1 MGA CRONICA 14
14
Si Hiram Nagakilala kay David
(2 Sam. 5:11-12)
1Kag si Hiram nga hari sang Tiro nagpadala sing mga manugbalita kay David, kag mga kahoy nga cedro, mga cantero kag mga panday sa pagpatindug sa iya sing balay. 2Kag nahantupan ni David nga ang Ginoo nagpalig-on sa iya nga hari sa ibabaw sang Israel, kay ginbayaw ang iya ginharian tungud sa iya katawohan nga Israel.
Ang mga Anak ni David Natawo sa Jerusalem
(2 Sam. 5:13-16; 1 Cron. 3:5-9)
3Kag si David nagdugang pa sing mga asawa sa Jerusalem, kag si David nangin-amay sang madamu pa nga mga anak nga lalaki kag mga anak nga babayi. 4Ini sila amo ang mga ngalan sang mga anak niya sa Jerusalem: si Samua, si Sobab, si Natan, si Salomon, 5si Ibar, si Elisua, si Elpelet, 6si Noga, si Nefeg, si Jafia, 7si Elisama, si Beeliada, kag si Elifelet.
Si David Nagadaug sang mga Filistinhon
(2 Sam. 5:17-25)
8Sang nakabati ang mga Filistinhon nga si David ginhaplas nga hari sa ibabaw sang bug-os nga Israel, ang tanan nga Filistinhon nagtaklad sa pagpangita kay David; kag nakabati sini si David kag naggowa sa pag-atubang sa ila. 9Karon nag-abut ang mga Filistinhon kag naggubat sa nalupyakan sang mga Refaim. 10Kag si David nagpamangkot sa Dios, “Magataklad bala ako batok sa mga Filistinhon? Itugyan mo sila bala sa akon kamut?” Kag ang Ginoo nagsiling sa iya, “Taklad, kay itugyan ko sila sa imo kamut.” 11Gani nagtaklad sila sa Baal-perazim, kag didto ginlaglag sila ni David; kag si David nagsiling, “Ang Dios nagbulwang sang akon mga kaaway paagi sa akon kamut, kaangay sang pagbulwang sang mga tubig.” Busa ginhingalanan nila yadto nga duug Baal-perazim.#14:11 Kon sayoron Ang Ginoo sang mga pagbulwang. 12Kag ginbayaan nila didto ang ila mga dios, kag si David naghatag sing sogo, kag ginsonog sila sa kalayo.
13Kag ang mga Filistinhon naggubat pa liwat sa nalupyakan. 14Kag sang nagpamangkot liwat si David sa Dios, ang Dios nagsiling sa iya, “Dili ka magtaklad sa olihi nila; likaw ka sa ila kag sulunga sila sa atubang sang mga kahoy nga moral. 15Kag kon makabati ka sang linapaklapak sa mga tuyoktuyokan sang mga kahoy nga moral, niyan maggowa ka sa pag-away; kay ang Dios naggowa una sa imo sa paglaglag sang kasoldadosan sang mga Filistinhon.” 16Kag ginhimo ni David sono sa ginsogo sa iya sang Dios, kag ginlaglag nila ang kasoldadosan sang mga Filistinhon kutub sa Gabaon tubtub sa Gezer. 17Kag ang kabantugan ni David naglapnag sa bug-os nga kadutaan, kag ang Ginoo nagdala sang kahadluk sa iya sa tanan nga pungsud.
Currently Selected:
1 MGA CRONICA 14: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
