1 MGA CRONICA 13
13
Si David Naglakat sa Pagkuha sang Kaban
(2 Sam. 6:1-11)
1Si David nagpakigsapul sa mga pangolo sang mga linibo kag mga ginatus, sa tagsa gid sa pangolo. 2Kag si David nagsiling sa bug-os nga katilingban sang Israel, “Kon maayo sa inyo, kag kon ini gikan sa Ginoo nga aton Dios, magpadala kita sa luwas bisan diin sa aton mga utud nga nabilin sa duta sang Israel, nga ang mga sacerdote kag mga Levinhon nga yara sa ila mga banwa nga may mga halalban, nga magtilingub sila sa aton. 3Niyan ibalik naton sa aton ang kaban sang aton Dios; kay sa mga adlaw ni Saul wala kita magdangup sa sini.” 4Nagsiling ang bug-os nga katilingban nga himoon nila ang subong, kay ang butang matarung sa mga mata sang bug-os nga katawohan.
5Gani gintipon ni David sing tingub ang bug-os nga Israel kutub sa Sihor sang Egipto tubtub sa salamputan sang Hamat, sa pagdala sang kaban sang Dios gikan sa Kiryat-jearim.#1 Sam. 7:1-2. 6Kag nagtaklad si David kag ang bug-os nga Israel sa Baala, sa Kiryat-jearim nga iya sang Juda, sa pagpataklad gikan didto sang kaban sang Dios nga Ginoo nga nagalingkod sa ibabaw sang mga querubin,#Ex. 25:22. nga ginatawag sa Ngalan. 7Kag ginlulan nila ang kaban sang Dios sa bag-o nga karo, gikan sa balay ni Abinadab, kag si Uza kag si Ahio nagpaguyud sang karo. 8Kag si David kag ang bug-os nga Israel naglanton sa atubangan sang Dios sa bug-os nila nga kusug, nga may mga ambahanon kag may mga arpa kag may mga salterio kag may mga panderita kag may mga apiping kag may mga budyong.
9Kag sang pag-abut nila sa linasan ni Quidon, nag-untay si Uza sang iya kamut sa pagpugong sang kaban, kay ang mga baka naghublag. 10Kag ang kaakig sang Ginoo nagdabdab batok kay Uza; kag ginlaglag niya sia bangud nga ginpunggan niya sang iya kamut ang kaban; kag napatay sia didto sa atubangan sang Dios. 11Kag si David nagsingkal bangud nga ang Ginoo nagkirab kay Uza; kag ginhingalanan niya yadto nga duug Perez-uza#13:11 Kon sayoron Ang pagkirab kay Uza. tubtub sini nga adlaw. 12Kag si David nahadluk sa Dios sadtong adlaw; kag sia nagsiling, “Paano bala ang pagpapauli ko sa akon balay sang kaban sang Dios?” 13Gani wala paghalina ni David ang kaban pakadto sa iya pasulud sa banwa ni David, kondi ginpalikaw ini pasulud sa balay ni Obed-edom nga Gethanon. 14Kag ang kaban sang Dios nagpabilin sa panimalay ni Obed-edom#1 Cron. 26:4-5. sa iya balay sing tatlo ka bulan; kag ginpakamaayo sang Ginoo ang panimalay ni Obed-edom kag ang tanan nga iya.
Currently Selected:
1 MGA CRONICA 13: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
