Ang Kaalam ni Solomon 5
5
Ang Paghinulsol sang mga Malaut
1Sa sadto nga adlaw ang matarong nga tawo nga napun-an sang pagsalig magatindog sa atubang sang mga nagpigos sa iya nga nagapakadiutay sang iya mga pag-antos. 2Magakatingala sila sa pagtan-aw sa iya nga wala maano kag magakulurog sila sa kahadlok. 3Dayon magahinulsol sila tungod sang ila mga ginbuhat kag samtang nagakasakit sila magasinilingay sila: 4“Amo ini ang tawo nga aton ginyaguta. Ginkabig naton sia nga buang sa pagkabuhi sing subong sadto, kag sang mapatay sia wala naton sia ginhatagi sing kadungganan. 5Kag sa karon yari sia nga isa sang mga anak sang Dios kag may iya kaugalingon nga lugar sa tunga sang mga tawo sang Dios. 6Kita ang nagtalang sa matadlong nga dalan. Wala gid kita nagkabuhi sa kapawa sang katarungan, wala gani kita makakita sang nahauna nga silak sini. 7Ang kabug-osan sang aton kabuhi nagtalang sa wala sing pat-in nga mga desierto sa baylo nga magsunod kita sa dalan nga luyag sang Ginoo nga aton pagaagihan. Ang aton indi pagsunod sa kasugoan nagdala sa aton sang kalaglagan. 8Ginpabugal naton ang aton kaugalingon, naghinambog kita sang aton pagkamanggaranon kag karon, ano nga kaayuhan ang nabuhat sini sa aton? 9Yadtong tanan nga mga butang nagligad na, nagkaladula sila kasubong sang landong, kasubong sang imo nabatian kag dayon imo man nalipatan.
10“Ang barko nagakihad sang mga balod sang kadagatan, pero sa tapos sia makaligad wala sia nagabilin sang palatandaan sang iya gin-agihan. Indi ikaw makasiling nga nanginyara sia dira sa wala pa lamang madugay. 11Ang pispis nagalupad sa kalangitan, pero wala sia nagabilin sang palatandaan nga nanginyara sia dira sa wala pa lamang madugay. Nagalupad sia nga nagapaanod sa manipis nga hangin paagi sa kusog sang iya mga pakpak nga wala nagabilin sang palatandaan sang iya pag-agi. 12Ang baslay nagapahawa sang hangin sa iya pag-agi, pero sa gilayon sa iya paglampuwas ang hangin nagatingob liwat kag wala sing may makatudlo kon sa diin nayon nag-agi ang baslay. 13Katulad man kita sini, natawo kita kag sa ulihi mapatay nga wala nagabilin sang palatandaan sang virtud, ginlaglag kita sang aton kalautan.”
14Ano bala ang paglaom sang malaut nga mga tawo? Paglaom nga kasubong lamang sang labhang nga ginapalid sang hangin, ang paglaom nga kasubong sang bukal sa dagat nga nagakadula sa pag-abot sang bagyo, ang paglaom nga kasubong sang aso nga nagakapanas sa dupoydupoy sang hangin. Ang ila paglaom kasubong sang handumanan sang isa ka bisita nga nagapaligad sang isa ka gab-i sa aton balay kag sa madason nga adlaw nagapauli.
15Pero ang matarong nagakabuhi tubtob sa katubtoban. Ginabalusan sila sang Ginoo, kag ang Labing Mataas magaapin sa ila. 16Pagahatagan niya sila sang harianon nga kadayawan kag korona nga malahalon. Pagaapinan niya sila sang iya gamhanan nga butkon. 17Magapakig-away#Efe. 6:11-17. sia nga may pagsalig sa paglutos sang iya mga kaaway kag iya gamiton nga hinganiban ang mga tinuga mismo. 18Ang pagkamatarong amo ang iya manginbayo sa inaway, ang matuod nga katarungan amo ang iya helmet kag 19ang pagkabalaan amo ang iya mapag-on nga taming. 20Bairon niya kasubong sang espada ang iya nagabalingaso nga kaakig kag ang gahom sang mga tinuga magabuylog sa iya sa pagpakig-away batok sa mga buangbuang nga nagapamatok sa iya. 21Ang mga kilat magaigo sa ila ginatumod kasubong nga ang Ginoo daw naghimo sang isa ka pana halin sa mga panganod kag nagapalupad sang mga baslay sa iliguon sini. 22Magaulan sing tudo sang dalagku nga yelo sa iya mga kaaway. Ang mga dagat kag mga suba magatabon sa ila sa isa ka madalom nga baha. 23Isa ka mabaskog nga bagyo ang magapalid sa ila kasubong sang labhang. Ang bug-os nga kalibutan malaglag tungod sa pagkadi-matinumanon sa mga kasugoan. Ang malaut nga mga buhat amo ang magaguba sang pagdumalahan sang gubyerno.
Currently Selected:
Ang Kaalam ni Solomon 5: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012