiatar mga sacerdote; kag si Savsa escriba; 17kag si Benaya nga lalaking anak ni Joiada manugdumala sang mga Keretnon kag mga Peletnon; kag ang mga lalaking anak ni David mga puno sa palibut sang hari.
Currently Selected:
1 MGA CRONICA 18: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
