Ang Kaalam ni Solomon 16
16
1Gani nagakabagay nga ining mga tawo ginsilutan sadtong mga panong sang mga sapat kag ginpaantos sila.
2Pero#Exo. 16:11-13; Num. 11:31-32. ikaw, O Ginoo, wala nagsilot sang imo mga tawo sa sini nga paagi, sa baylo ginpakita mo sa ila ang imo kaayo. Ginpadalhan mo sila sing mga pitaw agod may kaunon sila, ginbusog mo sila sang pinasahi kag manamit nga mga pagkaon. 3Ginhimo mo ini agod nga kon magkaon ang mga nagasimba sa mga diosdios madulaan sila sing gana tungod sang makangilil-ad nga mga sapat nga ginpadala sa ila. Pero ang imo mga tawo gingutom sa malip-ot lamang nga tinion kag ginpakaon mo sila sang pinakanamit nga mga putahi. 4Kinahanglan gid man nga mag-antos sing tuman ang mga manugpigos samtang nga ang imo mga tawo nagatan-aw kon daw ano ang pag-antos sang ila mga kaaway.
5Sang#Num. 21:6-9. ginsalakay ang imo mga tawo sang mabangis kag dalitan nga mga man-og kag ginpamatay sila paagi sa dalit sini, wala mo ginpalawig ang imo kaakig sa paglaglag sa ila. 6Ini nga kalalat-an wala magdugay kay ang imo tuyo amo ang pagpaandam sa ila. Dayon imo sila ginhatagan sang simbulo sang pag-ayo, ang bronsi nga man-og, agod ipatalupangod sa ila ang ginamando sang imo Kasugoan. 7Ang bisan sin-o nga nagtulok sa sadtong simbulo, nag-ayo sia sa binuntogan sang man-og. Kag ini nahimo indi tungod sang iya nakita kundi tungod sa imo nga manluluwas sang tanan nga mga tawo. 8Paagi sa sini, ginpapati mo sa amon mga kaaway nga ikaw ang nagaluwas sa mga katawhan gikan sa tanan nga kalautan. 9Ang amon mga kaaway nagkalamatay sa kagat sang mga apan kag mga langaw, wala sing bulong nga sarang matambal sa ila tungod kay nagakabagay gid man sa ila ang silot sadtong mga kasapatan. 10Pero tungod sang imo kaluoy ginbuligan mo kag ginbulong ang imo mga tawo kag bisan ang dalitan nga mga man-og indi makadaog sa ila. 11Ginpangbuntog sila agod ila madumdoman ang imo mga sugo kag ang madali nila nga pag-ayo nagpahanumdom sa ila sang imo kaayo kag indi nila ikaw malipatan sing lubos. 12Wala sing bulong ukon inughaplas nga nag-ayo sa ila kundi ang imo pulong nga nagaayo sang bug-os nga katawhan, O Ginoo. 13May gahom ikaw sa kabuhi kag kamatayon kag sarang mo matugotan nga maghimumogto ang tawo kag imo sia mabuhi liwat. 14Ang malaut nga tawo makapatay sang iya isigkatawo, pero indi niya mabanhaw ang minatay ukon maluwas ang kalag nga ginbilanggo sa kalibutan sang mga patay.
Ang Makahalalit nga mga Bagyo sa Ehipto
15Wala sing sarang makapalagyo sa imo. 16Tan-awa yadtong di-diosnon nga mga tawo nga nagpamatok sa pagkilala sa imo nga Dios, gani ginsilutan mo sila paagi sa imo daku nga gahom. Inabutan sila sang tumalagsahon nga ulan kasubong sang yelo nga daw mga bato kag gin-upos sila sang kalayo. 17Ang labing makatilingala pa gid amo nga ang kalayo nagdabadaba sing tudo sa tunga sang tubig, ang tubig nga kuntani amo ang nagapalong sang kalayo. Ang bug-os nga kusog sang kalibutan nagapakig-away para sa matarong. 18Sa isa ka tion ang dabdab nag-ugdaw, agod indi ini makasunog sa mga sapat nga ginpadala sa pagsilot sa mga di-diosnon. Yadtong mga tawo ginpahangop mo nga ang imo paghukom nagalagas sa ila. 19Pero sa isa ka tion, ang kalayo nagdabadaba nga indi matupongan bisan pa nga ginalibutan ini sang tubig, kag sa iya pagdabadaba nagsunog sang patubas sa kadutaan sadtong mga di-matarong.
Ang mga Taga-Israel Nagbaton sang Mana nga Kalan-on
20Pero#Exo. 16:1-36. ining kalalat-an wala naghalit sang imo mga tawo. Sa baylo, imo sila ginhatagan sang kalan-on sang mga anghel. Ginpadalhan mo sila gikan sa langit sang tinapay. Kag ining kalan-on nga naaman nagbusog sa tagsatagsa kag nagustohan sang tanan. 21Ini tanan nagpakita kon daw ano ang imo pag-atipan na may paghigugma sa imo mga kaanakan. Yadtong pagkaon nagbusog sang kagutom sang tanan nga nakakaon sini, kag ang sabor ginbayluhan suno sa handom sang tagsatagsa. 22Isa ini ka kalan-on nga sa kinaandan nga kahimtangan nagakatunaw subong sang yelo, pero sa karon wala ini natunaw bisan pa nga yara ini sa tunga sang kalayo. Ini gintuyo sa pagtudlo sa imo mga tawo nga ang amo mismo nga kalayo nga nagsunog sang patubas sang ila mga kaaway sa tion sang pag-ulan sing tudo kag pagtupa sang yelo nga daw mga bato 23wala sing gahom sa paghalit sa ila, agod nga ang matarong nimo nga mga tawo may makaon.
24Sa imo mando, natuga ang kalibutan. Ang kabug-osan sang mga tinuga nagsilot sang mga di-matarong, pero nanginmaayo ini sa mga nagasalig sa imo. 25Ang imo gintuga may nagakalainlain nga porma sa pagpakita kon paano ikaw naghatag nga may kaalwan sa tanan nga mga nagapangamuyo sa imo.#16:25 nagapangamuyo sa imo: ukon may kinahanglan. 26Ini tanan nagkalatabo agod nga ang mga tawo nga imo hinigugma, O Ginoo, magtuon nga wala sila ginapakaon sang ila ginatanom kundi ang imo pulong amo ang nagapadayon sa pagsagod sa mga nagasalig sa imo. 27Ang pagkaon nga wala nasunog sang kalayo natunaw sa silak sang adlaw. 28Ini nagtudlo sa amon nga kinahanglan magbangon kami sa kaagahon sa pagpasalamat, kag magpangamuyo kami samtang nagabutlak ang adlaw. 29Pero ang paglaom sang di-mapasalamaton nga tawo magakatunaw kasubong sang yelo, kag subong sang nauyang nga tubig magailig ini palayo.
Currently Selected:
Ang Kaalam ni Solomon 16: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012