Ang Kaalam ni Solomon 18
18
Ang Kapawa Nagsiga sa mga Taga-Israel
1Pero#Exo. 13:17-22. padayon ang pagsiga sang masanag nga kapawa sa imo balaan nga mga tawo. Ang ila mga tingog nabatian sang ila mga kaaway pero indi sila makit-an. Naibog sila sa maayo nga kapalaran sang imo mga tawo tungod kay wala sila nagaantos. 2Ang pinakakubos nga nahimo sang mga kaaway sang imo mga tawo amo ang pagpasalamat nga ang ginbuhatan nila sang malain wala magtimalos sa ila karon, kag gani nagpakitluoy sila nga maghalin ang imo mga tawo.#18:2 nagpakitluoy…mga tawo: ukon nagpangayo sang ila pagpatawad tungod sang ila nagligad nga inaway.
3Dayon imo gintuytoyan ang imo mga tawo samtang nagpanglakaton sila padulong sa pungsod nga wala nila mahibaloi. Paagi sa haligi nga kalayo gintuytoyan mo sila. Kasubong ini sang adlaw nga wala naghalit sa ila sa sinang mahimayaon nga panglakaton. 4Pero ang ila mga kaaway nga wala gintugoti sa pagtan-aw sang kapawa, nagakabagay nga bilangguon sa kadudulman tungod kay ginbilanggo nila ang imo mga tawo. Kag paagi sa imo mga tawo nga ang walay katapusan nga kapawa sang Kasugoan pagaihatag sa kalibutan.
Ang Pagpamatay sang mga Panganay sang Ehiptohanon
5Sang nagpamat-od ang imo mga kaaway sa pagpamatay sa mga lapsag sang imo balaan nga mga tawo may yara nga isa ka ginpatumbayaan nga bata pero ginluwas ini sang ulihi. Dayon imo ginsilutan ang imo mga kaaway paagi sa pagpamatay sang madamo nila nga kabataan. Ginlumos mo sang isa ka tion sa masulog nga tubig ang kabug-osan sang ila mga soldado. 6Pero imo ginpahibalo nga daan ang amon mga katigulangan kon ano ang matabo sa sina nga gab-i, agod nga magkalipay sila kag maglaom sing malig-on sa mga ginsaad mo sa ila. 7Ang imo mga tawo nakahibalo nga luwason mo ang matarong nga pungsod kag laglagon ang ila mga kaaway. 8Sa amo man nga paagi ginsilutan mo ang amon mga kaaway kag ginpasidunggan mo kami sa pagtawag sa amon padulong sa imo.
9Sa sadto nga panahon ang diosnon nga mga tawo gikan sa sining matarong nga pungsod nagdulot sa tago sang mga halad kag nagsaad sila sa isa kag isa sa pagtuman sang mga kasugoan sang Dios kag sa pagpakig-ambit sang ila mga kaayuhan kag mga katalagman. Gin-amba na nila yadtong mga dumaan nga mga himno sang pagdayaw. 10Pero sa bahin sang ila mga kaaway nabatian bisan diin ang makaluluoy nga mga paghinibi samtang naglalaw sila sa kamatayon sang ila mga anak. 11Nag-antos ang mga agalon kasubong sang ila mga ulipon; ang hari nag-antos man kasubong sang iya mga sakop. 12Madamo gid ang mga patay nga indi sarang maisip. Ang nabilin nga mga buhi kulang kaayo sa paglubong sang mga patay. Sa isa lamang ka pisok, nagkalamatay ang pinalangga nila nga mga anak; sila tanan napatay sa amo man nga paagi. 13Ining mga tawo wala nagpamati sa paandam, sa baylo, nagsalig sila sa ila gahom sa pagpangmadyik. Pero sang nagkalamatay ang panganay nila nga mga anak nga lalaki, ila nakilala nga ang Dios amo ang Amay sang mga Israelinhon.
14Nanginmalip-ot ang kagab-ihon sa pag-abot sang tungang gab-i, samtang ang tanan malinong kag may paghidait, 15gintuman sa hinali ang imo mga pamahog! Gikan sa imo harianon nga trono sa langit nanaog ang indi madaog nga tingog sang paghukom padulong sa sadtong ginpakamalaut nga duta. Nag-abot ini kasubong sang isa ka soldado nga nagasalakay sa daku nga kaakig 16nga nagatuman sang imo indi malingkang nga mando. Makahaladlok ang hinganiban nga iya dala kag nagatindog ini sa duta samtang ang iya ulo nagasundol sa langit kag ginpuno niya ang duta sang mga patay. 17Sa sadto nga tion ang mga tagumatayon napuno sang makangilidlis nga dalamguhanon kag hinakop sang hinali nga kakulba. 18Naghigdaon sila nga daw mga patay sa bug-os nga duta kag nahibaluan kon ngaa nga nagakalamatay sila. 19Nakahibalo sila nga nagakalamatay sila tungod kay ang ila makangilidlis nga mga damgo nagsugid sa ila.
Ang Pangamuyo ni Aaron Nagluwas sang mga Taga-Israel sa Kamatayon
20Nag-abot#Num. 16:41-50. man ang kamatayon sa matarong nga pungsod tungod kay ang peste naghanot sa ila sang didto sila sa desierto pero wala magdugay ang imo kaakig. 21Gin-apinan sila dayon sang isa ka tawo nga wala sing sala. Si Aaron nga nagtiglawas sa ila subong pari nagpangamuyo kag naghalad sang sinunog nga insyenso sa pagpangayo sang kapatawaran sang ila mga sala. Paagi sa iya mga pangamuyo kag sa insyenso subong iya mga hinganiban, iya ginpamatukan ang imo kaakig kag gani nauntat ang kalalat-an. Sa paghimo niya sini iya ginpamatud-an nga imo sia alagad. 22Nadaog niya ang mapait nga kahul-anan,#18:22 mapait nga kahul-anan: Sa Griego kadam-an. pero indi tungod sang iya kusog ukon kusog sang mga hangaway. Sa baylo, gingamit niya ang pagpangamuyo sa pagtapna sang silot, sa pagpahanumdom sa imo sang imo mga saad sa amon mga katigulangan. 23Madamo na ang mga nagkalamatay nga nagatinumpok, pero nagpatunga sia sa pagpugong sang imo kaakig agod nga indi maano ang mga buhi. 24Nagsuksok sia sang malaba nga bayu nga napunihan sang mga simbulo sang bug-os nga kalibutan. Sa pagpasidungog sa amon mga katigulangan, gingamit niya ang apat ka idas sang nasilsil nga mga bato sa iya dughan, kag ang imo pagkahalangdon ginrepresentahan sang mga puni sa iya turbante. 25Ang Anghel sang Kamatayon nahadlok sa sini nga mga butang kag gani nag-untat sia sa pagpamatay. Diutay lamang yadto nga pagtam-id sang imo kaakig, pero tuman na yadto.
Currently Selected:
Ang Kaalam ni Solomon 18: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012