1 MGA CRONICA 16
16
1Kag ginpasulud nila ang kaban sang Dios, kag ginpahamtang ini sa tunga sang layanglayang nga ginpatindug ni David sa iya; kag nagdolot sila sang mga halad-nga-sinonog kag mga halad-sa-paghidait sa atubangan sang Dios. 2Kag sang pagkatapus ni David pagdolot sang halad-nga-sinonog kag sang mga halad-sa-paghidait, ginpakamaayo niya ang katawohan sa ngalan sang Ginoo, 3kag ginpanagtag niya sa tagsatagsa sang Israel, sa lalaki kag babayi, sa tagsatagsa ang isa ka bilog nga kalan-onon, isa ka gulut nga unud, kag isa ka pighol nga pasas.
4Labut pa gintangdo niya sa atubangan sang kaban sang Ginoo ang pila sang mga Levinhon sa pag-alagad, sa pagsaolog, sa pagpasalamat, kag sa pagdayaw sa Ginoo, ang Dios sang Israel. 5Si Asaf ang puno, kag si Zacarias ang ikaduha sa iya, si Jeiel, si Semiramot, si Jehiel, si Matitias, si Eliab, si Benaya, si Obed-edom, kag si Jeiel, nga may mga salterio kag mga arpa; si Asaf nga may mga apiping, sa pagpatonog sing mabaskug, 6kag ang mga sacerdote nga si Benaya kag si Jahaziel may mga budyong sing dalayon, sa atubangan sang kaban sang katipan sang Dios.
Mga Salmos ni David sa Pagpasalamat
(Sal. 105:1-15; 96:1-13; 106:47-48)
7Niyan sa sadtong adlaw nagtangdo sing nahauna si David sa pagpasalamat sa Ginoo paagi sa kamut ni Asaf kag sang iya mga utud.
8O pasalamat kamo sa Ginoo, tawga ang iya ngalan,
ipakilala ninyo ang iya mga binuhatan sa mga katawohan!
9Amba kamo sa iya, amba sing mga pagdayaw sa iya,
hambal kamo sang tanan niya nga makatilingala nga mga binuhatan!
10Himaya kamo sa iya balaan nga ngalan;
magkalipay ang mga tagiposoon sang mga nagapangita sa Ginoo!
11Pangitaa ninyo ang Ginoo kag ang iya kusug,
pangitaa sa gihapon ang iya nawung!
12Dumduma ang iya makatilingala nga mga binuhatan nga nahimo niya,
ang iya mga kalatingalahan, ang mga paghukom sang iya baba,
13O kamo nga kaliwat ni Israel nga iya alagad,
kamo nga mga anak ni Jacob, nga iya mga pinili!
14Sia ang Ginoo nga aton Dios;
sa bug-os nga duta yara ang iya mga paghukom.
15Dumduma ang iya katipan sa gihapon,
ang polong nga ginsogo niya, sa linibong mga kaliwatan,
16ang katipan nga ginhimo niya upud kay Abraham,#Gen. 12:7.
ang iya sumpa kay Isaac,#Gen. 26:3.
17nga ginpalig-on niya kay Jacob nga palatukuran,
kay Israel sa dayon nga katipan,
18nga nagasiling, “Sa imo ihatag ko ang duta sang Canaan,
ang bahin nga inyo panublion.”#Gen. 28:13.
19Sang kamo pila pa lamang ka tawo kadamuon,
hoo, pila gid lamang, kag mga manlulugayaw sa iya,
20nga nagasaylosaylo gikan sa pungsud pa pungsud,
gikan sa isa ka ginharian pa isa ka katawohan,
21wala sia magtugut sing tawo nga maghimo sing malain sa ila;
hoo, bangud sa ila ginbadlong niya ang mga hari,
22nga nagasiling, “Dili pagtanduga ang akon mga hinaplas,
dili pagsakita ang akon mga manalagna!”#Gen. 20:3-7.
23Amba kamo sa Ginoo, bug-os nga duta!
Ipahayag sa adlawadlaw ang iya kaluwasan.
24Isugid ang iya himaya sa tunga sang mga pungsud,
ang iya makatilingala nga mga binuhatan sa tanan nga katawohan!
25Kay daku ang Ginoo, kag pagdayawon sing daku,
sia man kahadlukan labaw sa tanan nga dios.
26Kay ang tanan nga dios sang mga katawohan mga diosdios;
apang ang Ginoo naghimo sang mga langit.
27Kadungganan kag pagkahalangdon yara sa atubangan niya;
kabaskug kag kalipay yara sa iya duug.
28Ipahanungud sa Ginoo, O mga panimalay sang mga katawohan,
ipahanungud sa Ginoo ang himaya kag kusug!
29Ipahanungud sa Ginoo ang himaya nga nagakaigo sa iya ngalan;
dala kamo sing halad, kag kadto sa atubangan niya!
Simbaha ang Ginoo sa balaan nga pagpanaput;
30kurug sa atubangan niya, bug-os nga duta;
ang kalibutan man ginpalig-on, nga indi mationg.
31Magkasadya ang kalangitan, kag magkalipay ang duta,
kag magsiling sa tunga sang mga pungsud, “Ang Ginoo nagahari!”
32Magdaguhub ang dagat, kag ang iya kabug-osan,
magkasadya ang latagon, kag ang tanan nga yara sa iya!
33Niyan ang mga kahoy sang kagulangan magaamba sa kalipay
sa atubangan sang Ginoo, kay nagakari sia sa paghukom sang duta.
34O magpasalamat kamo sa Ginoo, kay maayo sia;
kay ang iya malig-on nga paghigugma nagapadayon sa gihapon!#2 Cron. 5:13; 7:3; Esd. 3:11; Sal. 100:5; 106:1; 107:1; 118:1; Jer. 33:11.
35Isiling man ninyo:
“Luwasa kami, O Dios sang amon kaluwasan,
kag tipona kami sing tingub kag luwasa kami sa mga pungsud,
sa pagpasalamat sa imo balaan nga ngalan,
kag sa pagdaug sa imo pagdayaw.
36Dalayawon ang Ginoo, ang Dios sang Israel,
kutub sa walay katubtuban tubtub gid sa walay katubtuban!”
Niyan ang bug-os nga katawohan nagsiling, “Kabay pa!” kag nagdayaw sa Ginoo.
Ang mga Levinhon Gintangdo nga sa Kaban
37Gani ginbilin ni David didto sa atubangan sang kaban sang katipan sang Ginoo si Asaf kag ang iya mga utud sa pag-alagad sing dalayon sa atubangan sang kaban sono sa ginkinahanglan sang buluhaton sa tagsa ka adlaw, 38kag si Obed-edom pati sang ila mga utud, kan-uman kag walo; samtang nga si Obed-edom, lalaking anak ni Jedutun, kag si Hosa mangin mga bantay sang gawang. 39Kag ginbilin niya si Sadoc nga sacerdote kag ang iya mga utud nga mga sacerdote sa atubangan sang kayangkayang sang Ginoo sa mataas nga duug nga yadto sa Gabaon, 40sa pagdolot sing mga halad-nga-sinonog sa Ginoo sa ibabaw sang halaran sang mga halad-nga-sinonog sing dalayon sa kaagahon kag sa kahaponon, sono sa tanan nga nasulat sa kasogoan sang Ginoo nga iya ginsogo sa Israel. 41Upud sa ila si Heman kag si Jedutun, kag ang iban nga napili-an nga nasambit sa ngalan sa pagpasalamat sa Ginoo, bangud nga ang iya malig-on nga paghigugma nagapadayon sa gihapon. 42Si Heman kag si Jedutun may mga budyong kag mga apiping sa mga magapatonog sing mabaskug kag may mga tulunggon sa mga ambahanon sang Dios. Ang mga lalaking anak ni Jedutun manginsa gawang.
43Niyan ang bug-os nga katawohan nagpauli ang tagsa ka tawo sa iya balay, kag si David nagpauli sa pagpakamaayo sang iya panimalay.#2 Sam. 6:19-20.
Currently Selected:
1 MGA CRONICA 16: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
