Ang Kaalam ni Solomon 19
19
Ang Binuang nga Paghikog sang mga Ehiptohanon
1Pero ang mga di-diosnon nagpadayon sa pagbatyag sang imo walay kaluoy nga kaakig tubtob sa katapusan. Imo nahibaluan kon ano ang ila pagabuhaton sa wala pa nila ini mabuhat. 2Imo nahibaluan nga bisan ila tugotan sa paglakat ang imo mga tawo kag sa pagpagwa sa ila sang dalidali, sa indi madugay magabaylo ang ila mga panghunahuna kag ila sila lagson. 3-4Samtang ang mga taga-Ehipto nagalalaw pa sa mga lulobngan sang ila mga minatay, nalipat sila kon ngaa ini nagkalatabo. Gani nagpamat-od sila nga lagson yadtong ila gintugotan sa paglakat subong nga mga manugpalagyo. Nakaabot sila sa sining binuang nga pamat-od bilang bahin sang nabilin kag takos nga silot nga ila pagaagumon. 5Nasugata nila ang makatalanhaga nga kamatayon samtang nagpadayon ang imo mga tawo sa ila makatilingala nga pagpanglakaton.
Ang Dios Nagtuytoy kag Nag-apin sa Iya mga Tawo
6Ang kabug-osan nga ugali sang kalibutan nabaylo sa imo pagmando agod nga indi mahalitan ang imo mga tawo. 7Nakita nila ang panganod sa ibabaw sang ila kampo kag mamala nga duta sa lugar nga sadto anay may tubig. Sa tunga sang mabaskog nga mga balod sa Mapula nga Dagat may kapatagan nga nabanigan sang mga hilamon nga nanginmahapos ang pagtabok sang imo mga tawo. 8Ang mga tawo sa idalom sang imo gahom nakakita sini nga katingalahan kag nagtabok sila. 9Nagdinalagan sila kasubong sang mga kabayo nga ginbuy-an sa paghalab. Nagkindingkinding sila kasubong sang mga kordero kag gindayaw nila ikaw, O Ginoo, kay ginluwas mo sila. 10Ila pa nadumdoman ang ila pangabuhi sang mga ulipon sila—kon paano nagpatubas ang duta sang mga langaw sa baylo sang kasapatan, kon paano nagdamo sa mga suba ang mga paka sa baylo sang mga isda. 11-12Sang ulihi, sa paghandom nila sang maayo nga pagkaon, nag-abot ang mga pitaw gikan sa dagat sa pagbusog sang ila kagutom. Ang pitaw isa ka sahi sang pispis nga wala pa gid nila nakita sadto anay.
Ginsilutan ang mga Ehiptohanon
13Pero ang mabaskog nga daguob nagpaandam sang palaabuton nga silot para sa sadtong mga makasasala. Nag-antos sila sang nagakabagay gid nga silot para sa ila daku nga kalautan. Wala pa sing pungsod nga nagkangil-ad sing subong ka pintas sa mga dumoluong. 14Ang iban nga mga tawo nakilala nga nagpamatok sa pagbaton sang mga dumoluong nga nagkadto sa ila, pero ining mga tawo nag-ulipon sa ila mga bisita kag sa mga nagpakita sa ila sang kaluoy. 15Sa tagsa ka pungsod nga wala nagbaton sang mga dumoluong pagasilutan, 16pero ining mga tawo nga nagbaton anay sing masinadyahon sa mga dumoluong kag nagkabig nga kaparehas nila, sang ulihi ginpintasan nila sila. 17Ining mga tawo nabulag man kasubong sang mga tawo sa Sodoma nga nagkadto sa pwertahan sang balay ni Lot nga matarong. Ginlikupan sila sang bug-os nga kadudulman samtang ang tagsatagsa nagpanagadsad sa pagpangita sang iya kaugalingon nga pwertahan.
Ang Makatilingala nga Gahom sang Dios
18Ang tagsa ka kwerdas sa arpa may iya kaugalingon nga tuno, pero ang tagsa ka tunog sarang makombinar sa iban agod nga maghatag sang nagakalainlain nga mga sonata. Amo ina ang natabo sa sadto nga mga inadlaw sang ang tagsa ka hitabo nagsulod sa bag-o nga mga kombinasyon. Tan-awa kon ano ang natabo! 19Ang mga sapat nga nagaestar sa duta nag-estar sa tubig, kag ang mga sapat nga nagalangoy nagtakas sa mamala nga duta. 20Ang kalayo nagdabdab bisan sa tubig nga amo ang makapalong sa iya. 21Pero ang mga dabdab indi makasunog sa unod sang mamalatyon nga mga tinuga nga nagalakat sa ibabaw sini kag indi man makatunaw sang langitnon nga kalan-on nga sa kinaandan nagakatunaw kasubong sang yelo.
22O Ginoo, ginbuhat mo nga gamhanan ang imo mga tawo—madinalag-on sa tanan nga bagay. Wala mo sila pagpabayai. Imo sila ginbuligan sa gihapon, bisan diin.
Currently Selected:
Ang Kaalam ni Solomon 19: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012