Ang Kaalam ni Solomon 6
6
Ang Katungdanan sang mga Nagagahom
1Gani, kamo nga mga hari, kamo nga mga nagagahom sa bug-os nga kalibutan, magpamati kamo sa akon igasiling kag talupangda ninyo ini. 2Ginagamhan ninyo ang madamo nga kadutaan kag nagapabugal kamo nga madamo kamo sing ginagamhan, 3pero#Rom. 13:1. ini nga gahom ginhatag sa inyo sang Ginoo nga Labing Mataas. Pagausisaon niya kon ano ang inyo nahimo kag kon ano ang inyo ginaplano nga pagabuhaton. 4Nagagahom kamo sa ngalan sang Dios kag sang iya ginharian, kag kon indi kamo maggahom sing matarong, kon indi ninyo pagtumanon ang kasugoan, kon indi kamo magkabuhi suno sa kabubot-on sang Dios, 5magabaton kamo sang hinali kag makakulogmat nga silot. Ang paghukom mas mabug-at para sa mga nagagahom. 6Ang ordinaryo nga mga tawo pagahukman sing may kaluoy tungod sang ila mga sala, pero ang mga nagagahom magapangatubang sang isa ka mabug-at nga paghukom. 7Ang Ginoo sang tanan wala nahadlok sa kay bisan sin-o, walay sapayan kon daw ano sa iya ka gamhanan. Ang Dios nagtuga sang tanan, gamhanan man ukon ordinaryo, kag iya ginatatap sing alalangay ang tanan, 8pero mangin-estrikto sia sa paghukom sa mga nagagahom. 9Ginasulat ko ini para sa inyo gamhanan nga mga hari, agod makahibalo kamo kon paano kamo makabuhat nga may kaalam kag inyo malikawan ang mga kasal-anan. 10Balaan ini nga mga butang, kag kon inyo ini talupangdon sa balaan nga paagi, pagakabigon man kamo nga balaan. Kon inyo maangkon ini nga kinaalam, mapangapinan ninyo ang inyo kaugalingon sa Adlaw sang Paghukom. 11Gani hupti ninyo subong manggad kag kalipay ang akon ginatudlo kag mabaton ninyo ang maayo nga pagtulon-an.
Ang Bili sang Kaalam
12Ang Kaalam nagasiga sing masanag kag wala ini nagapiraw; ang mga nagapalangga kag nagapangita sa iya, mahapos nga makaangkon sa iya. 13Madali sia nga mahibaluan sang bisan sin-o nga nagahandom sa iya. 14Ang nagabugtaw sing aga pa sa pagpangita sa iya indi mabudlayan; makita mo sia nga nagapungko sa atangan sang imo balay. 15Maangkon mo ang himpit nga paghangop kon may paghangad ka sa Kaalam. Kon pangitaon nimo sia, sa labing madali maangkon nimo ang mahidaiton nga panghunahuna, 16tungod kay ang Kaalam nagapangita sa mga takos mag-angkon sa iya, kag masalapuan niya ikaw bisan diin ikaw. Maluloy-on sia kag manginyara sia sa tagsa nimo ka panghunahuna.
17Ang Kaalam nagasugod sa tion nga luyag ka magtuon sing maminatud-on. Sa paghandom sa Kaalam nagakahulogan nga higugmaon nimo sia, 18sa paghigugma sa iya nagakahulogan nga ginatuman nimo ang iya mga kasugoan, sa pagtuman sang iya mga kasugoan nagakahulogan sang kasigurohan sang nagapadayon nga kabuhi, 19kag ang nagapadayon nga kabuhi nagadala sa imo palapit sa Dios. 20Ang paghandom sang Kaalam makapahanda sa imo sa paggahom sang ginharian. 21Gani, kamo nga nagagahom sang mga pungsod, kon ginapakamahal ninyo ang inyo mga trono kag ang mga simbulo sang inyo gahom, tahura ang Kaalam agod nga maggahom kamo sa walay katapusan.
Si Solomon Luyag Magpaambit sang Iya Kaalam
22Isugid ko sa imo kon ano ang Kaalam kag kon paano sia nanginsubong. Indi ko pagtaguon ang bisan ano nga may kaangtanan sini kag akon sipadsiparon ang iya kasaysayan halin sa ginsugoran kag ipahayag ko sa tanan ang iya kabug-osan. Talupangdon ko ang tagsa ka bahin sang kamatuoran. 23Bisan pa ang akon maimon nga handom, indi makapugong sa akon sa pagpahayag sang tanan. Ang Kaalam indi makapakig-upod sa maimon nga handom. 24Sa pagkamatuod, kon madamo ang maalam nga mga tawo, manginhilway sa kagamo ang kalibutan. Ang hari nga maalam masaligan sa paghatag sa iya mga sakop sining kalig-unan. 25Gani, tun-i ang akon igatudlo sa imo kag may makuha ka nga pagtulon-an sa sini.
Currently Selected:
Ang Kaalam ni Solomon 6: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012