1 MGA CRONICA 20
20
Si David Nagaagaw sang Raba
(2 Sam. 12:26-31)
1Sa pagsapul sang tuig, sa tion nga nagagowa ang mga hari sa pag-away, gindala ni Joab ang hangaway, kag ginlaglag ang duta sang mga Amonhon, kag nagkadto kag ginkibon ang Raba. Apang si David nagpabilin sa Jerusalem.#2 Sam. 11:1. Kag ginsolong ni Joab ang Raba, kag ginlaglag ini. 2Kag ginkuha ni David ang purungpurung sang ila hari sa iya olo; nakita ini nga nagatimbang sing isa ka talanton nga bulawan, kag ini may mga bato nga bilidhon; kag ginbutang ini sa olo ni David. Kag nagdala sia sing tama kabugana nga inagaw gikan sa banwa. 3Kag ginpagowa niya ang katawohan nga yadto didto, kag ginpalagari sila kag ginpapakalas sang salsalon kag ginpapawasay; kag amo ini ang ginhimo ni David sa tanan nga banwa sang mga Amonhon. Niyan si David kag ang bug-os nga katawohan nagbalik sa Jerusalem.
Ang mga Gigante Ginpatay sang mga Tawo ni David
(2 Sam. 21:18-22)
4Kag sa tapus sini may inaway sa Gezer batok sa mga Filistinhon; niyan si Sibecai nga Husatnon nagpatay kay Sipai, sa mga lalaking anak sang gigante; kag gindaug ang mga Filistinhon. 5Kag may inaway liwat batok sa mga Filistinhon; kag si Elhanan nga lalaking anak ni Jair nagpatay kay Lami nga utud nga lalaki ni Goliat nga Gethanon, nga ang olongan sang iya bangkaw kaangay sang likisan sang manughabol.#1 Sam. 17:4-7. 6Kag may inaway liwat sa Gat, diin may lalaki nga layog, nga ang iya mga tudlo sa kamut kag sa tiil duha ka pulo kag apat, anum sa tagsa ka kamut, kag anum sa tagsa ka tiil; kag sia man natawo sa gigante. 7Kag sang ginhangkat niya ang Israel, si Jonatan nga lalaking anak ni Simea, nga lalaking utud ni David, nagpatay sa iya. 8Ini sila natawo sa gigante sa Gat; kag nagpukan sila paagi sa kamut ni David kag paagi sa kamut sang iya mga alagad.
Currently Selected:
1 MGA CRONICA 20: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
