Ang Kaalam ni Solomon 7
7
Ang Hari kasubong sa kay Bisan Sin-o
1-2Kasubong sa kay bisan sin-o nga tawo, ako mamalatyon. Kaliwat ako sadtong nahauna nga tawo nga gindihon gikan sa duta. Ginpanamkon ako gikan sa binhi sang isa ka tawo, sa kalipay sang pagpakighilawas. Sa sulod sang siyam ka bulan gindihon ako sa dugo sang tagoangkan sang akon iloy. 3Sang natawo ako, nag-abot ako sa kalibutan kasubong sang iban nga mga tawo. Nagsugod ako sa pagginhawa sang hangin nga ginaginhawa sang tanan, kag kasubong sang iban nga mga tawo, ang nahauna ko nga gintuaw amo ang paghibi. 4Ginputos ako sa lampin kag gin-atipan. 5Wala sing hari nga nagsugod sang kabuhi nga lain sang iya sang iban. 6Para sa aton tanan, isa lamang ang alagyan padulong sa kabuhi kag isa man ang alagyan padulong sa kamatayon.
Si Solomon Nagpahayag sang Iya Paghigugma sa Kaalam
7Tungod#1 Hari 3:6-9; Klm. Sol. 9:1-18. kay natalupangdan ko nga tawo lamang ako, nagpangamuyo ako kag ginbugayan ako sing paghangop. Ang espiritu sang Kaalam nag-abot sa akon. 8Ginahangad ko sia labaw pa sang sa trono kag korona. Ang manggad manginwala kon ipaanggid sa Kaalam. 9Ang malahalon nga mga alahas indi makatupong sa iya bili, ang tanan nga bulawan sa kalibutan mangin-isa ka hakop nga balas kag ang mga pilak manginkasubong sa lunang kon ipaanggid ini sila sa Kaalam. 10Ginahangad ko ini sia labaw sang sa maayo nga lawas kag kaambong. Ang iya kapawa wala nagapiraw kag ginapasulabi ko ini sang sa iban nga kasanag.
11Sang mag-abot sa akon ang Kaalam, ang tanan nga kaayuhan nag-upod sa iya. Nagdala sia sa akon sang indi masaysay nga manggad. 12Ginakalipay ko ini sila tanan tungod kay ang Kaalam amo ang nagdala sa ila sa akon. Sang una anay wala ko matalupangdi nga sia amo ang ginhalinan sini tanan nga mga butang. 13Tampad ako sa pagtuon sa iya kag sa karon ginakalipay ko ang pagpaambit sang akon natun-an. 14Wala sang bisan sin-o nga sarang makaurot sang mga manggad sang Kaalam. Mangin-abyan ikaw sang Dios kon gamiton mo ang mga manggad sang Kaalam, kag ang Dios magapasugot sa imo matun-an sa Kaalam.
15Ginapangamuyo ko sa Dios nga kabay pa nga ang akon mga panghunahuna mangintakos sang akon natun-an kag agod nga maghambal ako suno sa iya kabubot-on. Sia ang manugtuytoy sang Kaalam, nagatadlong sia sa mga maalam. 16Kita tanan, ang aton mga pulong, paghangop kag mga kinaadman yara sa idalom sang iya gahom kag awtoridad. 17Sia ang naghatag sa akon sang matuod nga ihibalo sang gahom sang mga tinuga: kon sa ano nahimo ang kalibutan, kon paano ang ila sini pagbinatasan, 18kon paano ginbuhat ang kalendaryo paagi sa mga paghulag sang adlaw, ang pagbaylo sang mga panahon, 19ang porma sang mga kabituonan kag ang dag-on sang mga tinuig. 20Gintudloan niya ako sang pagginawi sang buhi nga mga tinuga, ang pamatasan sang talunon nga mga sapat, ang gahom sang mga hangin, ang pangatarungan sang mga katawhan, ang nanarisari nga klase sang mga tanom, ang kapuslanan sang ila mga gamot kag dayon sa pagbulong. 21Nahibaluan ko ang mga butang nga nahibaluan na sing matul-id sing una kag ang mga wala gid mahibaloi sadto anay, 22tungod kay ang Kaalam, nga nagporma sa tanan nga mga butang nga nagakabuhi, amo ang akon manunodlo.
Ang Kinaugali sang Kaalam
Ang espiritu sang Kaalam maalam kag balaan. Isa lamang ang iya kinaugali pero ginapahayag niya ang iya kaugalingon sa madamo nga paagi. Wala ini sing lawas nga makit-an, gani hilway sia nga maghulag sa palibot. Matin-aw ini sia, matinlo kag may pagsalig. Indi sia mahalitan.#7:22 Indi sia mahalitan: ukon Wala sia nagapanghalit. Ginahigugma niya ang maayo. Matalom sia kag indi malutos, 23maluloy-on sia kag abyan sang mga katawhan. Masaligan sia kag wala sia sing palaligban. May gahom sia sa tanan nga butang kag makita niya ang tanan. Nagasulod sia sa tagsa ka espiritu nga maalam kag putli, bisan daw ano ini ka halalungan.
24Ang Kaalam nagahulag sing mas mahapos pa sang sa hulag mismo, tama ini ka putli nga sarang makasulod sa tanan nga mga butang. 25Sia ang ginhawa sang gahom sang Dios, isa ka putli kag masanag nga silak sang himaya gikan sa Makagagahom. Ang mga may dagta indi makaangkon sang Kaalam. 26Sia ang silak sang walay katapusan nga kapawa, ang himpit nga espeho sang ginahimo sang Dios kag sang iya kaayo. 27Bisan pa nga nagaisahanon ang Kaalam, mabuhat niya ang bisan ano. Mabuhat niya ang tanan nga manginbag-o walay sapayan nga sia mismo wala nagabalhin. Gikan sa kaliwatan kag kaliwatan nagasulod sia sa mga kalag sang balaan nga mga tawo kag iya sila ginabuhat nga mga abyan sang Dios kag mga propeta. 28Wala na sing ginahigugma sing labi ang Dios sang sa mga tawo nga may Kaalam. 29Ang Kaalam mas matahom pa sang sa adlaw kag mga bituon. Mas maayo pa sia sang sa kapawa mismo, 30tungod kay ang kagab-ihon nagasunod sa adlaw, pero ang kalautan indi makadaog sa Kaalam.
Currently Selected:
Ang Kaalam ni Solomon 7: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012