1 MGA CRONICA 15
15
Ang Kaban Gindala sa Jerusalem
(2 Sam. 6:12-23)
1Naghimo si David sing mga balay sa iya sa banwa ni David; kag nagaman sia sing duug nga sa kaban sang Dios, kag ginpatindugan ini sing layanglayang. 2Niyan si David nagsiling, “Wala sing bisan sin-o nga magdala sang kaban sang Dios kondi ang mga Levinhon, kay ginpili sila sang Ginoo sa pagdala sang kaban sang Dios kag sa pag-alagad sa iya sing dayon.”#Deut. 10:8. 3Kag gintipon ni David ang bug-os nga Israel sa Jerusalem, sa pagpataklad sang kaban sang Ginoo sa iya duug, nga gin-aman niya tungud sini. 4Kag gintipon sing tingub ni David ang mga anak nga lalaki ni Aaron kag ang mga Levinhon: 5sa mga anak nga lalaki ni Coat, si Uriel ang puno, kag ang iya mga utud isa ka gatus kag duha ka pulo; 6sa mga anak nga lalaki ni Merari, si Asaya ang puno, kag ang iya mga utud duha ka gatus kag duha ka pulo; 7sa mga anak nga lalaki ni Gersom, si Joel ang puno, kag ang iya mga utud isa ka gatus kag katloan; 8sa mga anak nga lalaki ni Elizafan, si Semaya ang puno, kag ang iya mga utud duha ka gatus; 9sa mga anak nga lalaki ni Hebron, si Eliel ang puno, kag ang iya mga utud kawaloan; 10sa mga anak nga lalaki ni Uziel, si Aminadab ang puno, kag ang iya mga utud isa ka gatus kag napulo kag duha. 11Niyan gintawag ni David si Sadoc kag si Abiatar nga mga sacerdote, kag ang mga Levinhon nga si Uriel, si Asaya, si Joel, si Semaya, si Eliel, kag si Aminadab, 12kag nagsiling sa ila, “Kamo mga pangolo sang mga kabaranggayan sang mga Levinhon; magpakabalaan kamo, kamo kag ang inyo mga utud, agud nga mapataklad ninyo ang kaban sang Ginoo, ang Dios sang Israel, sa gin-aman ko tungud sini. 13Bangud nga wala ninyo pagdalha ini sang una, ang Ginoo nga aton Dios nagbulwang sa aton, kay wala naton sia pagpangitaa sono sa pagsolondan.” 14Gani ang mga sacerdote kag ang mga Levinhon nagpakabalaan sang ila mga kaugalingon sa pagpataklad sang kaban sang Ginoo, ang Dios sang Israel. 15Kag ginyayongan sang mga anak sang mga Levinhon ang kaban sang Dios sa ila mga abaga sa iya mga yayongan sini, subong sang ginsogo ni Moises sono sa polong sang Ginoo.#Ex. 25:14.
16Si David nagpamolong man sa puno sang mga Levinhon sa pagtangdo sang ila mga utud nga mga manug-amba, nga may mga tolonggon, mga salterio kag mga arpa kag mga apiping, nga nagapatonog sing mabaskug kag nagabayaw sang tingug nga may kasadya. 17Gani ang mga Levinhon nagtangdo kay Heman nga anak nga lalaki ni Joel; kag sa iya mga utud nga si Asaf nga anak nga lalaki ni Berequias; kag sa mga anak nga lalaki ni Merari, nga ila mga utud, si Etan nga anak nga lalaki ni Cusaias; 18kag upud sa ila ang ila mga pakaduha, si Zacarias, si Ben, si Jaazal, si Semiramot, si Jehiel, si Uni, si Eliab, si Benaya, si Maasias, si Matitias, si Elifelehu, kag si Micnias, kag si Obed-edom, kag si Jeiel, nga mga manugbantay sang gawang. 19Gani ang mga manug-amba, si Heman, si Asaf kag si Etan may mga apiping nga saway sa pagpatonog; 20si Zacarias, si Aziel, si Semiramot, si Jehiel, si Uni, si Eliab, si Maasias, kag si Benaya, may mga salterio nga nabagay sa Alamot; 21apang si Matitias, si Elifelehu, si Micnias, si Obed-edom, si Jeiel, kag si Azazias, may mga arpa nga nabagay sa Seminit sa pagdumala. 22Si Kenanias, puno sang mga Levinhon, nagdumala sang ambahanon, nagtudlo sia sang ambahanon, bangud nga sampaton sia. 23Si Berequias kag si Elcana mga manugbantay sang gawang nga sa kaban. 24Si Sebanias, si Josafat, si Natanael, si Amasai, si Zacarias, si Benaya, kag si Eliezer, ang mga sacerdote, nagpatonog sang mga budyong sa atubangan sang kaban sang Dios. Si Obed-edom kag si Jehias mga manugbantay sang gawang nga sa kaban.
25Gani si David kag ang mga tigulang sang Israel, kag ang mga pangolo sang linibo, nagkadto sa pagpataklad sang kaban sang katipan sang Ginoo gikan sa balay ni Obed-edom nga may kasadya. 26Kag sang ginbuligan sang Dios ang mga Levinhon nga nagyayong sang kaban sang katipan sang Ginoo, naghalad sila sing pito ka tinday nga baka nga lalaki kag pito ka carnero nga lalaki. 27Si David napanaptan sing kunup nga lino nga manipis, kag ang tanan nga Levinhon nga nagyayong sang kaban, kag ang mga manug-amba, kag si Kenanias nga pangolo sang ambahanon upud sang mga manug-amba; kag kay David may natakud nga efod nga lino. 28Sa amo ginpataklad sang bug-os nga Israel ang kaban sang katipan sang Ginoo nga may hinugyaw, may tonog sang corneta, may mga budyong, kag may mga apiping, nga nagapatonog sing mabaskug upud sa mga salterio kag mga arpa.
29Kag sang pagsulud sang kaban sang katipan sang Ginoo sa banwa ni David, si Micol nga babayi nga anak ni Saul naggawa sa talambuan, kag nakita si Hari David nga nagasaut kag nagasayaw; kag gintamay niya sia sa iya tagiposoon.
Currently Selected:
1 MGA CRONICA 15: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
