Ang Kaalam ni Solomon 17
17
Ang mga Taga-Ehipto Kinulbaan sa Kagab-ihon
1Ang imo paghukom, O Ginoo, makatilingala kag mabudlay isaysay. Tungod gani sini, nagatalang ang mga tawo nga wala natudloi nahanungod sini. 2Sa tion nga ang mga wala nagatuman sang kasugoan nagahunahuna nga ang imo balaan nga pungsod yara sa idalom sang ila paggahom, sila mismo nabilanggo sa malawig nga kagab-ihon sang kadulom. Nagpakuribong sila sa ila mga balay nga nahilayo sa imo walay katapusan nga pag-atipan. 3Nagdumdom sila nga wala sing may nakahibalo sang ila mga sala kag wala ini matalupangdi, nga natabunan ini sang madulom nga kurtina sang pagkalimot, pero sa karon kinulbaan sila sing tuman, nagsalangisag kag hinadlukan sila sang indi makita nga mga bagay. 4Bisan pa gani ang madulom nga mga lugar sa diin sila nagahigda indi makaapin sa ila batok sa kahadlok. Ginlibutan sila sang makasiligni nga mga gahod, nagpakita sa ila ang makakulogmat nga mga bagay nga may makahaladlok nga mga guya. 5Ang kalayo nadulaan sing gahom sa paghatag sa ila sing kasanag kag ang masiga nga mga bituon wala sing sarang mahimo sa pagtabog sang makamamatay nga kadulom. 6Ang nagasiga sa ila amo lamang ang makangingidlis nga kalayo nga wala masindihi sang tawhanon nga kamot, kag sa ila kakulba nagpati sila nga ang matuod nga kalibutan mas malain pa sang sa mga butang nga ila ginhunahuna. 7Ang mga pakunokuno nga bunga sang ila pangmadyik nahuy-an, kag ang tanan nga kaalam nga ila ginpabugal nanginwalay kapuslanan. 8Naghambal sila nga sarang nila matabog ang tanan nga kahadlok kag mga balatian sang panumdoman, pero karon sila mismo nagmasakit sang isa ka binuang kag wala sing rason nga kakulba. 9Bisan pa nga wala gid sing makatalagam nga natabo, ginakibang sila sa mga pagginahod sang mga man-og kag kasapatan nga nagapalapit sa ila. 10Gani, nagkalamatay sila nga nagakurog sa kahadlok, nga nahadlok bisan sa pagmuklat sang ila mga mata, pero indi nila ini mapiyong.
11Ang kinaugali sang kalautan amo mismo ang pagkatalaw kag nagakondenar ini sang iya kaugalingon. Ang tawo nga ginabasol sang iya konsensya magahunahuna sing masunson nga ang mga butang mas malain sang sa ila matuod nga kahimtangan. 12Ang kahadlok amo ang indi paggamit sang bulig nga ginahatag sang rason. 13Sa tion nga madulaan ka sing pagsalig sa rason, dira kag magaabot ang kahadlok nga amo ang bunga sang kulang nga ihibalo.
14Ining mga tawo naghigda nga indi matulogan sa bug-os nga gab-i, bisan pa nga ang kagab-ihon wala sing gahom sa ila tungod kay ang ini naggikan sa walay gahom nga kaidadalman sang kalibutan sang mga patay. 15Ginlagas sila sang makakulogmat nga mga bagay kag gani naghigda sila nga indi makahulag samtang gintugyan nila ang ila kaugalingon sa hinali kag wala ginapaabot nga kakulba. 16Ang mga tawo sa hinali nagakapunaw kag nagakatumba nga ginakadenahan sang ila kakulba. 17Ang mga mangungoma, mga manugbantay sang mga karnero kag mga mamumogon sa kaumhan gindakop man sang subong nga kapalaran nga wala ginapaabot kag ginkadenahan sa kadulom sang indi makita nga kadena. 18-19Nagsalangisag sila sa huyop sang hangin, sa amba sang mga kapispisan sa mga kahoy, ukon sang daganas sang nagailig nga tubig, ukon sang paglinagapok sang nagakalahulog nga mga bato, ukon sang panaghoy sang isa ka indi makita nga tinuga nga nagahulag sa palibot, ukon sang pagngurob sang talunon nga mga kasapatan, ukon sang mga nagasinabatsabat nga tingog sa mga kabukiran. 20Sa bug-os nga kasanag sang adlaw, ang bug-os nga kalibutan nagapadayon sang iya bulohaton nga wala matublag. 21Yadto lamang nga mga tawo ang nalikupan sang mangitungito nga kadudulman sang kagab-ihon amo ang larawan sang kamatayon nga nagahulat sa ila. Isa sila ka mabug-at nga lulan sa ila kaugalingon, lulan nga mas mabug-at pa sang sa kadudulman.
Currently Selected:
Ang Kaalam ni Solomon 17: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012